ISAYA 16
16
Uvudinyu Vunyingi ku Moabu
1Avandu va Moabu vaatuma vihaanwa vie vimeme via magondi kutura mu lidaala lia Sela liveeye mu changalangwi ku uyu uwamihaa mu Jerusalemi. 2Avakali va Moabu valindilira ku lujinga liumugera gwa Arinoni nokovoyavoya yiyi na yiyi, kuli manyonyi gakungiywi kutura ku viduku viago.
3Vavoolera avandu vi Ivuyuda, “Mukovolere icha kokora. Mukukingi kuli musaala guhaanaa ichiriri kikindu mu vuhiu, inyinga yu mbasu hagati, na muleke kosose muchiriri chienyu. Kunyi koveeye avahaali, mukuvisi humundu atakonyoola. 4Muleke komenye mu kivala chienyu. Mukukingi kutura ku yavo avenyaa kukudiviza.”
Lidambizwa ni lidivizwa vilahera, na yavo avononyia kivala valatura ho. 5Maku mulala ku visukululwi via Daudi alava mwami, kandi alamiiha avandu nu vusuuvirifu kandi nuvuyanzi. Alava mwangu kokora agaveeye malungi, kandi alalola ndi likalaga liuvulungi likoleywe.
6Avandu vi Ivuyuda vavoola, “Kumali kuhulira kuli avandu va Moabu vaveeye avigingiri. Koveeye nilimanya ndi vaveeye nikirage kandi avelori; navuzwa lievoola liavo liveeye liavuzwa.”
7Avandu va Moabu valasioma kigira uvudinyu vwavaveeye navwo. Vosi valasioma lwaviizuliza viukulia vilahi ligali viavaliizaa mu lidaala linene lia Kiri Hareshezu. Vosi vaali vugira lisuuvirizwa. 8Milimi giveeye himbi Heshiboni ni mizabibu ja Sibuna viononyiywi. Iwaini ya mazabibu yaga yakola avami vi zihiiri kuhambika. Ku ing'inga indala vizabibu vialanda kali kuduuka mu lidaala linene lia Jazeri kandi kuduuka Ivugwi wi changalangwi, kandi Imadioli kolovega lundi lwi Inyanza yi Jumbi. 9Kalunu siomeraa mizabibu ja Sibuna kuli siomeraa Jazeri. Maliga gange gidorokaa kigira munyi madaala ga Heshiboni na Eleyale, kigira sihaveeye ho niligesa kokora avandu Vasangale mba. 10Avulaho ho nu mundu uhanzuka anoho wimbaa mukizabibu. Avulaho uminaa mazabibu kolomba iwaini; lihaanzuka liuvusangali liheri. 11Kunangwa, siomeraa Moabu na Kiri Heresi novovereri vonene ligali. 12Avandu va Moabu valuhiziywi ligali nivazizaa ku vigulu viavo viukusigamira vanyasaye kandi mu matemberi gaavo kusaala, navuzwa sivilavakonya kali hakuzu mba.
13Yili nilikuva lia Yahova yahaana kigira avandu va Moabu mu madiku gaavita. 14Kandi kalunu Yahova avoora, “Mu mihiga jivaga vutugi vonene vulagota. Ku vandu vanyingi va Moabu, ni vakekeeke vuzwa valitigala mwoyo; kandi valava avadedekere.”
©Bible Society of Kenya, 2019