ISAYA 17
17
Nyasaye alakahaane mageri ku Siria
1Yahova yavoola, “Damasiko sililava lidaala linene kandi mba. Lilava vuzwa kitumi chi vianyi. 2Madaala manene ga Siria galang'anywa mihiga ni mihiga. Galava vwayiru vwa magondi ni zing'ombe, na sihaveeye ho numulala uvikunga mba. 3Zimbinga ziukuhalira mu zilatulizwa ho mukivala cha Efuraimu. Zinguru ziuvwami vwa Damasiko zilahera; Avandu va Siria avalitigala valava kuli uvukumi vwa vandu va Isiraeli, Inzi Yahova Wuvunyali mali kovora.”
Nyasaye alakahaane amageri ku Isiraeli
4Yahova yavoola, “Lidiku liizaa lwa ovonene vwa Isiraeli vulahera, na uvudaka vulavugula vogono vwu vutugi vwavo. 5Kivala cha Isiraeli kilava kuli mulimi gwuvuswage kotema ma vogeseywi, kilava mang'anye kuli mulimi mu livona lia Refaimu lwi viangala vimali kodoolwa nukutigara umwere. 6Avandu vakekeeke veng'ine valatigala mwoyo, na Isiraeli alava kuli musaala gwa muzeituni ugwa makuyu goosi gamali kwagurwa nigataveeye gavili anoho gavaga gatigaye ku lusia lwa higulu ligali, anoho makekeeke agatigaye ku zisia zia haasi. Inzi Yahova Nyasaye wa Isiraeli mali kovora.”
7Lwi lidiku yilio liliduuka avandu valagirung'ana kwenya vokonyi kutura ku Mulombi wavo, Nyasaye Mutakatifu wa Isiraeli. 8Sivaleereda kandi ku vwali vwa valomba na makono gaavo mba; anoho kusuuvira mu vusiza vwa makono gaavo mba. Viveeye vuzwa vifananyi viu munyasaye wikikali Ashera kandi uvwali vwu kusambira ku vimuli.
9Lwi lidiku yilio liliduuka, madaala manene agakingwa vulahi galang'anywa, kandi galalekwa vuzwa ivianyi kuli madaala manene aga vandu va Hivi na Amori valeka lwa viiruka kutura ku vandu va Isiraeli.
10Isiraeli, mumali kwivilira Nyasaye Umuhonyia kandi Umukinga kuli lwanda lwi zinguru. Mu vogono yivwo, musimikaa misaala mu milimi mitakatifu kunangwa muduuki kusigamira munyasaye mugeni. 11Navuzwa kali niiva jaamera nukulaviza vimuli mugamba mulala mwere lwa wajisimika, kali sihalava niligesa mba. Halava vuzwa nuvudinyu vweng'ine kandi mulasalira uvuzunu vutanyala kohonywa.
Nyasaye akingaa vandu veve
12O, Muriviti munene gwi zihiiri goveeye kuli lihuma lie inyanza! O, lihuuma lia vandu liveeye kuli viguvuli vienyanza enene. 13Mahi gi zihiiri gaaza kuli muriviti gwa mazi manene, navuzwa Nyasaye alagagondokera nago galiirukira ihale ligali. Galakungwa kuli mukuuzi ku vigulu imbiri wi imbuza ihuuzaa; valakungwa kuli luguki luhilwa ni kihuzuzi. 14Valeta vutihizi vonene hamugorova, navuzwa vaatura ho mugambazuri. Yiki nicho keheri cha yavo avalanyaa miandu jietu; kandi kidieli cha yavo avakunuulaa kivala chietu.
©Bible Society of Kenya, 2019