VAHEBURAINA 6

1Kunangwa, gendi kwisundi imbiri kuduuka ku migizu gu vuduukiru nakoleke inyima amigizu gukutanga gu Vukristayo. Kutatema kandi musingi gwi lieganira kutura ku miyinzi midamanu, nu gwi lisuuvira mu Nyasaye mba; 2kandi gwa migizu gi libatiza na gi livikwa ku makono mba; nagilisimuguka lia vakuzu kandi likalagirwa lie mihiga ni mihiga. 3Gendi kokole yaga niiva Nyasaye avugiliraa.

4Ni vudinyu kwilanyia vandu viganira mu lieganira kandi, vandu vamala kumanya vulavu vwa Nyasaye, kandi vamala konyoora kihanwa chu mwigulu. Yava ni vandu vamala konyoora Roho Mutakatifu. 5Vamala kumanya vulahi vwi likuva lilahi lia Nyasaye, ni zinguru zie zing'inga ziza; 6Niiva valeka lisuuvira liavo, ganyala kunyalika ndi kandi kuvilanyia vahia vaduuki kwiganira? Vavambaa Mwana wa Nyasaye, kandi kumuleganyira havulavu lwa viirana kokora vwoni.

7Nyasaye agasizaa lirova linwezaa imbura ikubaa kazozo kulio, kandi limeraa vitagwa ni zinguza ziveeye novokoonyi ku yavo avalilimaa; linyoola uvugasu vwa Nyasaye. 8Navuzwa niiva lilamera amafa ni ikayongo anoho indiva ya matagalu siliveeye novokoonyi, kandi liveeye ahimbi kulaamwa na Nyasaye. Mu keheri chalio lilakasambwe nu muliru.

9Navuzwa kali nikomolomaa kuli ndi avaamitu vayaanze viitu, koveeye ni lisuuvirizwa linene ku liiva lienyu. Kumanyi vulahi ndi mumali konyoora uvugasu vulahi voveeye vwo vohonyi vwinyu. 10Nyasaye siaveeye vugira vulungi mba! Sialivilira miyinzi jinyu ja mwakora, anoho vuyanzi vwinyu vwa mwalolekiza kuye novokoonyi vwa mwaha vandu va Nyasaye kandi mu kihaanaa ku Avakristayo vache vinyu, ma mukizizagiliraa kokoonya Avakristayo vache vinyu. 11Lienya lietu linene liveeye ndi, sa mulala ku munyi alolekizi vugulu vwivwe kuduuka ku keheri, chu vuduukiru vwi lisuuvirizwa lienyu. 12Kunangwa sikwenyaa munyi muve vagata, navuzwa muve kuli yavo avasuuviraa kandi vaveeye viikuziri, kandi ndio vanyoore yivio via Nyasaye amali kusuuviriza.

Lisuuvirizwa lia Nyasaye ni lieligali

13Lwa Nyasaye yalomba lisuuvirizwa lilie ku Aburahamu, yalomba liesuuha akole icha yaali naasuuvirizi. Kigira sihaali nu munene kuvita oyo mwene, yatumikira lieta lilie liene lwa yalomba liesuuha lilie. 14Yavoola, “Ngusuuvirizaa ligali ndi, ndakugasiza kandi ndakuha visukululwi vinyingi.” 15Aburahamu yaali mwikuziri, kandi ndio yanyoora icha Nyasaye yamusuuviriza. 16Lwa vandu visuha, vatumikiraa lieta lia oyo oveeye munene kuvita ye, kandi liesuuha lidinyirizaa makuva gavooleywe, ma liheriza amahangari.

17Kandi, Nyasaye yatovola kutwekiza lisuuvirizwa lilie ni liesuuha. Nandio yamanyia havulavu yavo valinyoola miandu ndi amakuva geege sigaveeye niligirung'ana, maku yavika liesuuha hagati haavo. 18Kunangwa koveeye ni vindu viviri; lisuuvirizwa ni liesuuha ivitanyala kugirung'ana, kandi Nyasaye avula kovora vovehi kulio. Kunangwa kunyi avakumali konyoora mirembe naye kuzuvwa ligali kugumiri vudinyu lisuuvirizwa liviikiywi imbiri wiitu. 19Koveeye ni lisuuvirizwa yili kuli itiiru yi mioyo jietu. Lisuuvirizwa lizizaa kuduuka ku vwali inyima wisuka yi Litembeli liu mwigulu. 20Yeso yitaa kwingira mu, mu vogono vwitu, kandi umali kuva musaalisi munene mihiga ni mihiga kolondekana novolohizi vwu vusaalisi vwa Melikizedeki.

Musaalisi Melikizedeki

Currently Selected:

VAHEBURAINA 6: LOGOOLI

Highlight

Copy

Compare