ISAYA 11
11
Uvwami vwi mirembe
1Avinyumba yu vwami vwa Daudi vaveeye kuli umusaala gumali kotemagwa; navuzwa kuli visivu visivukaa kutura ku kitinya, nindio mwami muhia alasingira kutura hagati hi visukululwi via Daudi.
2Roho wa Yahova alava harara naye.
Roho wovogeri ni limanyiriza;
Roho wukwidera kandi wizingulu,
Roho wilimanyiliza kandi wukutia Yahova.
3Alasangalira mu liitia Yahova,
sialakalagira mundu ku lihenza ligondo
anoho kolondekana ku aga ahuliiyi mba.
4Alakalagira avadaka nuvulungi kandi alakinga avatinyaliza nuvulungi.
Ku likuva lie lilaga lilie, avandu valahevwa mageri,
kandi avandu vadamanu valitwa.
5Alamiiha avandu veve nuvulungi kandi nu vusuuvirifu.
6Vivwi na magondi vilamenya harara mu mirembe,
kandi iziingo zilagona hasi harara nizimbuli.
Ivimooli nizisimba vilaaya harara;
kandi avana vakekeeke valavilinda.
7Zing'ombe niziduba zilaaya harara,
kandi ivimooli viazio vilagona hasi kosoosa harara mu mirembe.
Zisimba zilaaya uvulimu kuli zing'ombe.
8Kali umwana sialasalirizwa niiva alakina ahimbi ne enzoka yuvusungu vululu.
9Ku Ziyoni, kiguru kitakatifu cha Nyasaye,
sihalava nikindu chukusaliriza anoho kidamanu.
Kivala kilizula limanya lia Yahova
kuli zinyanza zizura amazi.
Avandu vaahaminywa valirana
10Lidiku lizaa lwu mwami muhia kutura munyumba yu vwami vwa Daudi alava kelolero ku zihiiri ziosi. Valavunga harara mu lidaala lilie liu vwami nukumuha luyali. 11Lwa ilidiku yilio liduka, Yahova alakatumikiri zinguru zizie kandi koleta avandu veve yengo, avandu vaatigara mu kivala cha Asiria na Egebeti, kandi muvivala via Panzurosi, Ezopia, Elamu, Babiloni; Hamazi, kandi kutura mu visulu vie inyanza. 12Yahova alasingiriza kelolero chebendera ukumanyia zihiiri ndi avungiza avandu veve harara ulwa kaviri, avandu vasalanywa va Isiraeli ni Ivuyuda, na aviiranyiaa kutura mu zikona zine zie lirova.
13Uvwami vwa Isiraeli sivulakendekera uvwami vwi Ivuyuda kandi mba, kandi Ivuyuda silava musigu wa Isiraeli kandi mba. 14Vombi harara vatangilira Avafilisitia ku lovega lwi madioli nukulanya avandu vamenyaa ku lovega lwi Ivugwi. Valaguuta avandu va Edomu na Moabu, kandi avandu va Amoni valavatia. 15Yahova alakaminya amazi mu mukono gwi inyanza ya Egebeti, kandi alaleeta imbuza imbiu kukaminya mugera gwa Efurate. Alagwavukanyia mu togera saba, kunangwa avandu vaduuki kwambuka. 16Kandi halavaho ninzira enene kutura Asiria kigira yavo vandu veve Isiraeli avatigara mwoyo, kuli gaali ku avaguuga vaavo lwa vaatura Egebeti.
©Bible Society of Kenya, 2019