ISAYA 28
28
Lieganihiza ku vwami vwa Ivaale
1O, vayaayi, kivi keveeye ku vwami vwa Isiraeli! Uvukumi vwavwo vukamulukaa kuli kimuli ku mitwi javimiliri vaavo vahambiku. Mitwi jaavo juluyayi jivakiywi maguta gafunyaa mwayu, navuzwa vaagoni hene yaho avahambiku kuvita kegero. 2Yahova aveeye nu mundu mulala Wuvunyali kandi wizingulu wetegeki kuvingilira uyu uliizaa kuli imbura ya magina, kuli imbura yologelera, kuli kiihi cha mazi manene ganyagulaa vwangu vwangu, na alavazooma hasi nukuvaguuta. 3Itaji yi lielola lia vimiliri vahambiku va Isiraeli, iladuvagirwa hasi ni wivirenge. 4Uvukumi vukamulukaa vwa vimiliri vuluyayi yavo vulatula ho kuli makuyu gukutanga gi ligesa, agagulwa nukuliivwa nigakenga.
5Lidiku liizaa lwa Yahova Wuvunyali alakave kuli itaji yuvukumi vwikimuli kigira avandu veve avalihononoka. 6Alakahaane zing'anagani zie likalaga lirungi ku yavo avatumikaa kuli vakalagi, na uvuluviliri ku yavo avakingaa virivwa via madaala manene kutura ku lingilirwa.
Isaya na vaporofeti vahambiku Vivuyuda
7Kali vaporofeti navasaalisi vaveeye vahambiku ligali kali vagenda nivayekayeka vanweeye iwaini namalwa malulu kali vikigitara mugoyana. Avaporofeti vaveeye vahambiku ligali kali sivanyala kumanyiriza malola ga Nyasaye atumaa mba, na vasaalisi navo kandi vaveeye vahambiku ligali kali sivanyala kukalaga viyaalo viletwaa kuvo mba. 8Zimesa ziosi aha viikara ziizuyi maluki, na sihaveeye ho na havundu hanifu hatigaye mba.
9Vililira kigira inzi. Vavoola, “Mundu ula aganagana yigizaa vwaha? Nivwaha wenyaa makuva geege? Gaveeye malahi vuzwa ku vana vadoto avamali kolekera kunuuna! 10Agerizaa kukwigiza induguta ku induguta, luvaso ku luvaso, liegizu ku liegizu.”
11Niiva simulambuliriza, hene yaho Nyasaye alatumikira avandu vageni avamoloma zinimi zihulilikaa kuli zing'eni kumwigiza agamuduukira kumanya. 12Yahaana vosoosi ni lielemeriza ku munyi mwosi, navuzwa mwasuura kumuhulira. 13Yicho nicho kivuni kigira Yahova azizaa kumwigiza induguta ku induguta, luvaso ku luvaso, liegizu ku liegizu. Maku mulikigitala ku vuli kika cha muduukaku; mulaatwa zing'oma, mulahambwa mu mitego, kandi mulahilwa mu vuhambe.
Ligina liu mukoona lia Ziyoni
14Kalunu munyi vigingiri avamihaa hano mu Jerusalemi kaluhu, muhuliri icha Yahova avoora: 15“Mwiyizominyaa ndi mwalomba lilagana liuvuhambani ni likuza, mwalomba livugilirizana ni kivala chavakuzu. Lwikivi kiiza sikilakakudiiri mba, kigira mwasuuvira mu vovehi nuvugadi kuva chukwivisamu chiinyu.” 16Yiki nicho cha yahova Wuvunyali avoora:
“Mbikaa musingi mudinyu kandi gwizingulu mu Ziyoni. Mbikaa ligina liu mukoona lidinyu ligali ukwa makuva yaga gang'odwa, ‘Lisuuvira liveeye liezingulu liveeye liokwikuzira kandi.’ 17Likalaga lirungi lilava mugoye gwi kibimu chu musingi na uvusuuvirifu vulava kibimu chi kabiro yagwo.”
Imbura yamagina ileeya ovovehi vwosi vwa musuuviraa mu na migelera gilononyia liekinga lienyu liosi. 18Hene yaho, lilagana lia mumali kolomba nilikuza lilatulizwa ho, na livugilirizana lia mulombi ni kivala cha vakuzu lilatulizwa ho. Lwikivi kiduukaa, mulaguutwa ligali. 19Kilamuduya vuli ing'inga, vuli mugamba. Kuduuka mwikuziri kucho mbasu nuvudiku. Vuli likuva lihia kutura ku Nyasaye lilakaleete uvutihizi vonene! 20Mulakave kuli mundu mu zing'ano, ogerizaa kogona mu kidali keveeye chimbi gidi kuye kali sianyala kwiinyira vulungi kucho mba, numulingedi gutaveeye muvambalalu kali sianyala kwifuma mba. 21Yahova alakalwaane kuli yakola ha kiguru cha Perazimu kandi mu livona lia Gibeoni, kunangwa aduuki kokora icha yenya kokora - kali vikolwa vivie niviveeye viokogenyia. Alatwekiza miyinzi jijie jokogenyia.
22Mutaseki lieganihiza lia muheezaa mba! Niiva mulakola ndio, vulave vudinyu ligali ku munyi kohononoka. Mali kuhulira litovola lia Yahova Wuvunyali aganagana kudiviza kivala choosi.
Ovogeri vwa Nyasaye
23Muhuliri icha mboraa; mutegize matu ligali ku ga muvooleraa. 24Siaveeye ho nu mulimi uzizagilira vuzwa kulima milimi jije nukujetegekiza kutaga mba. 25Lwu mulimi amali kuvuusa milimi jije vulahi, amiizaa vuguza vwi zinguza kuli zimbindi ni idania. Atagaa zimbaso zie ingano kandi atagaa zing'ano kuzindulu zie milimi jije, zindi ziuvuswage. 26Amanyi vulahi kuli anyala kokora miyinzi jije, kigira Nyasaye yamala kumwigiza. 27Siatumikilaa kigulumi kilitu ukuhuula zimbindi anoho uvuguza vwi idania mba; mu vogono yivwo atumikiraa zisaala zinyangu ziduukanaa. 28Siaduvulanyia ingano ku lizizagilira kuhuura vugira kolekera, kandi yamanya kugihuula mu livitizira ku ligare lie zing'ombe vugira kusionolanyia. 29Ovogeri yivu vwosi vuturaa ku Yahova Wuvunyali. Ovolohizi vwa Nyasaye voveeye vwokogenyia kandi vogeri vwivwe voveeye vuduukiru ligali.
©Bible Society of Kenya, 2019