VAHEBURAINA 10
10
1Lilaga lia Vayuda siliveeye kelolero kidukiru na kisuvirifu chi vindu vieligali viza mba, navuzwa ichiriri chi lilohiza lie vindu valahi viizaa. Visiuviliru vilala viere vihaanwa vuli muhiga. Kunangwa Lilaga linyala ndi, kuvitira mu visiuviliru yivi, kolomba avandu vaazaa ku Nyasaye kuva avadukiru? 2Ni gataveeye ndio, ngano si vialekwa kuhaanwa? Kigira niiva avandu vasigamira Nyasaye valava nivatakasiywi ligali kutura muvwoni vwavo lulala, ngano sivakaveeye niliiva liu kumanya mahiolo gaavo kandi mba, kandi visiuviliru viosi viakaheriziywi. 3Navuzwa visiuviliru yivi vihaanwa vuli muhiga kwizuliza avandu vwoni vwavo. 4Amasahi gi zigiriki na agi zimburi siganyala kutulizaho uvwoni mba.
5Lwa Kristo yaali ahimbi kuuza mu lirova yavolera Nyasaye ndi:
“Ivi siwenyaa visiuviliru ni vihaanwa,
navuzwa umali konzetegekizira muviri.
6Siuyaanzizwa ni vihaanwa visambwa vigima ku vwali
anoho visiuviliru viukutuliza ho vwoni mba.
7Kunangwa ndavoora! ‘Mbeeye hano kokora vulaliri vuvwo
O, Nyasaye, kuli gang'odwa ku inzi,
mu kitabu chi Lilaga.’ ”
8Kutanga yavoola, “Ivi si wenyaa kandi siuyaanzizwa ni visiuviliru kandi ni vihaanwa, anoho vihaanwa vigima viu kusambwa ku vwali kandi visiuviliru viukutuliza ho vwoni mba.” Yavoola yaga kali niiva visiuviliru yivi viosi vihaanwa kolondekana ni Lilaga. 9Maku yavoola “Mbeeye hano, O, Nyasaye, kokora uvulariri vuvwo.” Kunangwa Nyasaye atulizaa ho visiuviliru vikulu viosi, masingiriza kisiuviriru cha kaviri, nacho ni Kristo, mu vogono vwavio. 10Yeso Kristo yatwekiza vulariri vwa Nyasaye yenya akole, kunyi kwosi kutakasiywi kutura muvwoni vwitu ku kihanwa cha yihaana chu muviri gwigwe mwene lulala kandi lwokoheleriza.
11Avasaalisi va Vayuda vosi sa mulala, asingiraa kazozo kokora ukutumika, nu kuhaana visiuviliru zana haali kanyingi; navuzwa visiuviliru yivi sivinyala kutuliza vwoni kali hakuzu mba. 12Navuzwa Kristo yahaana kisiuviriru kilala kigira vwoni, kisiuviriru kiduukanaa mihiga ni mihiga, kandi niyikara ha mukono mulungi gwa Nyasaye. 13Kutura ing'inga yeyo, alindiliraa kuduuka lwa Nyasaye aliviika avasigu veve isi wi virenge vivie. 14Kigira kisiuviriru kilala yavakola avadukiru mihiga ni mihiga yavo avatakaswa kutura muvwoni vwavo.
15Kandi Roho Mutakatifu aveeye mulolekizi wiitu. Kutanga avoora,
16“Yili nilio lilagana lia ndilomba harara navo
mu madiku gaaza, Mwami Nyasaye avoora:
Ndaviika malago gange mu mioyo jaavo;
kandi ndang'oda mu zing'anagani ziavo.”
17Kandi avoora,
“Sindizuliza uvwoni vwavo
kandi vikolwa viavo vidamanu mba.”
18Kunangwa lwa yava vamali kusamiifwa vwoni; liveeye kovora, sihaveeyeho kandi ni lienya kuhaana vihaanwa viukutuliza uvwoni mba.
Kwisundi ahimbi ku Nyasaye
19Kunangwa, avaamitu vange, kigira masahi ga Yeso, koveeye no vovoholore vwosi vwu kwingira Hatakatifu ligali. 20Yakwigulira inzira imbia, yi livamwoyo, kuvitira mu isuuka yu kukinga, agaveeye kovora kuvitira mu muviri gwigwe mwene. 21Koveeye nu musaalisi munene ligali oveeye nuvunyari munyumba ya Nyasaye. 22Kulwayago, gendi kwisundi ahimbi ku Nyasaye numwoyo gwiligali ni lisuuvira liu vuduukiru, nikoveeye ni zing'anagani zie mioyo jitakasiywi kutuliza mu zing'anagani zindamanu, kandi miviri ni jogiziiywi na mazi malahi. 23Gendi kugumiri vudinyu lisuuvira lietu vugira lihayahaya, kigira Nyasaye walomba lilagana yili aveeye musuuvirifu. 24Kandi leki kwehenderanili mioyo aveene naveene kandi mukokonyane aveene naveene muduuki kuyaanzana kandi kokora miyinzi milahi. 25Kutaleka mwimwa yigwo gwu kuvugana harara aveene naveene, kuli vandi vakora. Navuzwa mugende kudinyirizane mulala nuwache ligali, kigira kuli muloraa ndi Lidiku liu Mwami liveeye ahimbi.
26Niiva kotovola kokora uvwoni inyima wi limanya agiligali, sihaveeyeho ni kisiuviriru chatigara kutuliza vwoni mba. 27Navuzwa litigaaye ni lilindilira nuvuti likalaga lia Nyasaye nu vululu vwu muliru gulidiviza yavo vosi avahing'anaa naye. 28Mundu woosi wavula kutia Lilaga lia Musa ku likuva lia valoli vaviri anoho vavaga, kuduuka yitwi vugira livelererwa. 29Kunangwa galava ki ku mundu uchayaa Mwana wa Nyasaye? Galava ki ku okolaa amasahi gi lilagana lia Nyasaye ga mutakasaa kutura muvwoni kuva gaveeye kindu vuzwa? Galava ki ku oyo onyegaa Roho wi zimbavasi? Gamudukira ahevwe amageri malulu ligali kuvita agadukanaa naye. 30Kigira kumanya uyu uwavoola, “Kisaalia ni change, nda tunga.” Kandi uyu wavoola, “Mwami alakalagira avandu veve.” 31Keveeye kindu chu kutihiza ligali kugwa mu makono ga Nyasaye oveeye mwoyo.
32Mwizurizi kuli lwa gaali nimunyi zing'inga ziavita. Mu madiku yago inyima wu vulavu vwa Nyasaye vwali nivwakaa ku munyi, mwasalira vindu vinyingi, navuzwa simwaguutwa mba. 33Zing'inga zindala mwakolerwa uvudamanu kandi nimunyegwa imbiri wa vandu, na zing'inga zindi mwetegeka kuhambana harara na yavo avakolelwa kuli ndio. 34Mwasanga mu likindukizwa harara na yavo avaari mu vuhambe, kandi mwa vugilira kunuurwa vindu vienyu, kigira mu manya vulahi ndi munyi aveene muveeye ni vindu vilahi ligali kuvita, navio ni vitahera mba. 35Kunangwa mutaleki uvuruviliri vwinyu mba, kigira voletaa madanyi manene ligali. 36Gamuduukira muve nu vwikuziri, kunangwa muduuki kokora uvulariri vwa Nyasaye, kandi munyore via Nyasaye amulagaa. 37Mang'oda Matakatifu gavoora,
“Itigaaye ing'inga engekeeke vuzwa,
kandi uyu uzaa alaza kandi sialalindagilira mba.
38Navuzwa avandu vange valungi valava mwoyo kigira lisuuvira;
niiva mulala kuvo yirana inyima,
mwoyo gwange sigulamuyaanza mba.”
39Kunyi sikoveeye avandu viranaa inyima kuduuka mulidiva mba; navuzwa koveeye ku yavo avaveeye ni lisuuvira kandi vahonywa.
Lisuuvira
Currently Selected:
VAHEBURAINA 10: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
