ISAYA 15
15
Nyasaye aladiviza avandu va Moabu
1Yili ni likuva lia Nyasaye kigira kivala cha Moabu.
Madaala manene ga Ari na Kiri gadiviziywi mu vudiku vulala, kandi kisundi kikuniki kivala cha Moabu. 2Avandu va Diboni vanina ku kiguru ukusiomera hatakatifu haavo. Avandu va Moabu vakuba zikwiri mu vovereri kigira Nebo kandi Medeba; vaavegi mitwi ni zinderu ziavo mu vovereri vonene. 3Avandu vaveeye mu zinzira viviiki zinguvu zia magunia. Ku visegese vie zinyumba kandi hagati ha madaala manene avandu vasiomaa nukulira. 4Avandu va Heshiboni na Eleyale valira vudinyu kandi lilira liavo linyala kuhulilika ihale ligali kuli Jahazi. Kali avasikari vi liihi vadegeye ligali mu vuti. Vuluviliri vwavo vogoti. 5Mwoyo gwange guliliraa Moabu! Avandu virukiyi mu lidaala lia Zoari, kandi kuduuka Egilazi Shelishiya. Valala vanigira kunzira izizaa Luhizi, nivasioma lwa vaziza; valala virukira Horonaimu nivasioma ligali. 6Amazi gu mugera gwa Nimuraimu gakami, uvunyasi voveeye ku lujinga lwagwo vuniaye; uvulimu vwumi sikeveeye ni kindu kivisi sikitigaye ho mba. 7Avandu va Moabu vaambuka Livona lia Wilosi nivagerizaa kwiruka ni miandu josi ja avaveeye najo.
8Havundu hoosi ku zinzako zia Moabu, mwoyo gwi lilira linene guhulilikaa. Guhulilikaa mu madaala ga Egilaimu na Beerelimu. 9Amazi gi lidaala lia Diboni gizuyi masahi; navuzwa Nyasaye alameda maduywa ga vandu va Diboni. Yee, halava niliitwa linene lia vuli mulala utigala mwoyo mu Moabu; na yavo avagerizaa kwiruka, nizisimba zilaviita.
©Bible Society of Kenya, 2019