ZING'ANO 15
15
Yahova Alolaa vindu Viosi
1Litivula lia galaha lihomatizaa vutima, navuzwa litivula lia vwangu likora vutima vwiginga.
2Lwa vandu vageri vamoloma, valomba limanya kuyanzika, navuzwa vandu vasiru vamoloma vusiru.
3Yahova alolaa chekoleka havundu hoosi, akohezaa lwa kokoraa vulahi anoho vudamanu.
4Amakuva malahi galetaa livamwoyo, navuzwa makuva malulu gaduvulanyia mwoyo gugwo.
5Voveeye vusiru koleka ga baba woovo yakwigiza; ni vulahi kuvugilira miigizu geege.
6Avandu valungi vaviika vutugi vwavo lwu vudinyu vuduuka.
7Limanya lilaandizwa na vandu vaveeye avageri, navuzwa sivulandizwa na vasiru mba.
8Yahova ayaanzizwa nilisaala lia vandu valahi, navuzwa adunyiraa visiuviliru viletwaa na vandu vachamu.
9Yahova adunyiraa zinzira zia vandu vadamanu, navuzwa ayaanza yavo avakolaa malungi.
10Nokora agaveeye madamanu ulahevwa mageri manene ligali, kandi nusuula miigizu, ulakuza.
11Kali niiva kivala cha vakuzu sikinyala kwigalira Yahova kumanya agaveeyo mba; vandu vanyara kuvisa ndi zing'anagani ziavo kutura ku Nyasaye?
12Avandu vaveeye avelori sivayanzaa amigizu mba, kandi sivatevaa kwenya limanya kutura ku vandu vaveeye novogeri mba.
13Lwa avandu vaveeye nu vuyanzi vimwenyelaa, navuzwa lwa vaveeye no vovereri, valoreka kuva ni zing'anagani zinyingi.
14Avandu vovogeri vayaanza kwiga, navuzwa vandu vasiru vigutizwa na gavatamanyi.
15Limenya liu mundu mudaka liveeye liukunyangana kazozo, navuzwa vandu vu vuyanzi vasangalira limenya liavo.
16Nivulahi kuva mudaka ma utie Yahova kuvita kuva mutugi ma ove muvudinyu.
17Ni vulahi kulia zinguza na vandu va uyanzaa kuvita kulia inyama enolu huvusigu voveeye.
18Vutima vululu voletaa mahangali, navuzwa vwikuziri voletaa mirembe.
19Niiva oveeye mugata ulanyora vudinyu havundu hoosi, navuzwa niiva oveeye musuuvirifu, si ulava nuvudinyu mba.
20Mwana mugeri ayaanzizaa baba weve, navuzwa mwana musiru achayaa mama weve.
21Avandu avasiru vayaanza vuyingu vwavo, navuzwa vandu avageri vakora kindu keveeye kilahi.
22Nyora miigizu goosi gunyala na ulaguuta, navuzwa vugira gene yago, ulagwa.
23Ni vusangali ki konyoora makuva gaduukanaa mung'inga idukanaa!
24Avandu vageri vagenda kunzira yi livamwoyo, si vagenda kunzira ivimiliraa kuzia mu likuza mba.
25Yahova alasambula zinyumba zia vandu vaveeye avelori, navuzwa alakinga miandu ja vakunzakali.
26Yahova adunyiraa zing'anagani zindamanu, navuzwa ayanziliraa makuva malahi.
27Niiva ogeliza kolomba vukala vwuvugadi, ulavika vandu vinyumba yooyo mu vudinyu. Utavugula viambeti mba, na ulamenya mihiga minyingi.
28Vandu valahi vaganaganyia nivakikiri kutivula kindu; Avandu vadamanu vahaana mativuli ga vwangu, navuzwa gavaviikaa muvudinyu.
29Lwa vandu valungi vasaala Yahova ahuliraa, navuzwa alekaa yavo avaveeye vadamanu.
30Mu moni muveeye nilimwenya, mukolomba ove nuvuyanzi, kandi makuva malahi gakolombaa uve vulahi ligali.
31Niiva ulahulira lwa wigizwa, ulava mugeri.
32Niiva usulaa kwiga, wisalirizaa. Niiva ulayanza kwigizwa, ulava mugeri ligali.
33Liitia Yahova liveeye konyoora miigizu. Gakuduukiraa ove muhocha nulanyoola luyali.
©Bible Society of Kenya, 2019