ZING'ANO 9
9
Ovogeri nu Vusiru
1Mundu wo vogeri yumbaka inyumba yeeye, ma aviikaku zitiru saba. 2Yitaa inyama mazuganyamu mudarasini ni iwaini, ma aviikaa komesa kolomba lisavo lie lilia. 3Umali kutuma vatumikiri veve vi kikali kuzia kulangilira vandu kutura hadiguluka mu madaala: 4“Mundu woosi oveeye musiru yingiri hano!” Ku yavo avoosi utaveeye ni limanya yavoola, 5“Muuzi, mulie chukulia change kandi munwi iwaini yamali kuzuganyamu mudarasini. 6Muleke muganda gwa vandu avasiru, na mulamenya. Mulonde kunzira yilimanya.”
7Niiva ulahaana mageri ku mundu oveeye ni lielora, alakonyega. Niiva ogondokera mundu mudamanu alakusaliriza. 8Utagondokera mundu mwelori mba, alakuduunyila. Navuzwa nogondogera mundu oveeye nilimanya alakwegehizila. 9Kindu choosi chovoolera mundu mugeri kilamulomba ave mugeri ligali. Choosi chovoolera mundu mulungi kimedaa kuye limanya.
10Kutie Yahova nilitanga liovogeri. Niiva umanya oyo oveeye mutakatifu oveeye ni limanya. 11Ovogeri vulameeda mihiga kulivamwoyo liilio. 12Ivi niye onyoora uvukala niiva oveeye novogeri. Niiva mulasura ovogeri, ivi niye ulisalira.
13Mukali musiru akubaa vuzwa liyoga kandi siaveeye ni zisoni mba. 14Yikalaa hamuliango gwinyumba yeeye kandi yikalaa havundu haveeye igulu, mu lidaala 15nukulangilira vandu vavitaa avaveeye kumiyinzi jaavo. 16Avoora ku vandu vasiru “Mundu woosi oveeye musiru yingiri hano. 17Mazi gamali kwivwa gaveeye manolu. Chukulia kimali kwivwa keeye kilahi ligali.” 18Navuzwa vandu vahambanaa numukali oyu sivamanyi ndi vandu vazizaa munyumba yeeye vamala kukuza kandi vaveeye musi mwi kivala cha vakuzu mba.
©Bible Society of Kenya, 2019