MATAYO 5

1Lwa Yeso yalora viduma via avandu, yanigira mu kiguru, ni yikala; aviigi veve vaza kuye, 2na yaatanga ku vigiza, navoora:

Uvuyanzi vwi ligali

(Luk. 6:20-23)

3“Vaveeye nuvugasu avaveeye nuvudaka mu mioyo;

Kigira uvwami vwu mwigulu nu vwavo.

4“Vaveeye nuvugasu avaveeye no vovereri,

kigira valakaleminywe mioyo.

5“Vaveeye nuvugasu avaveeye avahooma,

kigira valanyora imiandu ji lirova.

6“Vaveeye nuvugasu avaveeye ninzara

kandi vuluhu vwu vulungi, kigira valigutizwa.

7“Vaveeye nuvugasu avaveeye nizimbavasi,

kigira valaverwa zimbavasi.

8“Vaveeye nuvugasu avaveeye ni mioyo milavu,

kigira valalola Nyasaye.

9“Vaveeye nuvugasu avalombi vimirembe,

kigira valalangwa avana va Nyasaye.

10“Vaveeye nuvugasu avadambizwa kigira uvulungi

kigira Uvwami vwu mwigulu nu vwavo!

11“Munyi muveeye nuvugasu lwa avandu valimunyega, nu kumukubiza ikivi nu kumuvolera zing'ano ziosi zio vovehi vudamanu kigira muveeye avalondi vange. 12Muyanze kandi musangare ligali, kigira amadanyi ginyu gaveeye amanene mwigulu; nindio vadambiza avaporofeti avaari imbiri winyu.

Umunyu kandi uvulavu

(Mar. 9:50; Luk. 14:34-35)

13“Munyi muveeye kuli umunyu gwi lirova! Navuzwa umunyu ni guzangalaye gulakolwa ndi gove ne kenosi kandi? Sigoveeye kindu kandi mba, navuzwa gulasundulwa ichova nu kuduvagwa ni virenge.

14“Munyi muveeye kuli uvulavu vwi lirova liosi! Lidaala liumbakwa ku kiguru silinyala kuviswa mba. 15Anoho avandu sivahambizaa itaya ma vagikunikira mu kihinda, navuzwa vagiviikaa komesa iduuki kumulika ku vosi avaveeye munyumba. 16Munzira ndala nzere, kuduuka uvulavu vwinyu vumuliki imbiri wa avandu kunangwa vaduuki kolola miyinzi jinyu milahi, ma vizominyi Baba winyu oveeye mwigulu.

Amigizu ku Lilaga lia Musa

17“Mutaganagana ndaaza kutulizaho lilaga lia Musa, anoho amigizu ga vaporofeti. Si ndaaza kugatuliza ho, navuzwa kugaduukiza. 18Agiligali muvooleraa, kuduuka lwi ligulu ni lirova vilihera, induguta anoho kedonye kilala kekekeeke ligali chi induguta yi Lilaga, sivinyala ligali kogota, kuduuka lwa viosi vilitwekizwa. 19Kunangwa, ku vosi ulivunaga lilago likekeeke ku goosi, nu kwigiza avandi vakole ndio, umwene oyo alakalangwe mukekeeke ligali mu Vwami vwu mwigulu. Navuzwa ku vosi uligakola nu kwigiza avandi, mwene oyo alakalangwe munene mu Vwami vwu mwigulu. 20Yiki nicho kigira nimuvoolera ndi, uvulungi vwinyu nivutavita uvwa vang'odi vi lilaga na Avafarisayo, simulakingiri mu Vwami vwu mwigulu mba.

Amigizu ku uvutima

(Luk. 12:57-59)

21“Mwahulira ndi avandu va kale vavolerwa: ‘Utiita mba! Ku mundu woosi wita aladuuka mu likalagirwa.’ 22Navuzwa inzi muvooleraa: Mundu woosi uva nu vutima na amwavo weve alakalagirwa. Uyu onyegaa amwavo weve alahilwa mu kiyaalo. Mundu woosi ovolera amwavo weve: ‘Ivi oveeye musiru,’ aveeye mu vudinyu vwu kuzia mu muliru gwe gehena. 23Lwa uhiraa kihanwa chicho ku vwali, ma wizulizi ndi amwavo woovo aveeye nu mwoyo mudinyu nivi, 24leka kihanwa chicho imbiri wu vwali, utange kuzia kusamiihana na amwavo woovo, kunangwa wirane na uhaane kihanwa chicho ku Nyasaye.

25“Lomba uvulina vwangu nu mundu ukuyalaa ni mukikiri kuzia mu kiyaalo. Nuvula kokora ndio, umusigu woovo alakuhila ku mukalagi, na mukalagi naye alakuviika mu makono gu musikari, na ivi ulavikwa mu vuhambe. 26Ligali ngovolera, si ulatula yimwo mba, kuduuka lwa utuunga esendi yu kumaliriza.

Amigizu kigira Ovoheyi

27“Mwahulira agavoolwa, ‘Utaheya mba!’ 28Navuzwa inzi muvooleraa, mundu woosi ohenza mukali ma amukayirwi, amali koheya naye mu mwoyo gwigwe. 29Niiva emoni yooyo inungi nekolomba okole uvwoni, ugitulizi, ugisiuvi ihale! Vwakaveeye vulahi ligali kuvita ivi kogotiza kilala ku vivero viu muviri gugwo, kuvita umuviri gugwo gwosi kusiuvwa mu gehena. 30Na niiva mukono mulungi gugwo ni gokolomba okole uvwoni, ugukalage, ugusiuvi ihale! Vwakaveeye vulahi kuvita ivi kogotiza kilala ku vivero viu muviri gugwo, kuvita umuviri gugwo gwosi kusiuvwa mu gehena.

Amigizu kigira likunga mukali

(Mat. 19:9; Mar. 10:11-12; Luk. 16:18)

31“Gavoolwa kandi, ‘Mundu woosi ukunga mukali weve, amuhe ibarwa yo kolekana.’ 32Navuzwa kalunu inzi muvooleraa, mundu woosi ukunga mukali weve, ni kivuni choosi nigatali kivuni chu kuvula kuva, musuuvirifu aveeye ni lihiolo liu kumukola muheyi niiva alazia lukali kandi; kandi mundu woosi oleeta mukali wakungwa akolaa ovoheyi naye.

Amigizu kigira kwisuuha

33“Mwahulira ndi kandi avandu vavolerwa vakale, ‘Utisuha ku ovovehi mba, navuzwa ukolere Yahova aga wamwisuuhira.’ 34Navuzwa kalunu inzi muvooleraa ndi mutisuuha lwa mulomba lilagana mba. Mutisuuha ku ligulu, kigira liveeye endeve yu vwami vwa Nyasaye; 35anoho ku lirova, kigira; liveeye ho viika virenge; anoho ku Jerusalemi, kigira ni lidaala liu Mwami Munene. 36Utisuha kandi ku umutwi gugwo mba, kigira siunyala kokora iliisu lilala live lilavu anoho limwamu mba. 37Makuva googo nigaveeye ‘Yee’ gave ‘Yee’ na niiva nigaveeye ‘Awa’ gave ‘Awa.’ Amakuva gandi goosi agovoola kuvita yaga gaturaa ku Mudamanu oyo.

Amigizu ku livaanza kisaalia

(Luk. 6:29-30)

38“Mwamala kuhulira gavoolwa, ‘Emoni ku emoni, kandi iliinu ku iliinu.’ 39Navuzwa kalunu inzi muvooleraa, utavaanza kisaalia ku mundu okokoleraa vudamanu mba. Mundu woosi ukwaala uluhi ku lusaya lwu mukono mulungi, oleke yaale uluhi ku lusaya lundi kandi. 40Mundu nazia kukuyaala niyenyaa kuvugura lishati liilio, umuleke avuguli likoti liilio kandi. 41Mundu naakuniga umugingili musigo gwigwe ikilomita ndala, umugingili zikilomita ziviri. 42Ukusava kindu, umuhe; kandi uwenya kweegoba ikindu ku ivi, utamwima mba.

Amigizu ga Yeso ku liyaanza avasigu

(Luk. 6:27-28,32-36)

43“Mwamala kuhulira agavoolwa, ‘Uyaanze mutende woovo, navuzwa udunyire musigu woovo.’ 44Navuzwa inzi muvooleraa, muyanze avasigu vinyu, kandi musaliri avamudambizaa, 45muduuki kuva avana va Baba winyu oveeye mwigulu. Kigira alavizaa iliuva lilie ku vadamanu na valahi, kandi akubizaa imbura ku valahi na vadamanu. 46Kigira niiva mulayaanza yavo avamuyanzaa venyine, mulanyola madanyi ki? Kigira kali avasololi vuvusuuru, vakora ndio! 47Kandi niiva muchelizaa avamwavo vinyu venyine, ku muvitiraa ki avandu vandi? Kali avandu vi zihiiri, avatamanyi Nyasaye, vakora ndio! 48Kunangwa gamudukira muve vadukanu, kuli Baba winyu wu mwigulu aveeye mudukanu.

Amigizu ku uvuhaani

Currently Selected:

MATAYO 5: LOGOOLI

Highlight

Copy