ZING'ANO 13
13
Avalina Vageri Vakokolaa Kuva Mugeri
1Mwana wovogeri ahulirizaa amigizu ga baba weve, navuzwa mundu wi kirage siavugilira ndi aveeye mudamanu mba.
2Avandu avalahi valanyora madanyi ku gavavoraa, navuzwa avagaadi vamenya mukirage.
3Mundu ulindaa makuva geege, alindaa livamwoyo lilie, navuzwa oyo oveeye na makuva gavwangu alidiviza.
4Mundu mugata niyenya kindu si alakenyoola mba, navuzwa mundu mugulu alanyoola choosi chayenyaa.
5Vandu avasuuvirifu vasuura uvugadi, navuzwa makuva ga vandu avachamu gaveeye zisoni kandi gukuvihiliriza.
6Vulungi vukinga vandu vataveeye nimbala, navuzwa vudamanu vugwihizaa avoni.
7Avandu valala vekola kuva vatugi, navuzwa sivaveeye ni kindu mba. Avandi vekola kuva vadaka, navuzwa vaveeye avatugi.
8Mundu mutugi atumikiraa mabese geege kohonyia livamwoyo lilie, navuzwa si aveeyeho nu mundu utihizaa mudaka mba.
9Valungi vaveeye kuli uvulavu vwaka, na vachamu vaveeye kuli itaya isimaa.
10Liegingira si liletaa kindu, navuzwa liletaa vudinyu. Voveeye vulahi kwenya miigizu.
11Vutugi vwa onyoora mu vodoto ulavogotiza vwangu, navuzwa uyu uvungiza mu lielemeriza alava navio vinyingi.
12Lwi lisuuvirizwa litaveeyeho mwoyo gukuzaa, navuzwa lwi lienya liduukizwa likohezaa vusangali.
13Mundu uchayaa amigizu malahi yeleeteraa lidivizwa, navuzwa oyo wegehizaa ku malago alakanyoole madanyi.
14Amigizu gu mugeri gaveeye kisinukiru chi livamwoyo; galamuhononokiza kutura mu mutego gwi likuza.
15Limanya lilahi lileeta luyali, navuzwa yavo avatanyala kusuuvilwa valadivizwa.
16Mundu wovogeri aganagana kazozo imbiri wakikiri kokora kindu, navuzwa musiru alangaminya vusiru vwivwe.
17Mutumwa mudamanu aletaa vudinyu, navuzwa yavo avanyala kusuuvirwa valeta mirembe.
18Mundu otenyaa kwigizwa alava mudaka kandi alachaywa, navuzwa oyo uhuliriza miigizu alizominywa.
19Liegomba liduukiziywi liveeye lilahi mu mwoyo, navuzwa ligirung'ana kutura mu vudamanu, liveeye gi livihiririzwa ku vasiru.
20Mundu ogendaa harara na vandu vageri, agerihaa, navuzwa niiva ahambana nu muganda gwa valina vasiru, aladivizwa.
21Vudinyu volonda avoni havundu hoosi, navuzwa vandu valungi valanyora madanyi malahi.
22Mundu mulahi aleka miandu jije kuvisukulu veve, navuzwa miandu javoni jilahevwa vandu avalungi.
23Milimi ja vadaka jagehera jiveeye niviamo vinyingi, navuzwa vandu vataveeye valungi vavagaya vavuli kulima.
24Mundu utahaana amageri ku mwana veve, siyamuyaanza mba. Navuzwa oyo umuyaanza alamwigiza.
25Avalungi vaveeye niviukulia vinyingi navuzwa vachamu vamenya ni inzara kazozo.
©Bible Society of Kenya, 2019