ISAYA 29
29
Lidivizwa lia Jerusalemi
1Jerusalemi! Jerusalemi! Lidaala linene lia Daudi, kivi keveeye ku munyi! Leka muhiga gundi anoho giviri jiviti, harara ni lilia kandi masavo gajio, 2maku kandi Nyasaye alaleeta ikivi ku lidaala linene lilangwa “Uvwali vwa Nyasaye.” Halakave ho ni lilira kandi nilisioma, na lidaala linene liosi lilakave kuli uvwali vukunikiywi na masahi. 3Nyasaye alingilira lidaala linene alalikumbiriza nu kuduywa. 4Jerusalemi lilava kuli kigingi kegerizaa komoloma kutura musi mu marova, umwoyo gwu kung'ung'ula ugutulaa mu luguchi.
5Jerusalemi, vageni vosi vakwingilira valahuuzwa ihale kuli luguchi, na amahi gaavo gukutihiza galatura ihale kuli mukuuzi. Nonoho vugira kumanya, 6Yahova Wuvunyali alamusoola ni zinguba ziukutihiza kandi nilidegera lie lirova. Alatuma kihuzuzi chi kiihi kandi olomemo lwu muliru. 7Maku, mahi goosi gi zihiiri zingiliraa lidaala linene liu vwali vwa Nyasaye, ni viugi viavo via mahi, ni viju viosi - ivindu viosi - vilakatulizwi ho nokogota kuli maloto, kuli kindu kiganaganiywi mu vudiku. 8Zihiiri ziosi zivuganaa harara kwingilira Lidaala linene lia Jerusalemi, zilava kuli mundu oveeye ninzara alootaa ndi alizaa, na lwa vuuka aveeza nakikiri ninzara, anoho kuli mundu ukuza nuvuluhu alootaa ndi anwezaa mazi, na lwavuuka nakikiri nuvuluhu vonene mwing'oti ni mwumi.
Kuvula kuhulira amiganihizu
9Muzizagiliri kuva avasilu! Muzizagiliri kuva avavoku! Muhambiki vugira kunwa iwaini! Mwagenda muyekayeka vugira kunwa engelageriza yiwaini! 10Yahova umali kumukola mutengeze kwetegeka kogona zindoolo zinene ligali. Avaporofeti vaduukana vave zimoni zia vandu, navuzwa Nyasaye uvavakurizi. 11Kivuni cha vuli lilola liovoporofeti kilaviswa ku munyi; kilava kuli kitabu kevoheywi nu kuvikwa ku muhuri. Niiva ulakihira ku mundu umanyi kosoma na umuteeve akosomere, alakovolera ndi sianyala kukesoma mba kigira kivikiywi ku muhuri. 12Niiva ulahila mundu utamanyi lisoma na umuteeve akosomere alakutivulira ndi siamanyi kosoma mba.
13Yahova yavoola, “Avandu yava vavoola vaasigamira, navuzwa makuva gaavo gaveeye vugira kivuni, na mioyo jiavo jiveeye ihale kutura ku inzi. Idini yavo eveeye vuzwa malago gavandu ni miima ja vandu vigiza, makuva ga vaagumilira mumutwi. 14Kunangwa ndagosa avandu yava na maduywa galondekanaa vugira yavo kumanya. Yavo avaveeye vageri valagirung'ana kuva avasiru, na ovogeri vwavo vwosi vulava uvutakoonya kindu kali hakuzu.”
Lisuuvirizwa ku madiku gaazaa
15O, vayaayi, kivi keveeye ku munyi, avavisaa lienya liavo ku Yahova! Vakora gaveenya mu kisundi ma vaganagana ndi siaveeyeho numulala unyala kuvalola anoho kumanya agavakola mba. 16Vatung'aminyaa kindu choosi. Ni kiliha ekeveeye kenene, umulongi anoho lidohi? Kindu chu mundu yalomba, kinyala kumuvolera ndi, “Ivi siwanomba mba?” Anoho kinyala komuvolera ndi, “Ivi siumanyi ichokolaa mba?”
17Itigaaye ig'inga engekeeke vuzwa, umulitu munene gwa Lebanoni gulagirung'anywa kuva mulimi mugunamu, na umulimi mugunamu gwi viamo gulava mulitu.
18Lwalidiku yilio liduka, avahana matu valahulira kitabu nigisomwaa, na avavoku avaamenyaa mu kisundi, valigulika zimoni nokolola.
19Avahocha valasangala vuhia mu Yahova; avadaka valasangala mu Nyasaye Umutakatifu wa Isiraeli. 20Kilava keheri cha yavo avadambizaa avandu vandi kandi vachaya Nyasaye. Vosi avakolaa uvwoni valakadivizwi. 21Nyasaye aladiviza yavo vavehera avandi, yavo vaagirung'anyia amageri gahevwa vandu vadamanu, kandi yavo avavolaa vovehi ukwigalira avandu vasuuvirifu vavuli konyoora likalaga lirungi.
22Kunangwa kalunu Yahova, Nyasaye wa Isiraeli, uwahonyia Aburahamu kutura mu vudinyu, avoora, “Avandu vange, simulava esoni kandi mba, kandi mu moni mwinyu simulagalula ni zisoni mba. 23Lwa muloraa avana va ndimuha, hene yaho mulamanya ndi, Inzi mbeeye Nyasaye, Mutakatifu wa Isiraeli. Mulaamba luyali nukutia inzi ligali, 24Avandu vasiru valiiga kumanyiriza, kandi yavo avililiraa kazozo valayaanza ukwigizwa.”
©Bible Society of Kenya, 2019