VAHEBURAINA 11

1Kuva ni lisuuvira ni kuva na giligali gi vindu via kulindiliraa, kandi vindu via kutanyala kolola. 2Kigira lisuuvira avaguuga vavugilirwa na Nyasaye.

3Kigira lisuuvira, kumanyirizaa ndi ligulu lialombwa ku likuva lia Nyasaye, kunangwa, linyala kololeka lialombwa kutura ku vitalolekaa.

4Kigira lisuuvira, Habili yahaana ku Nyasaye kisiuviriru kilahi kuvita cha Kaini. Kuvitira mu lisuuvira yanyoora livugilirwa lia Nyasaye kuli mundu mulungi kigira Nyasaye mwene yavugilira vihaanwa vivie. Kuvitira mu lisuuvira lilie, Habili kali niyakuza, akikiri mwoyo.

5Kigira lisuuvira Enoka siyaakuza mba; muvogono yivwo yavugurwa na Nyasaye kutura kandi siaveeyeho nu mundu wamulola mba, kigira Nyasaye yaali namuhili muligulu. Mang'oda Matakatifu gavoora ndi, Enoka nakikiri kuvugulwa kuzia mwigulu yaali naayaanzizi Nyasaye. 6Vugira lisuuvira, mundu sianyala kuyaanziza Nyasaye mba. Ku vosi uzaa ku Nyasaye gamudukira ave nilisuvira ndi Nyasaye aveeye ho kandi niyie muhaani wa madanyi ku yavo avamwenyaa.

7Kigira lisuuvira, Nyasaye yiganihiza Nuhu kumakuva gi vindu viza kwekoleka via yaali sianyala kolola mba. Yahulira Nyasaye, ma nalomba liato aduuki kwehonyia harara na vandu vinyumba yeeye; kutura ku gene yago, avilirova vakalagirwa, na Nuhu yanyoora kutura ku Nyasaye uvulungi vuzaa kolondekana ni lisuuvira.

8Kigira lisuuvira Aburahamu yegehiza lwa Nyasaye yamulanga azie mu kivala cha Nyasaye yaali ni yamusuuviriza ndi alamuha keve mwandu gwigwe, yazia kali natamanyi wazizaa. 9Kigira lisuuvira Aburahamu yamenya kuli mugeni mu kivala cha Nyasaye yaali niyamusuuviriza. Yamenya mu mahema kuli Isaka na Yakobo yanyoora lisuuvirizwa lilala liere kutura ku Nyasaye, 10Aburahamu yalindiliraa lidaala linene lia Nyasaye yalohiza nalibiima ma naaliumbaka, lidaala linene liveeye nimisingi midinyu.

11Kigira lisuuvira Sara yanyoora zinguru zio kovereka mwana kali niyaali wi mihiga minyingi; kigira yasuuvira ndi Nyasaye, wamusuuviriza, aveeye musuuvirifu kutwekiza indagano yeeye. 12Kali niiva Aburahamu yaali niyakuza, kutura ku mundu mulala uyu, vianyooleka visukululwi vinyingi kuli zing'ereng'ani mwigulu, kuli muyeke gutanyala kuvalizwa ku lujinga lwinyanza.

13Avandu yava vosi vaakuza nivaveeye mu lisuuvira. Vaakuza nivakikiri konyoora vindu via Nyasaye yavasuuviriza. Navuzwa vaali nivaviloleeye ihale, kandi nivavavugilira, kandi niviyama havulavu ndi vaali avageni na vamenya mu lirova. 14Yavo vavolaa vindu kuli yivi, vamanyia havula ndi venyeleriza kivala chavo aveene. 15Sivazizagilira kuganagana kigira kivala cha vaatura mu mba, valava vakora ndio ngano vaali vakaveeye nuvwiyangu kwirana. 16Navuzwa kuli gaveeye, veegomba kivala kilahi ligali, nacho keveeye kivala chu mwigulu; kigira yaga, Nyasaye siaveeye esoni ku yavo kumulanga Nyasaye wavo, kigira uvalombeeye lidaala linene.

17Kigira lisuuvira, Nyasaye yageriza Aburahamu ahaane Isaka mwana weve muderwa, ave kuli kisiuviriru. Aburahamu niye wa Nyasaye yalombera lisuuvirizwa yilio. Kali ndio, yavugilira kuhaana mwana weve muderwa kuli kisiuviriru. 18Nyasaye yaali niyavoolera Aburahamu, “Visukululwi vivio vilakanyoleke kuvitira mu Isaka.” 19Aburahamu yasuuvira ndi Nyasaye yaali unyala kusimugukiza Isaka kutura mu likuzu; kandi kovora agiligali, Aburahamu yanyoora mwana weve kutura mu likuzu.

20Kigira lisuuvira Isaka yagasiza Yakobo na Esau, kali mu vindu viliza.

21Kigira lisuuvira, Yakobo lwa yaali na kuzaa yagasiza avana va Josefu, nakikiri kukuza. Samulala yasigamira Nyasaye niyesedemi ku imbimbu yeeye.

22Kigira lisuuvira, lwi likuza lia Josefu liali ahimbi, yatala amakuva gi litula lia avana va Isiraeli mu Egebeti, kandi navaha amalago ku liyavirwa liu muviri gwigwe.

23Kigira lisuuvira lwa Musa yiivulwa, aviivuli veve vamuvisa ku mieli jivaga kigira valora aveeye Mwana mulahi; sivaatia kuvunaga malago gu Mwami wa Egebeti mba.

24Kigira lisuuvira, Musa yaviruka nava Mundu uduuki, yasura kulangwa Mwana wu mukaana wu mwami. 25Yatovola kusanga mulikubizwa kivi lia vandu va Nyasaye, kuvita kuyanzilira vwoni ku ing'inga ngekeeke. 26Yatovola linyegwa kigira Kristo kuva lilahi ligali kuvita vutugi vwa Egebeti; kigira yahenzerera madanyi gaaza imbiri.

27Kigira lisuuvira Musa yatura Egebeti vugira kutia vutima vwu mwami; siyirana inyima kigira yaali vuzwa mundu olola Nyasaye utalolekaa mba. 28Kigira lisuuvira yatangiza lipasaka, nalaga amasahi guufwi ku viliango kunangwa Engelosi wi Likuza avuli kwita avayaayi viivulwa kutanga mu vandu va Isiraeli.

29Kigira lisuuvira avandu va Isiraeli vaambuka mu Inyanza Inzakanyu kuli vaali ku marova amuumu. Lwa vandu Vaegebeti vageriza kokora ndio vakuzira mu mazi vosi.

30Kigira lisuuvira amadigi ga Jeriko gaagwa, inyima wa vandu va Isiraeli vaali nivakalikumberiza ku madiku saba. 31Kigira lisuuvira Rahabu mukali wa malaya siyiitwa harara nayavo avavura kuhulira, kigira yingiriza avaluuti nimirembe.

32Mbeeye namanyingi gokovoola, navuzwa zing'inga sizimbugiliraa mbore amakuva ga Gidioni, naga Baraka, naga Samusoni, naga Jafeza; naga Daudi, naga Samweli, naga Vaporofeti mba. 33Kuvitira mu lisuuvira, valwaana kandi ni vaguuta vivala viosi. Vakora agaali malungi, ma nivanyoora ga Nyasaye yasuuviriza. Vakunika minwa jiving'ang'a, 34vasiminya miliru minene jizingulu, vahononoka kwitwa ni kivavi. Vaali avadedekere, navuzwa vahevwa zinguru, vaali vizingulu zinene muliihi, ma nivaguuta amahi ga vageni.

35Kuvitira mu lisuuvira avakali vavugura aviiko vaavo vakuzu nivasimugukiziwi.

Avandi vasuuraa kuvugilira vovoholore, vakuzira mu lidambizwa kunangwa vaduuki konyoora lisimugukizwa mu livamwoyo lilahi ligali. 36Avalala vakolerwa kehenyahenye kandi nivakuywa, na vandi vavofa niminyororo kandi nivaviikwa mu vuhambe; 37valaswa na magina, vakalwa hagati numusumeno, viitwa nikivaavi. Vavodong'ana ni viviiki zinguvu ziamagondi nizie zimburi. Vaali vadaka kandi nivadambizwa, kandi vakolerwa vudamanu ligali. 38Lirova si liali lilahi kuvo mba! Vavodong'ana kuli viruki mu changalangwi; kandi mu vigulu, nivamenyi mu zimbangaywa, nu mumalina.

39Yava vosi vayanziza Nyasaye kigira lisuuvira liavo, navuzwa vaakuza nivakikiri konyoora cha Nyasaye yavasuuviriza, 40kigira Nyasaye yavikira kunyi kindu keveeye kilahi ligali lienya lilie liali ndi kove harara naye kunangwa kuduuki kokolwa vaduukiru.

Currently Selected:

VAHEBURAINA 11: LOGOOLI

Highlight

Copy

Compare