VAHEBURAINA 4

1Kunangwa, Nyasaye yakuha lisuuvirizwa ndi kunyala konyoora vosoosi vwa yamoloma amakuva gavwo. Gakuduukiraa kohenze vulahi, gase mulala ku munyi alanyooleka natanyooye vosoosi vwasuuvirizwa yivwo. 2Kunyi kwamala kuhulira amakuva malahi gi Ivangeri kuli navo vilwazirwa, vahulira likuva zana, navuzwa siliavakoonya mba, kigira lwa valihulira, sivalivugula ni lisuuvira mba. 3Kunyi avakumali kusuuvira, konyoora vosoosi zana yivwo, vwa Nyasaye yasuuviriza. Gaveeye kuli yavoola,

“Ndaali nu vutima ma ninomba lisuuviriza lie liesuuha ndi,

‘Sivalakingiri mu kivala cha ndakavaheye vosoosi vwange mba!’ ”

Yavoola yaga kali niiva miyinzi jije jaali nijatwekizwa kutura lwa yalomba lirova. 4Havundu handi mu Mang'oda Matakatifu, yaga gavoolwa ndio ku lidiku lia saba: “Nyasaye yasosa ku lidiku lia saba kutura ku miyinzi jije josi.” 5Amakuva malala meere gavoolwa kandi, “Sivalakingiri mu kivala yicho wa ndakavaheye vosoosi mba.” 6Yavo avatanga kwilwazirwa makuva malahi gi Ivangeri, sivanyoola vosoosi yivwo mba, kigira sivasuuvira mba. Kunangwa, vaveeye ho na valala vavugilirwa konyoora vosoosi yivwo. 7Yaga gamanywa ni kivuni ndi Nyasaye aviikaa ho lidiku lindi, lilangwa “Kalunu.” Inyima wi mihiga minyingi, yamoloma kugo kuvitira mu Daudi mu Mang'oda Matakatifu kovora,

“Kalunu ni muhulira mwoyo gwa Nyasaye,

mutadinyia mioyo jinyu mba.”

8Joshua alava ni yaaha avandu vosoosi vwa Nyasaye yasuuviriza, ngano Nyasaye siyali yakavooye lwinyima ku makuva gi lidiku lindi mba. 9Kuli gaveeye vosoosi vwi Lisabato vutigaye ho ku vandu va Nyasaye. 10Mundu ku woosi onyoora vosoosi vwa Nyasaye yasuuviriza, alasoosa mwene ku miyinzi jije kuli wa Nyasaye ya sosa ku miyinzi jije. 11Kunangwa, gendi kwidinyirizi konyoole vosoosi yivwo kunangwa mulala ku kunyi avuli kugwa kuli yavo vaagwa kigira vavura kuva ni lisuuvira.

12Likuva lia Nyasaye liveeye mwoyo, kandi liveeye nizinguru, kandi liveeye liugi kuvita kivavi chu vwugi zimbega ziombi. Litumitaa kuduuka hu mwoyo na roho viaganiraa, kuduuka hi viungu nuvuhaale viaganiraa. Likalagira liegomba kandi zing'anagani ziu mwoyo gwu mundu. 13Sihaveeye ho ni kindu kinyala kuviswa ku Nyasaye, vindu viosi vialombwa, viamanywa havulavu imbiri wizimoni zizie. Uyu niyie Nyasaye wa kulihaana kuye makuva gi vikolwa vietu.

Yeso Musaalisi Munene

14Maku gendi kugumiri vudinyu ligali lieyama lisuuvira lietu lia kovora koveeye nu Musaalisi Munene ligali umali kuzia kuduuka mwigulu imbiri wa Nyasaye naye ni, Yeso Mwana wa Nyasaye. 15Musaalisi Munene wiitu siaveeye uyu utanyala kovererera vodedekere vwitu mba. Munzira yindi, kunyi koveeye nu Musaalisi Munene, wagerizwa mu vindu viosi kuli kunyi kogerizwa, navuzwa siyakola vwoni mba. 16Kunangwa, gendi kuluviliri kwisunda ahimbi kondeve yu vwami vwa Nyasaye, hi zimbavasi ziveeye. Ahene yaho, kulanyoola livererwa kandi zimbavasi ziukokokoonya lwa kuzienya.

Currently Selected:

VAHEBURAINA 4: LOGOOLI

Highlight

Copy

Compare