VAFILIPI LITANGILIRA
LITANGILIRA
Ibarwa ya Paolo yaahira ku Vafilipi yang'oderwa Likanisa liukutanga lia Paolo yatangiza mu kivala chi Ivulaya, mu kivala cha Makedonia, losoma lwamiifwaa na Varumi. Ibarwa yiyi yang'odwa lwa mutumwa yaali muvuhambe ahimbi muhiga gwa 61 A.D. kandi ku ing'inga ya yaadambizangwa nu vuhing'ani vwa vayinziri Vakrisitayo vandi. Amigizu gu vugadi agaali mu Likanisa lia Filipi gamuveleriza ligali. Ibarwa yiyi eleetaa uvusangari kandi vusuuvirifu uvunyala kwivaalwa vuzwa ni lisuuvira linene lia Paolo aveeye nalio mu Yeso Kristo.
Kivuni kenene chagira ibarwa yiyi neng'odwa chaali ukusandiza Likanisa lia Filipi ku kihanwa cha vaali nivamutumiyi kumukonya mu ing'inga ya yaali niyenyaa vokonyi. Paolo atumikiraa uvwiyangu yivu kuvasuuviriza kandi kuvadinyiriza kali nivaveeye nu uvudinyu vwavo aveene na Paolo mwene. Avagoonyaa vave niliiva lio vogoosi no vohoma vwa Yeso, kuvita kwamiifwa ni liegomba lie vindu vie lirova: uvwimani, ilieyenyera kandi liekonya. Avizulizaa ndi ilivamwoyo liavo mu Kristo Yeso liveeye kihanwa chi zimbavasi zia Nyasaye, icha vamali konyoora kuvitira mu lisuuvira, sigaveeye kuvitira mu liitia ni lilonda imiima ji Lilaga lia Vayuda mba. Ang'odaa kigira mirembe nu uvusangari vwa Nyasaye ahaanaa ku yavo avamenyaa mu Kristo. Ibarwa yiyi yamanyikana ku lidinyiriza, uvusangari, vusuuvirifu, uvuhambani, nu vwikuziri mu lisuuvira liu Vukristayo kandi livamwoyo. Ivuulaa kandi uvuyanzi vonene vwa Paolo yaali navwo ku Likanisa liveeye ha Filipi.
Agaveeye mu kitabu yiki
Litangilira 1:1-11
Agekoleka ku Paolo mwene 1:12-26
Livamwoyo mu Kristo 1:27—2:18
Lilohiza logendo lwa Timateo na Epafurodita 2:19-30
Lieganihiza kigira avasigu kandi uvuhiimwa 3:1—4:9
Paolo na valina veve va Filipi 4:10-20
Limaliriza 4:21-23
Currently Selected:
VAFILIPI LITANGILIRA: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019