MATAYO 8

Yeso atakasaa mugere

(Mar. 1:40-45; Luk. 5:12-16)

1Lwa Yeso yasulunguta kutura mu kiguru, ividuma vinene viamulonda. 2Maku umugere mulala yaza na musigamira, navoora, “Mwami, nuyanza unyala kombonyia!”

3Yeso yanyira mukono gwigwe, namudiira, navoora, “Nyenya! Ohone.” Nonoho umundu oyo yahonywa vogere vwivwe. 4Ma Yeso ya muvooleraa, “Utavoolera umundu kali mulala, navuzwa uzie, wimanyie ku musaalisi, uhaane ivihaanwa via Musa yalaga keve ekelolero ku vandu ndi umali kohonywa.”

Yeso yahonyia mutumikiri wu munene wa avasikari Varumi

(Luk. 7:1-10)

5Lwa Yeso yaali ni yingiraa mu lidaala lia Kaperinaumi, munene wa avasikari mia, Murumi, yazia kuye naamusaala, navoora, 6“Mwami, mutumikiri wange nu mulwaye wafogoya; agoni munyumba, na azunangwa ligali.”

7Yeso yamuvolera, “Ndaaza, kandi ndamuhonyia.”

8Munene wa avasikari oyo yamuvolera, “Mwami, sindukana ivi wingiri munyumba yange mba. Navuzwa vola ilikuva vuzwa, na mutumikiri wange alahona. 9Inzi kandi mbeeye umundu mukekeeke hasi ha malago ga vanene vandi avambiti, mbeeye na avasikari mia hasi ha malago gange. Nimbolera uyu, ‘Zia!’ Ma azia; nu wundi, ‘Hamba!’ Ma yaza; nu mutumikiri wange, ‘Kola kindu yiki!’ Maakora.”

10Lwa Yeso yahulira yaga, yaagenya ligali navolera avandu vaali ni vamulonda, “Agiligali muvooleraa, ngikiri konyoolaku umundu woosi mu Isiraeli oveeye ni lisuuvira kuli yili. 11Na muvooleraa, avandu vanyingi valaza kutura Ivugwi ni madioli, kandi valikala mu lilia harara na Aburahamu, Isaka na Yakobo mu Vwami vwu mwigulu. 12Navuzwa avaadukana vave mu Vwami yivwo valateevwa ichova mu kisundi. Wa valilira ni vadedeiza amiinu gaavo.” 13Ma Yeso yavolera munene wa avasikari Murumi, “Zia, gakolwi ku ivi kuli usuuviyi.”

Nu mutumikiri weve yahona ing'inga yene yeyo.

Yeso yahonyia avandu vanyingi

(Mar. 1:29-34; Luk. 4:38-41)

14Yeso yaduuka munyumba ya Petero, yanyoora, navizara Petero naagoni, nalwalaa uluhuuza. 15Yeso yadira mukono gwigwe; nu uluhuuza lwatula kuye, navuuka naamutumikira.

16Lwa gwaduuka mugolova, vamuleetera avandu vanyingi ava mademoni gaali ni gaagumira. Naye kulivoola likuva vuzwa, yaagakunga. Na yahonyia vosi avaari avalwaye. 17Yakola ndio gaduuki kuduukizwa agu muporofeti Isaya yavoola,

“Mwene yavugula ovodekeranu vwitu,

kandi yaginga uvulwaye vwitu.”

Avandu avenyaa kolonda Yeso

(Luk. 9:57-62)

18Lwa Yeso yalora ividuma via vandu ivinene ni vimukumberizi, yavolera aviigi veve vaambuki engereka wi inyanza. 19Mulala ku avigizi vi Lilaga yaza kuye, namuvolera, “Mwigizi, inzi ndakolonda hoosi aha uva nuzia.”

20Yeso yamutivulira, “Vivwi viveeye ni zimbangaywa, na amanyonyi gaveeye ni zinyumba ziago, navuzwa Umwana wa Adamu siaveeye na ahokososera mba.”

21Mulala ku aviigi veve yamuvolera, “Mwami, ombe munwa, ndange kuzia kuyavira baba wange.”

22Yeso yamuvolera, “Nonda. Leka avakuzu vayaviri avakuzu vaavo aveene.”

Yeso yakiring'anyia viguvuli

(Mar. 4:35-41; Luk. 8:22-25)

23Lwa Yeso yanina mu liato, aviigi veve vaamulonda. 24Maku, imbuza enene yahuuza munyanza, kuduuka iliato nilitanga kwiyina. Yeso yaali naagonaa. 25Aviigi vazia kuye nivamuvukiza nivavoora, “Mwami okohonyie, kudivaa!”

26Yeso yavateva, “Kigira ki munyi muveeye ni lisuuvira likekeeke?” Kunangwa, yasingira naagondokera imbuza ni nyanza, ma gwaali umulengera umunene.

27Avandu vagenya, nivavoora, “Ni mundu wa lugano ki uyu? Kali imbuza ninyanza vimuhulira!”

Yeso yahonyia avandu vaviri avaari na mademoni

(Mar. 5:1-20; Luk. 8:26-39)

28Lwa Yeso yaduuka mu kivala cha Vagadareni, ku lwangereka lundi lwinyanza, avandu vaviri ava mademoni gaali ni gagumira vaagana naye nivatura mu mulimi gwi vilindwa. Avandu yavo vaali avu kutihiza ligali, kali siyaali ho mundu waluvilira kuvita kunzira yeyo mba. 29Navo vatanga kuhanzuka nivavoora, “Koveeye ndi nivi, O, Mwana wa Nyasaye? Uzi hano kukudambiza ing'inga nikikiri kuduuka?”

30Ahimbi ahene yaho, chaliho ichayo kenene chi zinguruvi zinyingi niziaya. 31Amademoni yago gamugoonya ni gavoora, “Niiva ulakukunga okohe munwa kuzie kwingira mu ichayo chi zinguruvi zira.”

32Yeso yagavoolera, “Zii!” Kandi gaturaa mu vandu yavo, ni gaazia kwingira mu ichayo chi zinguruvi. Ichayo choosi chi zinguruvi chasulunguta zimbiru ni zigwa munyanza, ma choosi nikikuzira mu mazi.

33Avayi vi zinguruvi yizio viruka nivazia mu lidaala linene, nivavoora amakuva goosi ni vindu viekoleka ku vandu ava mademoni gaali ni gaagumira. 34Kunangwa avandu vosi vu mu lidaala yilio vaatura, nivazia kwaganira Yeso; kandi ulwa vamulola vamugoonya ligali atuli mu kivala chavo.

Currently Selected:

MATAYO 8: LOGOOLI

Highlight

Copy