VAHEBURAINA 3

1Kunangwa, avaamitu vange vatakatifu, avilisanga mu lilangwa lia Nyasaye, muviiki zing'anagani zienyu ku Yeso, wa Nyasaye yatuma kuva Musaalisi Munene wilisuuvira lia kulandizaa. 2Yaali musuuvirifu ku Nyasaye wamutovola kokora miyinzi yiji, kuli Musa yaali musuuvirifu munyumba ya Nyasaye. 3Yeso aveeye wuvukumi kuvita Musa, kuli mwumbaki winyumba aveeza nilizominywa kuvita inyumba yene. 4Vuli inyumba yumbakwa nu mwumbaki, na Nyasaye niyie umali kwumbaka vindu viosi. 5Musa yaali mutumikiri musuuvirifu ligali munyumba yoosi ya Nyasaye, kandi yamoloma vindu via Nyasaye yazizaa kovora mu zing'inga ziza. 6Navuzwa Kristo aveeye musuuvirifu kuli Mwana ulindi mu inyumba ya Nyasaye. Kunyi koveeye inyumba yeeye, niiva kulava nuvuluviliri kandi niiva kulava ni lisuuvira mu cha kwasuuvirizwa.

Vosoosi ku vandu va Nyasaye

7Kunangwa, kuli Roho Mutakatifu avoora,

“Niiva muhulira mwoyo gwa Nyasaye kalunu,

8mutadinyia mioyo jinyu kuli avaguuga vinyu

vakora lwa vibaara ku Nyasaye,

kuli vaali lidiku yilio mwigendanyama lwa vageriza Nyasaye.

9Nyasaye avoora, vababa vinyu vambiika ku kegero kandi nivangeriza,

kali niiva valora miyinzi jange ku mihiga arubaini.

10Kunangwa, ndaali nuvutima na vandu yavo nimbora,

‘Vibaara ku inzi, kazozo

kandi sivenyaa kuhulira malago gange mba.’

11Ndaali nuvutima ma ninzisuuha ndi,

‘Sivalingira mu kivala cha ndaali ndakavaheeleye ovososi vwange mba!’ ”

12Muhenze vulahi, vamiitu vange, gase mwoyo mudamanu ligali kandi gwilivula kusuuvira kuli yigwo gulava mu mulala ku munyi, gwakajira yagirung'ana nokoleka Nyasaye oveeye mwoyo. 13Navuzwa mulala ku munyi avuli kugadwa nu vwoni kandi agwi mwigingiri. Kuduuka mukonyane aveene naveene vuli lidiku, ku lohono lwi likuva “Kalunu” mu Mang'oda Matakatifu limolomaa ku kunyi.

14Kunyi koveeye avasangi harara na Kristo, niiva kulagumila lisuuvira lietu kuduuka kukeheri kuli lia kwaali nalio mulitanga. 15Mang'oda Matakatifu gavoora:

“Niiva muhulira mwoyo gwa Nyasaye kalunu,

mutadinyia mioyo jinyu, kuli avaguuga vinyu vaali,

lwa vibaara ku Nyasaye mba.”

16Ni vanga vwaha avahulira mwoyo gwa Nyasaye nivibaala kuye? Ni yavo vosi ava Musa yimilira kutura mu kivala cha Egebeti. 17Ni vanga vwaha ava Nyasaye yaali navo nuvutima ku mihiga arubaini? Ni yavo avaakoraa vwoni, avandu vakuzira mwigendanyama?

18Lwa Nyasaye yisuha ndi, “Sivalingira mu kivala cha ndakavaheye vososi, ni vanga vwaha ava yamoloma ku?” Ni yavo avibaara kuye. 19Kunangwa kolola ndi, sivali vanyara kwingira mu kivala cha valagwa mba, kigira livula kusuuvira.

Currently Selected:

VAHEBURAINA 3: LOGOOLI

Highlight

Copy

Compare