ZING'ANO 14
14
Ovogeri Voletaa Limanya Lilahi
1Mukali mugeri yumbaka inyumba yeeye, navuzwa mukali musiru asambula inyumba yeeye na makono geege mwene.
2Mundu ogendaa mu vulungi atizaa Yahova, navuzwa oyo utatiza Yahova amuchayaa.
3Musiru mwigingiri amolomaa makuva manyingi, navuzwa makuva gu mundu mugeri gamukinga.
4Vugira zigiriki ziukulima, chage chicho kilava vuzwa, navuzwa noveeye nazio chage chicho kilizula vuswage.
5Muloli musuuvirifu avoora gagiligali kazozo, navuzwa muloli utaveeye musuuvirifu avoora ovovehi.
6Vandu vekehenyahenye sivanyala kuva avogeri mba, navuzwa vandu vovogeri viga vwangu.
7Welehe ku vandu vasiru kigira sivaveeye na miigizu mba.
8Mundu mugeri atumikilaa ovogeri vwivwe kolola inzira yeeye, navuzwa vusiru vwu musiru vumuganda.
9Avandu vasiru sivahenderaa kokora vwoni, navuzwa vandu valungi vatevaa lisamiifwa.
10Vuli mundu yamanya uvuzunu voveeye mu mwoyo gwigwe, siaveeyeho nu mundu unyala kumukonya mba.
11Inyumba yu mudamanu iladivizwa, navuzwa lihema liu mulungi lilasingila.
12Inzira eveeyeho elolekaa kuva inungi ku mundu, navuzwa ekeheri chayo nilikuza.
13Liseka likunikaa ovovereri mu mwoyo, navuzwa keheri chuvusangari nilisioma.
14Vandu vadamanu valanyora agadukanaa navo,
navuzwa vandu valahi valanyora madanyi gi likora lilahi.
15Mundu musiru asuviraa kindu choosi,
navuzwa mundu mugeri yilindaa mu ligenda lilie.
16Vandu vovogeri velehaa kutura ku vudamanu, navuzwa vandu vasiru vaveeye vugira lielinda kandi vakora vwangu vugira kuganagana.
17Mundu wuvutima vwa vwangu akolaa vindu viuvusiru, navuzwa mundu wovogeri yikuziraa.
18Avandu vatamanyi vanyoola madanyi gu vusiru vwavo, navuzwa avageri vanyola madanyi gi limanya.
19Vandu vachamu valasigamira valungi, kandi valegehiza kuvo nu kuvagoonya zimbavasi.
20Mutende yasura mudaka, navuzwa mutugi aveeye na valina vanyingi.
21Mundu uchayaa mutende weve akolaa uvwoni, navuzwa aveeye nu vugasu oyo oveeye nizimbavasi ku vadaka.
22Yavo avalohizaa uvudamanu vagotaa, navuzwa yavo avalohizaa kokora agaveeye amalahi valava nuvuyanzi kandi uvusuuvirifu.
23Nokora miyinzi vudinyu ulanyora uvukala, navuzwa nu wikala vuzwa no komoloma ulangwa mudaka.
24Vandu vageri vanyoola madanyi gi miandu, navuzwa vandu avasiru vamanyikana kigira vusiru vwavo.
25Muloli ahonyia livamwoyo lwa volaa giligali, navuzwa ulwavoraa vovehi azama vandu.
26Liitia Yahova lihaana vuluviliri kandi likinga ku mundu harara na vinyumba yeeye.
27Liitia Yahova liveeye kisinukiru chi livamwoyo; kandi liitia Yahova mundu anyala kwevendera mutego gwi likuza.
28Ovonene vwu mwami volondekanaa ku vandu va yamiha, navuzwa vugira yavo mwana wu mwami adivizwa.
29Mundu oveeye ni lihomata liu vutima aveeye ni limanya linene, navuzwa oyo oveeye nu vutima alangaminya vusiru vwivwe.
30Lilemeriza likora muviri kuva nu vulamu, navuzwa likendeka likora vigumba kuguunda.
31Mundu udambiza vadaka alegeliza Nyasaye wavalomba, navuzwa oyo oveeye ni zimbavasi ku vadaka ahaanaa luyali ku Yahova.
32Vandu vadamanu vaduuka mukivi kigira vikolwa viavo viu vuchamu vwavwo, navuzwa valungi vanyoola likingwa mu lisuuvirizwa lie likuza liavo.
33Ovogeri voveeye na vandu vaveeye nilimanya, navuzwa vasiru sivamanyi kindu kigira ovogeri mba.
34Uvulungi vokola ihiiri kuva enene ligali, navuzwa vwoni voletaa zisoni ku ihiiri yoosi.
35Avatumikiri vakora vulahi vayanziza vami vaavo, navuzwa vahaana mageri kuyavo vatakola vulahi.
©Bible Society of Kenya, 2019