ISAYA 9
9
1Sihalavaho ninzira yoosi ya yavo vahononoka kutura mu ing'inga yu vudinyu yiyi mba.
Mwami wa madiku gaaza
Kivala chi zihiiri zia Zabuloni na Nafutali chaali ku ing'inga indala mu zisoni, navuzwa mu madiku gaaza alahaana uluyali ku losoma yilu, kutura ku inyanza ya Meditareniani lovega lwi Ivugwi kuduuka ku kivala keveeye lovega lundi lwa Jorodani kali kuduuka ku Galilaya kivala cha vandu vizihiiri vamenya.
2Avandu vagenda mu kisundi vamali kolola uvulavu vonene ligali.
Vamenya mu kivala chi viliri,
navuzwa kalunu uvulavu vumulikaa kuvo.
3Yahova ivi umali kuvaha uvusangari vonene ligali;
uvakoli kuva nuvuyanzi.
Vasangalira mu cha umali kokora;
kuli avandu vasangala lwa vagesa vuswage vwavo,
anoho lwa vagavulana vilaanye.
4Ivi umali kuvunanyia iniira yavatugwa yavaliduhilaa
kandi impimbu ikuyaa ku mavega gaavo.
Umali kuguuta ihiiri ya dambiza kandi iyanuuraa avandu vovo,
kuli waguuta liihi lia Midiani kale ligali.
5Vilato via mahi gingiliraa
kandi zinguvu ziavo ziosi zie viba via masahi vilasambwa nu muliru.
6Mwana wivuliiywi ku kunyi!
Koheveeywe mwana muyaayi!
Naye alakave mwamihi wiitu.
Alalaangwa, “Wokogenyia, umwideeri,”
“Nyasaye Wuvunyali,” “Baba wimihiga ni mihiga,” “Mwami wi mirembe.”
7Uvwami vwivwe vwi zinguru vulazizagilira kuviruka;
uvwami vwivwe vulava ni mirembe kazozo.
Alamiiha kuli mwami mu vogono vwu mwami Daudi.
Zinguru zizie zilereda ku likalaga lirungi,
kandi liagigali kutura kalunu kuduuka mihiga ni mihiga.
Yahova Wuvunyali amali kusaavira kokora yaga goosi.
Yahova yalahaana mageri ku Isiraeli
8Yahova umali kutuma likalaga ku vwami vwa Isiraeli, ku visukululwi via Yakobo. 9Avandu vosi va Isiraeli, vuli mulala omenya mu lidaala linene lia Samaria, alamanya ndi Yahova umali kokora yaga. Kalunu vaveeye nilielora kandi niliegingira. Vavoola, 10“Zinyumba ziumbakirwa madafari zigwiiyi hasi, navuzwa kulaziumbakira amagina. Imialiliru ji mikuyu jimali kotemagwa, navuzwa kulaviika midaragwa milahi ligali mbogono vwajo.”
11Yahova umali kusingiriza avasigu vaavo kuvingilira. 12Siria ku lovega lwi ivugwi kandi Filisitia ku lovega lwi madioli vakunuyi minwa jaavo ukumila Isiraeli. Na kali ndio, uvutima vwa Yahova vukikiri kuduuka ku kiheri; akinyiiyi vuzwa mukono gwigwe ukuhaana mageri.
13Avandu va Isiraeli vakikiri kwiganira; kali niiva Yahova Wuvunyali uvaheeye mageri, vakikiri kwirana kuye. 14Mu lidiku lilala vuzwa Yahova alahaana mageri ku aviimiliri va Isiraeli na vandu vacho; alavakalaga mitwi nimikira, amatu ga makindu nagividundu. 15Avasaakulu navasaza vuluyali vaveeye mitwi, na avaporofeti ava miigizu gu vugadi vaveeye mikira! 16Yavo avimiliraa avandu yava vamali kuvachaminya kandi kuvagoyanyia ligali muno. 17Kunangwa Yahova sialaleka avasoleri vahononoke mba; sialamanyia liverererwa ku vakunzakali navavisandu mba, kigira avandu vosi sivali nuvunyasaye mba, vaveeye avachamu na kindu choosi cha vavola keveeye uvudamanu uvwere. Na kali ndio, uvutima vwa Yahova sivulahera mba, navuzwa akinyiiyi vuzwa mukono gwigwe ukuhaana mageri.
18Uvudamanu vwa vandu vusamba kuli muliru gudivizaa visaka via mafa kandi nu lutavati. Vusamba kuli muliru gwu mumulitu uguvuyizaa igulu mwoki muliduhu. 19Kigira Yahova Wuvunyali uvihiliriywi, lihaana mageri geege lisaamba kuli muliru mu kivala choosi kandi vudiviza avandu, na sihaveeye ho numundu overereraa amwavo weve mba. 20Havundu hoosi mu kivala avandu vanuraa nukulia ichukulia choosi cha vanyara konyoora, navuzwa sivigutaa kali hakuzu mba. Kali valiza avana vaavo vene! 21Avandu vi ihiiri ya Manase na avandu vi ihiiri ya Efuraimu vingilirana aveene naveene; kandi vombi harara, vatutilanga avandu vi Ivuyuda. Navuzwa ku yaga goosi, uvutima vwa Yahova sivoheraa mba. Akinyiiyi vuzwa mukono gwigwe ukuhaana mageri.
©Bible Society of Kenya, 2019