VAHEBURAINA 8
8
1Kalunu kivuni kenene cha makuva ga kovora ni yiki: koveeye nu Musaalisi Munene wu lugano yilu, wikala ha mukono mulungi gwendeve yu vwami vwa Nyasaye Wuvunyali, mwigulu. 2Atumikaa kuli Musaalisi Munene Havundu Hatakatifu Ligali, gaveeye kovora, mu lihema lieligali liumbakwa nu Mwami, iliavula kwumbakwa nu mundu mba.
3Vuli musaalisi munene atovolwa ahaane vihaanwa harara nivisiuviliru viezinya ma ku Nyasaye; kandi gaduukiraa Musaalisi Munene wiitu ave ni kindu chukuhaana. 4Niiva yakaveeye wu ku lirova linu, ngano siyakanyali kuva musaalisi mba, kigira vaveeye ho avasaalisi vanyingi vahanaa vihaanwa kolondekana ni Lilaga lia Avayuda. 5Uvutumiki vwavo vwu vusaalisi voveeye kelolero kandi chiriri chi vindu viveeye mwigulu. Yiki nicho chagira Nyasaye niyiganihiza Musa lwa yenya kwumbaka Lihema navoora, “Henza olombe vindu viosi ku lugano lwi kilolero cha wamanywa ku kiguru.” 6Navuzwa kalunu Yeso Kristo umali koheevwa miyinzi ju vusaalisi ovoveeye vulahi kuvita vwavo, kuli Lilagana lia yalohiza hagati ha Nyasaye na vandu veve liveeye lilahi ligali kuvita, kigira liediiraa ku lisuuvirizwa lilahi ligali lie vindu viveeye vilahi ligali.
7Niiva lilagana liukutanga yilio livula kuva nuvudamanu, ngano liakaviri siliakenyeywe live ho mba. 8Navuzwa Nyasaye yanyoora vudamanu mu vandu veve lwa yavoola,
“Heenzi, amadiku gaaza, Mwami avoora,
lwa ndilomba lilagana lihia na vandu va Isiraeli
kandi na vandu va Yuda.
9Lilagana yili si lilakave kuli lia ndalomba harara na vaguuga vaavo
ku lidiku lia ndavavugura nu mukono gwange
kandi nimbimilira vatuli mu kivala cha Egebeti.
Sivali avasuuvirifu ku lia ndalomba navo mba,
ninzi sindavakola vave kindu mba, ndavaleka; Mwami avoora.
10Kalunu, yili nilio lilagana lia ndilomba na vandu va Isiraeli
mu madiku gaaza, Mwami avoora,
ndaviika malago gange mu zing'anagani ziavo,
kandi ndakagang'ode mu mioyo jaavo;
kandi ndakave Nyasaye wavo,
navo valakave avandu vange.
11Sivaligizana mundu sa mulala nuwache mba,
anoho mundu sa mulala avolere amwavo weeve,
‘Manyia Mwami.’
Vosi valamanya inzi,
kutura ku mukekeeke kuduuka ku munene wa vosi.
12Ndavasamiiha uvwoni vwavo,
kandi sindizuliza amahiolo gaavo mba.”
13Mulivoola ndio ku lilaga lihia. Nyasaye umali kolomba liukutanga kuva likulu; kandi ku choosi kikunguhaa ni kitandukaa kilatulizwa ho vwangu.
Lisigamira Nyasaye mu lirova nu Mwigulu
Currently Selected:
VAHEBURAINA 8: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
