ZING'ANO 10
10
Zing'ano zia Solomoni
1Yizi ni zing'ano zia Solomoni: Mwana mugeri akolaa baba weve kuva nuvuyanzi, navuzwa mwana musiru aletaa vovereri ku mama weve.
2Uvutugi vwonyoola muvuchamu si voveeye nu vukala ku ivi mba, navuzwa vulungi vulahonyia livamwoyo liilio.
3Yahova sialaleka vandu valungi vave ninzara mba, navuzwa alakinga vachamu kuvula konyoora viavenyaa.
4Uvugata vulakokola mudaka, navuzwa liyinzira nizinguru lilakokola mutugi.
5Mundu wo vogeri agesaa vitagwa lwa vietegeki kogeswa, navuzwa mundu ogonaa ing'inga yi ligesa, yiviika mu zisoni.
6Avandu valungi valanyora vugasu, navuzwa makuva gu mundu muchamu gavisaa kilage chichie.
7Lizuliza lia vandu valungi nivakakuza liveeye uvugasu, navuzwa lieta lia vandu vachamu lilivililwa.
8Avandu vovogeri vavugilira zigangani zindahi navuzwa vandu vasiru valadivizwa.
9Avandu vaveeye avasuuvirifu vaveeye mu mirembe kandi mu likingwa, navuzwa vandu vataveeye avasuuvirifu valanyooleka.
10Oyo uvisaa agiligali aletaa vudinyu, navuzwa oyo ugayaa vudamanu havulavu aletaa mirembe.
11Amakuva gu mundu mulungi gaveeye kuli kisinukiru chi livamwoyo, navuzwa amakuva gu mundu mudamanu gavisaa kilage chiche.
12Lidunya liletaa vudinyu, navuzwa vuyanzi vukunika vudamanu vwosi.
13Avandu vovogeri vamoloma makuva gi kivuni, navuzwa vandu vasiru gavadukiraa vahevwe amageri.
14Avandu vovogeri vanyoola limanya liosi, navuzwa makuva ga vasiru galetaa lidiviza himbi.
15Uvutugi vukinga mutugi, navuzwa uvudaka vudiviza mudaka.
16Amadanyi gelikola vulungi ni livamwoyo, navuzwa vwoni vuletaa vudamanu vunyingi.
17Avandu vahuliriza lwa vahevwa mageri valamenya, navuzwa yavo vatavugiliraa uvudamanu vwavo vaveeye muvudinyu.
18Uyu uvisaa lidunyira lilie aveeye muvehi; na oyo ulandizaa makuva gavuzwa aveeye musiru.
19Limoloma linyingi liletaa mahiolo, navuzwa niiva oveeye mugeri ulachiring'ana.
20Amakuva gu mundu mulungi gaveeye kuli ifeza indahi, navuzwa iziganagani ziu mundu muchamu ziveeye zia vuzwa.
21Amakuva gu mundu mulungi galakonya avandu vanyingi, navuzwa unyala kwiyita nuvusiru.
22Uvugasu vwa Yahova vulakuha vutugi, navuzwa liyinzira vudinyu si lilakokola mutugi mba.
23Voveeye uvusiru kuyaanzilira kokora vudamanu navuzwa vandu vi limanya vayanzilira kokora ovogeri.
24Avandu valungi valanyora cha venya, navuzwa avandu vachamu valanyora cha vatizaa ligali.
25Avandu vachamu valahirwa ihale lwi kiihi kiiza, navuzwa vandu vaveeye vasuuvirifu vakingwa ing'inga yoosi.
26Utaleka mundu mugata akokolere kindu mba, alakunyangiza kuli isiki kuminu googo anoho umwoki mu zimoni zizio.
27Utie Yahova na ulahindira. Avandu vachamu vakuza ing'inga yaavo ni taduuka.
28Lisuuvirizwa lia vandu valungi liletaa vusangali, navuzwa vandu vachamu sivalanyora kindu mba.
29Yahova akingaa vandu valungi, navuzwa aladiviza yavo avakolaa vudamanu.
30Vandu valungi valakingwa ing'inga yoosi, navuzwa vandu vachamu sivalamenya mukivala mba.
31Avandu valungi vamoloma limanya, navuzwa mundu omoloma vudamanu aladivizwa.
32Avandu valungi vaveeye ni limoloma lihooma, navuzwa vandu vachamu vamoloma vindu viukusaliriza.
©Bible Society of Kenya, 2019