ISAYA 10
10
1O, Vayaye kivi keveeye ku munyi! Munyi avalomba amalago kuva amachamu nu kudambiza avandu vange. 2Mukora ndio kunangwa muduuki kwigalira avadaka vavuli konyoora uvulungi vwavo, kandi vavuli konyoora likalaga liu vulungi. Nindio mukoraa muduuki kuvugura miandu ja vakunzakali na vavisandu. 3Mulakakole ki lwa Nyasaye alimuha amageri? Mulakakoleki lwa aleetaa kivi kumunyi kutura mu kivala chi ihale? Mulirukira ku vwaha konyoora ovokonyi? Mulakavise hayi vutugi vwinyu? 4Munyi mulakitilwi muvulwani anoho mulakahilwi kuli avahambe. Kali ndio uvutima vwa Yahova si vulahera mba, navuzwa alanyira mukono gwigwe kuhaana amageri ku munyi.
Nyasaye atumikiraa mwami wa Asiria kuli imbimbu
5Yahova yavoola, “Ivi Asiria! Ndumikila avandu va Asiria kuli imbimbu kuhaana amageri kuyavo avambeeye nu vutima navo. 6Nduma avandu va Asiria kuzia kwingilira ihiiri ya vandu vataveeye na Nyasaye, avandu vaangora kuva nu vutima. Mbatumaa kuzia kulanya nu kwiva kandi kuduvagira vandu hasi kuli madohi kuzinzira.”
7Navuzwa mwami wa Asiria aveeye ni lilohiza lilie umwene liu vutindi mu zing'anagani zizie. Umali kusaavira kudiviza zihiiri zinyingi. 8Aveeye ni liegingira kovora ndi, “Avanene vange vosi vaveeye avami! 9Mali kuguuta amadara manene ga Kalino, Karikemishi, Hamazi, Aripadi, Samaria na Damasiko. 10Ndaanyiira mukono gwange kuhaana amageri ku vwami vusigamiraa vifananyi viveeye vinyingi ligali kuvita via Jerusalemi na Samaria. 11Mali kudiviza lidaala linene lia Samaria, harara ni vifananyi vialio. Kandi ndakora malala mere ku lidaala linene lia Jerusalemi harara ni fananyi via vasigamira.”
12Navuzwa Yahova avoora, “Lwa inzi mala miyinzi jange ku kiguru cha Ziyoni ni mu Jerusalemi, ndahaana amageri ku mwami wa Asiria kigira lielola lilie liosi kandi liegingira lilie liosi.”
13Mwami wa Asiria yigingira nokovoora ndi, “Mali kokora yaga goosi inzi mwene. Inzi mbeeye ni zinguru kandi mugeri wi limanyiriza. Mali kutulizaho zinzako hagati hi zihiiri, kandi mali kuvugura uvutugi vwavo kutura mu mavikiru gaavo goosi. Mali kuduvagira hasi avandu vamenyi yo kuli igiriki, nu kuvatuliza ku zindeve ziu vwami. 14Zihiiri zie kivala ziali kuli inyumba yi linyonyi, na ndavungiza uvutugi vwavo kuli amavuyu gaali ni galekeywe. Si lialiho kali lilala iliali linyala kuburuka mba, anoho iliali linyala kukunula munwa gwalio nu kunzulira!”
15Navuzwa Yahova avoora, “Imbaazi inyala kwevoora kuva enene ligali kuvita umundu ugitumikiraa? Musumeno gunyala kuva nilizominywa kuvita mundu ugutumikiraa? Imbimbu si inyala kuginga mundu mba, navuzwa mundu agingaa imbimbu.”
16Kigira yaga, Yahova Wuvunyali alatuma lukuzu kuhaana amageri ku yavo avaveeye avatugi kandi avalizaa vulahi. Miviri jaavo jilasaambwa nu muliru gwolomemo. 17Nyasaye, uvulavu vwa vandu va Isiraeli, alava kuli umuliru. Nyasaye Mutakatifu wa Isiraeli alagwa olomemo, ulusaamba vindu viosi kali amafwa kandi zindavati mu lidiku lilala. 18Yahova aladiviza ligali militu milahi kandi milimi migunamu, galava kuli uvulwaye uvudamanu vwitaa umundu. 19Misaala mikekeeke ligali ju mulitu jilatigala kali ju mwana mukekeeke anyala kuvaliza.
Avandu vakekeeke valilana kutura mu Lihaminywa
20Ing'inga yizaa lwa vandu va Isiraeli vatigara kandi avahononoka valakavuli kusuuvira ihiiri yaali himbi kuvadiviza. Valakaviki lisuuvira liavo ku Yahova, Nyasaye Mutakatifu wa Isiraeli. 21Vakekeeke ku vandu va Isiraeli valirana ku Nyasaye wavo wi zinguru. 22Kali niiva kalunu avandu va Isiraeli vaveeye vanyingi kuli umuyeke gu munyanza, vakekeeke vuzwa kuvo valirana. Lidiviza liveeye ho ku vandu, kandi lidukanaa ligali. 23Yahova Wuvunyali alaleeta lidiviza mu kivala choosi kuli yavoola alakora.
Yahova alahaana amageri ku vandu va Siria
24Mwami munene Yahova Wuvunyali avooreraa avandu veve vamenyi mu Ziyoni ndi, “Mutatia kigira avandu va Asiria mba, kali niiva vamudambizaa kuli avandu va Egebeti vamudambizaa. 25Ku ing'inga engekeeke, lihaana mageri liange ku munyi lilahera, maku ndavadiviza. 26Inzi Yahova Wuvunyali, ndavakuya ni imbimbu yange kuli ndaakuya avandu va Midia ha lwanda lwa Orebu. Ndahaana amageri ku vandu va Siria kuli ndaakola ku vandu va Egebeti. 27Lwa ing'inga yeyo iduuka, ndamuvoholora kutura ku zinguru zia vandu va Siria, na iniira yaavo silava nuvuliduhu ku mavega ginyu mba.”
Musigu yingiliraa lidaala linene lia Ayazi
28Liihi lia vasigu ligumiye lidaala linene lia Ayazi! Vavitiye mu Migironi! Vaaleki miandu jaavo ha Mikamashi! 29Vamali kwambuka inyambuku, na vaziiye konyoora lisosa lia vudiku ha Geba! Avandu mu lidaala lia Rama vaveeye nu vuti, kandi avandu mu lidaala lia Gibea liu mwami Saolo vamali kwiluka. 30Umukubi lwanga, O, munyi avandu va Galimu! Muhuliri, O, munyi avandu va Laisha! Mu haane amativuli, O, munyi avandu va Anazozi! 31Avandu va Madimena na Gebimu virukaa kigira vaduuki kwesoora. 32Kalunu avasigu vaveeye mu lidaala lia Nobu, vasonaa videte viukutihiza ku kiguru cha Ziyoni, mu lidaala linene lia Jerusalemi.
33Yahova Wuvunyali alavagwihiza nu kuvasionoranyira hasi kuli zisia ziu musaala. Avigingiri ligali kandi avataambi ligali ku vosi valikizwa hasi. 34Yahova alavatemaga kuli misaala milahi giveeye hagati hu mulitu gwa Lebanoni jitemwa ni imbaazi ma jigwa hasi.
©Bible Society of Kenya, 2019