ZING'ANO 11
11
Ganaganya cho Ovola Kandi cho Okolaa
1Yahova adunyiraa vandu vatumikira vigero viuvugadi, navuzwa aveeye nuvuyanzi ni vigero viagiligali.
2Avandu vaveeye vigingiri valava mu zisoni, navuzwa liegehiza liletaa ovogeri.
3Niiva oveeye mulungi wimilirwa na giligali, navuzwa avandu vataveeye vasuuvirifu uvugadi vwavo vulavadiviza.
4Uvutugi sivulakokolela kindu kilahi ku lidiku liilio lie likuza mba, navuzwa vusuuvirifu vulakohonyia.
5Vusuuvirifu volomba livamwoyo liu mundu mulungi kuva lilahi, navuzwa mundu muchamu yeletera ligwa mwene.
6Uvulungi vohonyia yavo avaveeye vasuuvirifu, navuzwa yavo avataveeye avasuuvirifu vagumilangwa mu liegomba liavo.
7Lwu mundu muchamu akuzaa, akuzaa harara ni lisuuvirizwa lilie. Lisuuvira liavikwa mu vutugi liveeye vuzwa.
8Vandu valungi vakingwa kutura mu vudinyu. Mu vogono yivwo, vudinyu vwilaniraa vandu vachamu.
9Ivi unyala kudivizwa ni limoloma lia vandu vatamanyi Nyasaye, navuzwa vogeri vwu mundu mulungi vunyala kukuhonyia.
10Lidaala linene liveeye nu vusangali lwa vandu vaveeye vasuuvirifu vanyoola ingavi. Navuzwa lwumundu muchamu akuzaa, koveeye nisango yovuyaanzi.
11Lidaala ligwizaa linene lwavandu valungi valigasizaa, navuzwa lidivizwaa na makuva gu mundu muchamu.
12Voveeye uvusiru komoloma nu vuchayi ku vandi. Niiva oveeye novogeri, gakuduukiraa ukiring'ane!
13Mundu wizimbemba sianyala kovoolelwa agimbisu mba, navuzwa anyala kusuuvira oyo unyala kusuuvilwa.
14Ihiiri iladiva nitaveeye nu mwimiliri. Navuzwa vigizi vanyingi valeta mirembe kandi lielemeriza.
15Niiva ulalaga kutunga mugeni ligovi lilie ulasalira. Vwakaveeye vulahi uvuli kuhambana naye.
16Mukali wizimbavasi anyoora lizominywa, navuzwa mukali utaveeye ni miima milahi aveeye zisoni.
Vandu vagata sivalanyora mabese mba, navuzwa vandu vaatumikira zinguru valava vatugi.
17Mundu oveeye ni zimbavasi, aveeye nuvukara, navuzwa noveeye mululu ulisaliriza.
18Avandu vachamu sivanyoola kindu mba navuzwa nokora agaveeye amalungi, ulanyora madanyi.
19Uyu usavilaa kokora malungi alamenya, navuzwa uyu udinyiriza kokora vudamanu alakuza.
20Yahova adunyiraa vandu vaveeye ni zing'anagani zindamanu, navuzwa ayaanza yavo avakola malungi.
21Ove ni lisuuvira ndi avandu vadamanu valanyora mageri, navuzwa valungi valahononoka.
22Mukali wi ligondo utaveeye ni likalaga lilahi, aveeye kuli ebede yizahabu iviikiywi mu liulu liembizi.
23Via vandu avalahi venya vivezaa vilahi; lwa vachamu vanyoola viavenyaa, vandu vosi vavezaa nu vutima.
24Vandu valala vaatumikira mabese gaavo vugira lilohiza, navuzwa vameedeka kugwa vatugi. Vandi vahenzeriza ligali kuli vaatumikira mabese gaavo, navuzwa vagwiza vadaka.
25Ove muhaani na ulameedwa, okonye avandi, naive ulakonywa.
26Vandu valama uyu uviikaa vuswage kulindilira kuvuguliza ku vuguli vwi igulu, navuzwa vizominyaa uyu utulizaa vuswage nu kuvuguliza.
27Niiva lienya liilio liveeye lilahi ohevwa luyali, navuzwa niwenyeleriza vudamanu, ulavonyoola.
28Yavo avaviika zing'anagani ziavo mu vutugi vwavo valavunguluka kuli matu gi misaala mu ing'inga yiligesa, navuzwa valungi valazizagilira kuli matu gimisala mung'inga yumbasu.
29Mundu oletaa uvudinyu kunyumba yeeye sialanyoola kindu ing'inga ye keheri mba.
Avandu vasiru valava vayinziri va vandu avageri.
30Uvulungi vuhaana livamwoyo, navuzwa kilage kitulizaho livamwoyo.
31Avandu vaveeye valungi vanyoola madanyi gaavo mukivala yiki; kunangwa ove nilisuvira ndi vandu vachamu na voni valahevwa mageri.
©Bible Society of Kenya, 2019