VAHEBURAINA 7

1Melikizedeki uyu yaali Mwami Munene wa Salemi, kandi Musaalisi wa Nyasaye Oveeye munene. Lwa Aburahamu yaali niyirana kutura mu vulwani vwa yaguutira mu avami vane, Melikizedeki yagana naye kandi namugasiza, 2na Aburahamu naye naamuha kidieli chi likomi chi vindu viosi via yaali navio. Kivuni chukutanga chi Lieta Melikizedeki keveeye “Mwami Munene wuvulungi”, kandi kigira yaali Mwami wa Salemi, lieta lilie liveeye kovora, “Mwami wi Mirembe.” 3Siaveeyeho na vang'oda baba anoho na mama weve mba anoho mulala ku vaguuga veve mba; livulwa lilie anoho likuza lilie silimanyikani mba. Aveeye kuli Mwana wa Nyasaye; alava musaalisi mihiga ni mihiga.

4Kunangwa, muhenze mulole kuli mundu uyu yaali munene. Aburahamu, guuga wiitu wamanyikana ligali, yamuha kidieli chi likomi ku vindu via yalaanya muvulwani. 5Yava avaatura ku kisukururwi cha Levi, avaveeye vasaalisi, valagwa ni Lilaga kuvugura kidieli chi likomi kutura ku vandu va Isiraeli, agaveeye kovora, kutura ku vandu vaavo vene; kali niiva avandu vaavo vene vaatura ku kisukururwi cha Aburahamu. 6Melikizedeki siyaali kisukururwi cha Levi mba, navuzwa yasolola kidieli chi likomi kutura ku Aburahamu kandi namugasiza, umundu wanyoola lisuuvirizwa lia Nyasaye.

7Navuzwa silinyala kuhayahayizwa ndi uyu ugasizaa aveeye munene kuvita uyu ugasizwa mba. 8Kolovega lwa vasaalisi, kidieli chi likomi kesololwa vuzwa na vandu vakuzaa; navuzwa kolovega lwa Melikizedeki, kidieli chi likomi, chasololwa na uyu oveeye mwoyo, kuli Mang'oda Matakatifu gavoora. 9Mulala anyala kovora ndi, lwa Aburahamu yaatuliza kidieli chi likomi, Levi wa visukululwi veve vaavugura kidieli chi likomi; yatungaa kidieli chi likomi kandi. 10Levi yaali nakikiri kwivulwa ing'inga ya Aburahamu guuga weve yagana na Melikizedeki.

Yeso aveeye kuli Melikizedeki

11Niiva vulungi vwanyooleka kuvitira mu vusaalisi vwi ihiiri ya Levi, avandu va Isiraeli vahevwa Lilaga. Sihaveeyeho ni lienya umusaalisi wu lugano Lundi kuuza kolonda Melikizedeki, nataveeye uza inyima wa Haruni mba. 12Lwi ing'inga yuvusaalisi igirunga'anywa, kuduuka lilaga nalio ligirung'anywe kandi. 13Mwami wiitu wivindu yivi vivoolwa kuye, aveeye wihiiri yindi, kandi sihaveeyeho nu mundu wundi kutura mu ihiiri yeeye watumika kuli musaalisi ku vwali mba. 14Gamanyikanaa vulahi ndi Mwami wiitu yiivulwa kutura mu ihiiri ya Yuda; kandi Musa siyavoola ku kindu choosi ku ihiiri yiyi lwa yamoloma kigira vasaalisi mba.

Musaalisi wundi kuli Melikizedeki

15Amakuva yaga gamali kumanyikana vulahi ligali; musaalisi wundi umali kololeka oveeye kuli Melikizedeki. 16Siyakolwa musaalisi kolondekana na malago kandi miima ja vandu, navuzwa kuvitira mu zinguru zie livamwoyo litahera mba. 17Mang'oda Matakatifu gavoora,

“Ivi ulava musaalisi mihiga ni mihiga

ku lugano lwu vusaalisi vwa Melikizedeki.”

18Lilaga likulu lia Musa liukutanga liatulizwa ho, kigira liali lidedekere kandi litanyala kokoonya kindu. 19Lilaga lia Musa siliali linyala kokora kindu choosi kuva kidukiru mba. Navuzwa kalunu mu vogono vwalio, lisuuvirizwa lilahi ligali kuvita, limali kuhaanwa lia kunyala kuvitira mu, ma kwisundi ahimbi ku Nyasaye.

20Komeeda ku geene yago, haveeyeho ni liesuuha lia Nyasaye. Sihaaliho ni liesuuha kuli yili lwa vandu vandi vakolwa avasaalisi. 21Navuzwa Yeso yakolwa musaalisi munzira yi liesuuha lwa Nyasaye yamuvolera,

“Mwami umali kolomba lisuuvirizwa liu kwisuuha

kandi sialagirung'anyia zing'anagani zizie mba:

‘Ivi ulava Musaalisi mihiga ni mihiga.’ ”

22Kigira liesuuha yili, Yeso umali kuva kihambiliru chi lilagana lilahi kuvita.

23Koveeye ni liavukana lindi: Vaali ho na vasaalisi navuzwa sivali vakanyali kuzizagilira ni miyinzi jaavo mba kigira likuza. 24Navuzwa Yeso ahindiraa mihiga ni mihiga, kandi miyinzi jije kuli musaalisi sijihelerizana kutura kuye kuzia ku wundi mba. 25Kandi ndio anyala, kalunu na kazozo, kohonyia yavo avaazaa ku Nyasaye kuvitira muye, kigira aveeye mwoyo mihiga ni mihiga, kandi avasaaliraa ku Nyasaye kazozo.

26Yeso niyie Musaalisi Munene ukuduukaa mu lienya lietu. Aveeye mutakatifu; utaveeye nuvudamanu, anoho vwoni muye; utaveeye nimbala mba, umali kwahulwa kutura ku voni, kandi wanenehizwa igulu ligali. 27Siaveeye kuli avasaalisi vanene vandi mba; siyenyekaa ahaane visiuviliru kigira uvwoni vwivwe mwene kutanga, ma kandi kigira uvwoni vwa vandu mba. Yakola yaga lwa yahaana kisiuviriru kilala, lulala vuzwa kigira viosi, lwa yihaana mwene. 28Lilaga lia Musa litovolaa avandu vataveeye vadukanu kuva avasaalisi vanene; navuzwa lisuuvirizwa lia Nyasaye lia yakola kuliesuuha, liaza inyima wi Lilaga, limali kotovola Mwana, umali kokolwa muduukiru mihiga ni mihiga.

Yeso aveeye Musaalisi wiitu Munene

Currently Selected:

VAHEBURAINA 7: LOGOOLI

Highlight

Copy

Compare