ISAYA 27
27
1Lidiku yilio Yahova alakatumikiri kivavi chiche chugi chi zinguru kandi chukwita kuhaana mageri ku Leviazani, goyoka gwisiitasiitaa, ooveeye gunyama gonene gwukutihiza gomenyaa munyanza.
2Lidiku yilio, Yahova alakavoole ndi, “Mwimbi lwimbu kigira mulimi gwange mulahi gwa mazabibu! 3Inzi Yahova mbeeye mulindi wagwo kandi ngusamaa amazi zing'inga ziosi, ngulindaa vudiku numbasu gase mundu alagwononyia. 4Simbeeye nu vutima ni kizabibu zana mba. Niiva amafwa ni vigunzanguva kingiliyi kizabibu! Inzi ndakalwaani navio nukuvisamba viosi. 5Navuzwa niiva avasigu va vandu vange valeenya likingwa kutura ku inzi, leki valombe mirembe ninzi. Yee, leki valombe mirembe ninzi.”
6Mu madiku gaaza avandu va Isiraeli, visukululwi via Yakobo, valahila imiri hasi kuli musaala, kandi valalaviza kimuli nukusivuka. Lirova liliizula makuyu garamaa.
7Yahova akiri kuhaana mageri malulu ku Isiraeli kuli yahaana ku vasigu vaavo, kandi vakikiri kogotiza vasaza vanyingi mu vulwani kuli vasigu vaavo vagotiza. 8Yahova yahaana mageri ku avandu veve lwa yavahila mu livahaminywa. Yaavatulizaho mu imbuza yi kivi kutura Ivugwi. 9Navuzwa uvwoni vwa Isiraeli vulakasamifwi vuzwa lwa magina guvwaali vwi vifananyi galisievwa kuli ichoka, kandi uvwali vwi vimuli anoho vifananyi viu munyasaye wikikali Ashera vilivula kulekwa.
10Lidaala linene liembinga litigaye mang'anye. Liing'anyiywi kuli ligendanyama iliere. Ligwiyi uvwayiru vwi mitugu, aha ginyala kososera nukwaaya. 11Zisia zie misaala ziayuma kandi ziavunika na avakali vazitenyaa kuli iziingu. Kigira avandu si vamanyi kindu mba, Nyasaye mulombi wavo sialavavera zimbavasi mba.
12Lidiku yilio, kutura ku mugera gwa Efurate kuduuka ku lwako lwa Egebeti, Yahova alavungiza avandu veve sa mulala, kuli mundu yahulanyia ingano kutura ku mukuzi.
13Lwilidiku yilio liliduuka, kisiriva kilakakubwi ukulanga avandu vosi va Isiraeli avaari nivahaminyirwa mu vivala via Asiria na Egebeti, viirane. Valakaze kusigamira Yahova mu Jerusalemi, ku kiguru chiche kitakatifu yiki.
©Bible Society of Kenya, 2019