JONA 4
4
Vutima vwa Jona ni Zimbavasi zia Nyasaye
1Zimbavasi zia Nyasaye ku Nineve ziavereriza nukusinyikiza Jona ligali. 2Kunangwa yasaala ku Yahova navoora, “O, Yahova, sindavoola ningikiri kutura yengo ndi, yiki nicho icha umanya okole vuzwa? Yicho nicho chagira ningora zinguru ziosi ukwirukira mu kivala cha Tarishishi. Ndaamanya vulahi ndi, ivi oveeye Nyasaye wuvuyanzi, kandi wizimbavasi, umwikuziri ku vutima, kandi umwetegeke kugirung'ana muziganagani, kandi kuvula kuhaana mageri. 3Kunangwa O, Yahova, ngogonya oleke inzi nguzi nivulahi inzi nguzi kuvita kuva mwoyo.”
4Navuzwa Yahova yamuteeva, “Kigira ki oveeye nu vutima?”
5Jona yatura mu lidaala, nazia kolovega lwivugwi niyikara hasi. Yelombera lidiri, niyikara haasi mu chiriri chacho; nalindilira kolola kumanyaa chekoleke ku lidaala lia Nineve. 6Maku Yahova Nyasaye yalomba kitagwa chiliungu naakekola kilande igulu, kikole ichiriri ku mutwi gwa Jona, kumulomba yiituliri mu liverera lilie lidamanu. Jona yayanzizwa ligali ni kitagwa yicho. 7Navuzwa mumavwevwe, lidiku lialonda ku, Nyasaye yalaga engeeza ilie iliungu yilio, ma niliniaala. 8Lwiliuva liatura, Nyasaye yatuma imbuza yivugwi isambaa. Liuva liasamba ku mutwi gwa Jona naye yaali ahimbi kukinda. Yegomba likuza navoora, “Nivulahi inzi nguzi kuvita kuva mwoyo.”
9Navuzwa Nyasaye yavolera Jona, “Oveeye na kivuni ki ivi usinyiki kigira kitagwa?”
Jona yativura, “Ndio, kuduuka sinyiki; mbeeye nuvunyari vwosi kusinyika kali kuduuka ku likuza!”
10Yahova yamuvolera, “Ivi overereraa kitagwa cha wavula kokora ku muyinzi kali mulala, kandi kokekola kiviruki. Kitagwa yiki chaviruka vudiku vulala, kandi chaniala vudiku vwalonda ku. 11Ninzi, sigaanduukiraa kovererera Nineve, lidaala linene yilio! Kali ndio vaveeye mu navana kuvita 120,000 avataveeye nimbala yoosi kandi ni mitugu minyingi mu.”
Currently Selected:
JONA 4: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
