MATAYO 6

1“Heenzi vulahi, mutakola vikolwa vinyu viu uvulungi imbiri wa avandu, kigira mwenya vamulole mba. Niiva mukora ndio, Baba winyu oveeye mwigulu sianyala kumuha madanyi mba.

2“Lwa okonyaa mudaka mutevoola kuli avagaadi vakora mu masinagogi nu muzinzira kunangwa avandu vaduuki kuvizominya mba. Muvooleraa ligali, vamali konyoora amadanyi gaavo. 3Navuzwa lwa utuliza zisadaka zizio utaleka kali mulina woovo amanye chu mukono gugwo mulungi gokolaa mba. 4Uhaane ovokonyi vuvwo muvwivisu, na Baba woovo ololaa agivisa alakuha amadanyi.

Amigizu ku lisaala

(Luk. 11:2-4)

5“Lwa musaala, mutava kuli avagaadi, kigira yavo vayaanza kusaala nivasingiyi mu masinagogi kandi muvwavukaniru vwi zinzira kunangwa, avandu vavalore. Ligali muvooleraa, vamali konyoora amadanyi gaavo. 6Navuzwa lwa usaala, wingiri munyumba yooyo, ma niwakahana kiliango, usaale ku Baba woovo utalolekaa; na Baba woovo ololaa agivisa, alakuha amadanyi.

7“Kandi lwa musaala, mutavungiza amakuva manyingi ga vuzwa kuli avandu vizihiiri avatamanyi Nyasaye. Yavo vaganagana ndi Nyasaye alavahulira kigira amakuva gaavo amanyingi. 8Mutava kuli aveene yavo mba. Baba winyu amanya vindu via mwenya kali ni mukikiri ku muteeva. 9Kunangwa, gamudukira munyi musaale kuli ndi:

‘Baba wiitu oveeye mwigulu:

Lieta liilio litakatifu lizominywi;

10Uvwami vuvwo vuuzi;

uvulariri vuvwo vokolwi mu lirova kuli vokolwa mwigulu.

11Okohe lero viukulia vietu via kase.

12Ukusamihi uvwoni vwitu,

kuli kunyi kusamiiha avakwoneraa.

13Utakuhila mu magerizu mba,

navuzwa ukutulizi mu kigira uvwami, ni zinguru ni vivio, mihiga ni mihiga’ #6:13 Vitabu vindi si viameeda ku, “Kigira uvwami nu vuvwo, ni zinguru, nu vukumi, mihiga ni mihiga, Amini.”

14“Niiva munyi mulasamiiha avandu amahiolo gaavo ga vamukolera, Baba winyu oveeye mwigulu naye alamusamiiha kandi. 15Navuzwa munyi ni mutasamiiha avandi uvudamanu vwavo, Baba winyu naye si alamusamiiha uvwoni vwinyu mba.

Amigizu ku lihonga lilia

16“Lwa muhongaa lilia, mutaverera kuli avagaadi mba. Yavo vaakuunyaa mu zimoni ziavo, valoreke ku avandu ndi vaahongi lilia. Agiligali muvooleraa, aveene yavo vamali konyoora madanyi gaavo. 17Navuzwa lwa ohonga lilia, wisaave mumoni, olombe liisu wivake amaguta, 18kunangwa mundu woosi avuli kolola ndi ohongi lilia, navuzwa umanyikane ku Baba woovo utalolwa. Na Baba woovo ololaa mu vuviri alakuha madanyi.

Uvutugi vwu mwigulu

(Luk. 12:33-34)

19“Mutiviikira mavikiru mu lirova muno ahi zisere ni zisisinia ziononyia kandi aha aviivi vigulira ni viiva mba. 20Navuzwa mwiviikiri mavikiru mwigulu, ahi zisere ni zisisinia zitononyia, anoho havavula kwingira nu kwiva. 21Aha mavikiru googo gaveeye, niho hu umwoyo gugwo goveeye ho.

Uvulavu vwu muviri

(Luk. 11:34-36)

22“Emoni eveeye kuli itaya yu muviri. Emoni yooyo neveeye inamu, umuviri gugwo gwosi gulizula uvulavu. 23Navuzwa emoni yooyo neveeye indamanu, muviri gugwo gwosi gulava mu kisundi. Kunangwa niiva uvulavu voveeye mu ivi nivoveeye kisundi, kisundi yicho ne kenene ligali kuvita.

Yeso yigiza kigira kutumikira Nyasaye kandi uvutugi

(Luk. 16:13; 12:22-31)

24“Si haali nu mundu unyala kutumikira avami vaviri mba; kigira aladunyira mulala, na ayaanze wundi; anoho alava musuuvirifu ku mulala na achaye wundi. Si munyala kutumikira Nyasaye harara nu vutugi mba.

25“Yiki nicho kivuni kigira ni muvooleraa, mutahenda mwoyo ku viukulia ni viukunwa via mwenya mu livamwoyo lienyu; anoho viu kwivika via mwenya ku miviri jinyu. Livamwoyo, siliviti viukulia via vuzwa? Numuviri siguviti zinguvu? 26Heenzi amanyonyi gu muvwerefu, sigatagaa, sigagesaa, kandi sigateeraa mu kedeera choosi mba. Navuzwa kali ndio, Baba winyu oveeye mwigulu agalihizaa. Munyi muveeye avalahi ligali kugavita 27Nivwaha ku munyi mu lihenda mwoyo lilie, unyala kwemeeda ku amadiku gi livamwoyo lilie?

28“Kigira ki muhendaa mwoyo kigira izinguvu? Heenzi ku madanya gu mu milimi kuli gavirukaa. Sigakolaa miyinzi mba, kandi sigelomberaa izinguvu mba. 29Navuzwa muvooleraa, kali Solomoni mwene mu vukumi vwivwe ziosi siyaviikwa ku zinguvu zindahi kuli lilala ku madanya yaga mba. 30Kunangwa, niiva Nyasaye aviikaa ndio uvulimu vwu mu milimi, ovoveeho kalunu na mugamba vuviikwa mu muliru si alamuviika ligali, O, munyi avandu vi lisuuvira likekeeke!

31“Kunangwa mutahenda mwoyo, ni muvooraa: ‘Nakulie ki? Anoho, nakunwi ki? Anoho, nakwiviiki ki?’ 32Kigira avandu vizihiiri, avatamanyi Nyasaye, venya ivindu yivi viosi. 33Kunangwa mwenye kutanga uvwami vwa Nyasaye, nu vulungi vwivwe; na ivindu yivi viosi muladasirwa. 34Kunangwa mutahenda mwoyo ku lidiku lia mugamba, kigira mugamba goveeye na makuva gagwo. Muleke uvudinyu vwi lidiku lilala vuduukane ni lidiku liene yilio.

Currently Selected:

MATAYO 6: LOGOOLI

Highlight

Copy