ZING'ANO 12
12
Siunyala kwivisa inyima wuvudamanu mba
1Mundu woosi uyanzaa ovogeri avugiliraa kovoolelwa kindu keveeye kidamanu, ichakolaa navuzwa oyo usulaa kwigizwa aveeye musiru.
2Yahova ayaanza avandu avalahi, navuzwa akalagira yavo avalohizaa vudamanu.
3Uvuchamu sivuhanaa likingwa mba, navuzwa vandu valungi vasingilaa vudinyu.
4Mukali mulahi aveeye itaji kandi uvusangari kumusaza weve; navuzwa mukali oletanga zisoni kumusaza weve aveeye kuli vigumba vivie viaguunda.
5Avandu avalungi valakokolera vulahi, navuzwa vandu vachamu valenya kukugada.
6Amakuva gavandu avachamu gaveeye guvwiti, navuzwa makuva gavandu avalungi gahonyia yavo vatihizwa.
7Avandu avachamu vanyola lidivizwa kandi sivaleka visukululwi mba, navuzwa zinyumba zia vandu avalungi zihindilaa.
8Niiva oveeye mundu wovogeri, ulizominywa, navuzwa noveeye musiru vandu valakuchaya.
9Voveeye vulahi kuva mundu wakazozo uyinzilira chukulia, kuvita kwekola mundu munene navuzwa ove ninzara.
10Mundu mulungi alindaa mitugu jije, navuzwa mundu muchamu ajikoleraa vudamanu.
11Umulimi mugulu aveeye ni viukulia vinyingi, navuzwa nuvusiru kogotiza vwiyangu ku miyinzi jitaveeye ni kivuni.
12Avandu vosi avachamu venyeleriza kokora vindu vidamanu, navuzwa vandu valungi vasingira vudinyu.
13Mundu muchamu ategwa magumilwa na makuva geege mwene, navuzwa mundu musuuvirifu yituliza mu vudinyu.
14Amadanyi googo galondekanaa na makuva googo govoora na gokolaa; ulanyora gaduukanaa niive.
15Avandu vasiru vaganaganyia vuli ing'inga ndi vaveeye avalungi, navuzwa vandu vageri vahuliriza miigizu.
16Lwu mundu musiru anyoora vutima, avulomba vumanyikana vwangu. Vandu vovogeri sivalondelelaa makuva gu kuhuziriza mba.
17Lwaovolaa geligali, vulungi vwekoleka, navuzwa vovehi voletaa gataveeye amalungi.
18Amakuva madamanu gatumitaa kuli kivavi, navuzwa makuva gavoolwaa no vogeri gahonyia.
19Vovehi sivuhindila mba, navuzwa agiligali gamenya mihiga ni mihiga.
20Yavo avalohizaa vudamanu valanyora vwangu guvutima, navuzwa yavo avayinziraa vulahi valanyora vusangari.
21Si kiveeyeho kindu kidamanu chakolekaa ku mundu mulungi, navuzwa vandu vachamu vizuyi vudinyu.
22Yahova adunyiraa vavehi; navuzwa ayaanzizwaa na yavo avagumira makuva gaavo.
23Avandu vageri vakiring'ana ku gavamanyi, navuzwa vandu vasiru valandiza vusiru vwavo.
24Miyinzi midinyu jihaanaa zinguru, navuzwa kuva mugata kulakokola ove mutugwa.
25Uvuliduhu mumwoyo vutulizaho vuyanzi, navuzwa makuva malahi galakuha vusangali.
26Mundu mulungi aveeye mwimiliri wumulina weve, navuzwa inzira ya vandu vadamanu ivimiliraa ku ligota.
27Noveeye mugata siulanyora chawenyaa mba, navuzwa nuyinzira vudinyu, ulanyora ingavi.
28Uvulungi voveeye inzira yi limenya; navuzwa uvuchamu voveeye inzira yu kuzia mulikuza.
©Bible Society of Kenya, 2019