VAEFESO 5

1Kigira muveeye avana avayaanze va Nyasaye, kuduuka kuva kuli aveeye. 2Livamwoyo lienyu kuduuka liamiifwi nu vuyanzi kuli Kristo yakuyaanza nahaana livamwoyo lilie mwene kigira kunyi kuli kihanwa kifunyaa mwayu mulahi kandi sadaka yukuyaanziza Nyasaye.

3Kigira munyi muveeye vandu va Nyasaye, sivaveeye vulahi amakuva goosi go voheyi, anoho komenya mu miima midamanu jovoheyi, anoho likayirwa, nu uvuviti vitalwe hagati hinyu kali hakuzu mba. 4Kifavwi, anoho amakuva gi zisoni nu guvusiru, anoho amahing'ani, anoho zimbaka, sividukana munyi kuvitivula mba, navuzwa nivulahi musandizi Nyasaye. 5Kigira yaga muve nilimanya ligali ndi, umuheyi woosi anoho utaveeye munifu mu miima, muhuvaali, wi vifananyi mukayirwi, siaveeye nilisanga mu vwami vwa Kristo kandi vwa Nyasaye mba.

6Mutaleka mundu kali mulala amugaade na makuva gu vusiru mba; gaveeye kigira vindu yivi uvutima vwa Nyasaye vuduuka ku avandu vosi avavuraa kumutia. 7Kunangwa mutava ni lisanga harara na avandu kuli yava mba. 8Maziambiri, munyi mwali mu kisundi, navuzwa kalunu muveeye nu vulavu mu mwami; kunangwa kuduuka mumenye kuli vana vu vulavu. 9Likuyu liu vulavu linyoolekaa mu goosi gaveeye malahi, malungi kandi agiligali. 10Mugerizi kwiga agayaanziza Mwami. 11Mutava ni lisanga ni miyinzi ji kisundi ijitaveeye nu vukala mba, navuzwa nivulahi mujichaye havulavu. 12Ziveeye zisoni kali kovora vindu via vandu vatatizaa Nyasaye vakora mu vwivisu. 13Navuzwa lwi vindu viosi viletwaa ku vulavu, ahene yaho liiva liavio lieligali livuulikaa havulavu; 14Kindu choosi ikivuuliywi havulavu kigwizaa uvulavu. Yiki nicho kigira nigavooleka,

“Vuka, O, ivi ugonaa,

simuguka kutura mu likuza,

kandi Kristo alang'ereng'ana ku ivi.”

15Kigira yaga, muhenze vulahi kuli mumenyi. Mutamenya kuli avandu vasiru, navuzwa kuli avandu vovogeri. 16Mutumikiri vulahi uvwiyangu vwa muveeye navwo ku likora vulahi, kigira zing'inga yizi ziveeye zidamanu. 17Kigira yaga, mutava avasiru, navuzwa mugerizi kumanyiriza uvulariri vwu Mwami.

18Mutahambika iwaini mba kigira imanya imudivizi; navuzwa mwizuli Roho du. 19Muvolerane aveene naveene makuva gi zizaburi, muzinyimbu kandi mu zinyimbu zindakatifu. Mwimbi zinyimbu kandi zizaburi ku Mwami ni lizominya mu mioyo jinyu ku Mwami. 20Mwizominye kandi muhaane lisandiza kazozo ku Baba Nyasaye kigira vindu viosi mu lieta liu Mwami wiitu Yeso Kristo.

Kuli avakali na vasaza vaduukana vamenye

21Mwegehizirane aveene naveene mu liitia Kristo.

22Munyi avakali, mwegehizi ku vasaza vinyu kuli munyala kwegehiza ku Kristo. 23Musaza aveeye mutwi gwu mukali kuli Kristo aveeye mutwi gwi likanisa kandi aveeye muhonyi wilikanisa, iliveeye kuli muviri gwigwe. 24Kuli likanisa liegehiziraa Kristo, kandi ndio kuduuka avakali vegehizi ligali ku vasaza vaavo mu vindu viosi.

25Avasaza muyanze avakali vinyu kuli Kristo yayanza likanisa naalikuzira. 26Yakola yaga aduuki kulitakasa ku Nyasaye ni likuva lilie, lwa mali kulinihiza na amazi 27aduuki kwenyolera likanisa liu vukumi litaveeye nimbara anoho makunya anoho kindu kidamanu kuli yivi. 28Na ndio kandi avasaza kuduuka vayanze avakali vaavo kuli vayaanza miviri jaavo aveene. Musaza uyanza mukali weve, yiyanzaa mwene. 29Sihaveeyeho nu mundu ku vosi uvihiliraa inyama yu muviri gwigwe mwene mba; navuzwa agulihizaa kandi agodenda, kuli Kristo adendaa likanisa, 30kunyi koveeye vivero viu muviri gwigwe. 31Kuli Mang'oda Matakatifu gavoora, “Kigira yaga, musaza alaleka baba na mama weve naye alahambanywa nu mukali weve. Yava vaviri valagwa muviri mulala.” 32Agiligali gaviswa yaga gaveeye manene, navuzwa gaveeye kelolero cha Kristo ni likanisa. 33Gaveeye ndio ku ivi; kandi musaza sa mulala ayaanze mukali weve kuli mwene yiyaanza, kandi mukali kuduuka ahaane luyali ku musaza weve.

Kuli avana na aviivuli vaduukana vamenye harara

Currently Selected:

VAEFESO 5: LOGOOLI

Highlight

Copy

Compare