MATAYO 7

Kukalagira avandu vandi

(Luk. 6:37-38,41-42)

1“Mutakalagira avandu vandi mba, gase na munyi mulakalagirwa na Nyasaye. 2Kuli mukalagiraa avandi, munyi kandi mulakalagirwa ndio; nekegero cha mugereranga mu avandi, nicho cha Nyasaye alimugerera mu. 3Kigira ki olola lusasu loveeye mumoni ya amwavo woovo, navuzwa siuganagana ku kuluku loveeye mumoni mumwo? 4Anoho, unyala kovoolera ndi amwavo woovo, ‘Amiitu, leeta ngutulizi lusasu mumoni mumwo,’ lwa ivi mwene oveeye nu luku mumoni mumwo? 5Mugadi ivi! Tuliza kutanga luku loveeye mumoni mumwo mwene; kunangwa olole vulahi kuli utuliza lusasu loveeye mumoni ya amwavo woovo.

6“Mutaha izimbwa vindu vitakatifu, gase zilagirung'ana ma zimutanduli; anoho mutasigisira zinguruvi iziluulu zienyu, gase zilaziduvagira hasi.

Usaale, wenye, wigulihizi

(Luk. 11:9-13)

7“Musaale, na mulahevwa, mwenye, na mulanyola; mwigulihizi, na mu ligulirwa kiliango. 8Kigira ku vosi usaala, ahevwa; na uwenyaa, anyoora; na uwigulihizaa, yigulirwa. 9Anoho ivwaha ku munyi, wu umwana weve amusavaa uvuchima, amuhezaa iligina? 10Anoho, naamusava isuzi alamuha enzoka? 11Niiva munyi, kali ni muveeye avadamanu, mumanyi kuhaana ku avana vinyu ivindu vilahi, Baba winyu oveeye mwigulu sialakira kuhaana ivindu vilahi ligali ku yavo vosi avateevaa kutura kuye!

12“Kulwa yaga, mukolere avandi viosi via mwenya yavo vamukolere. Yili nilio livoora lie Lilaga lia Musa na amigizu ga avaporofeti.

Kiliango keng'erere

(Luk. 13:24)

13“Mwingiri mu kiliango keveeye keng'erere. Kigira inzira izizaa hukudiviza eveeye imambararu, na kiliango chayo keveeye kigalamu; na avavitiraa mucho vaveeye avanyingi. 14Navuzwa inzira izizaa mu livamwoyo eveeye eng'erere, na kiliango chayo keveeye keng'erere; na avandu vakekeeke vuzwa avagenyoolaa.

Musaala gumanyikanaa ku makuyu gagwo

(Luk. 6:43-44)

15“ Mugerihi ku avaporofeti vo vovehi. Valaza ku munyi niviviiki zinguvu zia magondi, navuzwa mu mioyo jaavo vaveeye visalang'ongo vilulu. 16Mulavamanya ku vikolwa viavo. Avandu vanyara kwagula amazabibu ku misaala ja mafa, anoho vaagura makuyu ku matagalu? Awa! 17Kunangwa, musaala gwosi mulahi gwamaa makuyu malahi; navuzwa musaala mudamanu gwamaa makuyu madamanu. 18Musaala mulahi sigunyala kwama makuyu madamanu mba, kandi musaala mudamanu sigunyala kwama makuyu malahi mba. 19Ku misaala josi, ugutama makuyu malahi gulatemagwa nokoteevwa mu muliru. 20Kunangwa mulavamanya ku vikolwa viavo.

Si mumanyi mba

(Luk. 13:25-27)

21“Si vaveeye vosi avamboleraa, ‘Mwami, Mwami,’ avalingira mu Vwami vwu mwigulu; navuzwa ni yavo avakolaa uvulariri vwa Baba wange oveeye mwigulu veng'ine. 22Avanyingi valakambolere ku Lidiku lie likalaga yilio, ‘Mwami, Mwami! Sikwaporofeta ku lieta liilio, kandi sikwatuliza mademoni nokokola vilolekizu vinyingi mu lieta liilio!’ 23Ahene yaho ndakavavolere, ‘Si mumanyi kali hakuzu, tuli imbiri wange, munyi avakolaa vudamanu!’

Avumbaki vaviri

(Luk. 6:47-49)

24“Kulwayago, mundu woosi uhuliraa amakuva gange, naagakora, aveeye kuli mundu mugeri, uwumbaka inyumba yeeye ku lwanda. 25Imbura yakuba, imigera jizura, imbuza enene nihuza ni zinguru ku inyumba yeyo. Navuzwa si yagwa mba, kigira yaali niyumbakwa ku lwanda.

26“Navuzwa mundu ku vosi uhuliraa amakuva gange, kandi navula kugakola, aveeye kuli mundu musiru, uwumbakaa inyumba yeeye ku muyeke. 27Imbura yakuba, imigera nijizura imbuza enene nihuza, kandi nihuza ni zinguru ku inyumba yeyo, nayo yagwa, kandi liigwa liayo liali nu mufuumu munene ligali!”

Uvunyali vwa Yeso

28Lwa Yeso, yamala kovora amakuva yaga, Kiduma chagenya ligali ku amigizu geege. 29Kigira siyigiza kuli avigizi vi Lilaga mba, navuzwa yaavigiza kuli umundu oveeye nu vunyali.

Currently Selected:

MATAYO 7: LOGOOLI

Highlight

Copy