VAEFESO 6

1Avana muhuliri aviivuli vinyu mu Mwami, kigira yili iliveeye lirungi ku munyi kokora. 2“Haane luyali ku baba winyu na mama winyu.” Yili liveeye lilaga liu kutanga iliveeye ni lisuuvirizwa. 3“Kunangwa goosi gaduuki kuva vulahi kumunyi, kandi muduuki kuhindira mu lirova.”

4Munyi aviivuli, mutakola avana vinyu kuva nu vutima, navuzwa muvavirukizi kandi muvalindi mu liegiza kandi mu lieganihiza liu Vukristayo.

Avatugwa na vanene vaavo

5Munyi avatugwa muhaane luyali ku vanene vinyu vu mu lirova kandi muvatie ligali. Mukore ndio nimioyo jinyu josi kuli mukutumikiraa Kristo. 6Vutava vutumiki vwu kuyanziza vandu kigira mwenya vamuvugiliri mba, mukore kuli Nyasaye yenya nimioyo jinyu josi. 7Mukore miyinzi jinyu kuli vatugwa nu vuyanzi, kuli mwaali nimutumikira mwami; kandi gatava kuli mwatumikira mundu mba. 8Mwizurizi ndi, Mwami alakahaane madanyi ku mundu woosi ave mutugwa anoho muvoholore.

9Munyi avami, muvakolere avatugwa vinyu vindu zana yivi kandi, munzira ndala nzere vugira kutumikira litihiza. Mwizurizi kumanya ndi munyi harara na avatugwa vinyu muveeye nu Mwami mulala mwigulu, ukalagiraa mundu sa mulala keleng'ani vugira liyanzilira liosi.

Viuma viosi via Nyasaye

10Agekeheri, avaamitu vange muve nizinguru mu Mwami kandi mu vonene vwi zinguru zizie. 11Mwiviki viuma viosi via Nyasaye amuhezaa, kunangwa muduuki kuhingira ku vudamanu vwa Setani. 12Uvulwani vwitu sivoveeye ku avandu, navuzwa ku mahi ga mademoni gu muvwerefu, uvwamihi, uvunyali kandi ku yavo avamiiha kivala chi kisundi yiki, 13Kigira yaga, mwiviki viuma viosi via Nyasaye, muduuki kunyala kuhingira uvulwani vwu musigu mu madiku madamanu kandi nimumaliyi kulwaana kuduuka ku keheri, mulasingira vudinyu.

14Kunangwa singiri vudinyu ni mwevohi agiligali kuli umusibi mu vikenge vienyu, kandi ni mwiviki uvulungi kuli isalamba, 15kandi kuli vilatu vienyu mu virenge, mwetegeke kwilwaza Ivangeri yi mirembe. 16Kuvita yaga goosi, mugiingi inguva yi lisuuvira kazozo, ya mulinyala kusiminyira uvuta ni mivano josi ju muliru ju mudamanu. 17Mwiviki igudwa yo vohonyi, kandi muvuguli kivavi cha Roho Mutakatifu, nacho ke veeye likuva lia Nyasaye. 18Musaale zing'inga ziosi kuli Roho amwimilira; nimusavaa vokonyi ku Nyasaye, kigira yaga goosi mwetegeke kandi mutakuzi mioyo mba. Muhongere mu lisalira vandu va Nyasaye kazozo. 19Musaliri kandi kunangwa Nyasaye aduuki kuhaana ku inzi chanyala kovora lwa moloma nuvuluviliri, nokuvuula agaviswa gi Ivangeri. 20Kigira Ivangeri yiyi inzi mbeeye mutumwa kali niiva mbeeye muvuhambe kalunu. Musaliri nduuki kugevoola novuluviriri mu lilwaza Ivangeri kuli gandukira kovora.

Licheliza lio kumaliriza

21Tukiko, amiitu wiitu muyanze, kandi oveeye mutumikiri musuuvirifu mu miyinzi ju Mwami, alamuvolera vindu viosi kigira inzi, kunangwa munyi muduuki kumanya kuli nzizagilira. 22Yiki nicho kivuni kijiri nimutuma ku munyi muduuki kumanya kuli kunyi kuzizagiliraa kandi amudinyirizi.

23Nyasaye Baba kandi Mwami Yeso Kristo ahaane mirembe, uvuyanzi kandi lisuuvira ku avaamitu Vakrisitayo vosi. 24Zimbavasi zia Nyasaye zive na yavo vosi avayaanzaa Mwami wiitu Yeso Kristo, ni liyaanza litaveeye ne keheri.

Currently Selected:

VAEFESO 6: LOGOOLI

Highlight

Copy

Compare