KOHELEZU 8
8
1Nivwaha oveeye kuli mundu mugeri?
Kandi nivwaha umanyi livaala lie vindu?
Vogeri volomba mumoni mwu mundu kong'ereng'ana
kandi vugilunganyia lidunya liu mumoni mwimwe kuva liemwenyera.
Liitia Mwami
2Utie lilago liu mwami, kandi utalomba lilagana lia vwangu ku Nyasaye mba. 3Mwami anyala kokora kindu choosi chayaanzi, kulwayago tula imbiri weve. Utava ha vundu hu vuhimwa kuli yaaha mba. 4Mwami yamiha nu vunyali na si aveeyeho nu mundu unyala kuhing'ana ni kindu chavoola mba. 5Oyo utizaa malago geege sialasalira mba; zing'anagani ziu mundu mugeri zimanyaa ing'inga kandi inzira yo kokora kindu. 6Koveeyeho ni ing'inga inungi kandi inzira indahi yokokola vuli kindu, navuzwa limanya lietu liveeye likekeeke. 7Si koveeyeho nu mundu umanyi kindu kizizaa kwekoleka mba, kandi siaveeyeho nu mundu unyala kokovoolera mba. 8Siaveeyeho nu mundu unyala kwigalira likuza anoho oveeye ni zinguru ku lidiku lielikuza lilie mba. Yivu nu vulwani vwakunyala kuvula kohononoka kutura kuvwo; sikunyala kwigaada mba.
Avandu Vachamu na Valungi
9Ndaalora yaga goosi lwa ndaganagana kigira vindu viekoleka mu kivala yiki, kivala cha vandu valala vaveeye ni zinguru na vandi vasalira kigira yavo. 10Yee, mali kolola vandu vachamu vayavirwa mu vilindwa viavo, navuzwa kunzira lwa vaturaa kuvayavira, vavizominya mu madaala malala mele mwa vakolera vudamanu: Yaga gaveeye vuzwa.
11Lwi likalaga liu vudamanu livulaa kwekoleka vwangu, vandu vetegeka kokora vudamanu. 12Kali umwoni nakora vudamanu haali 100, navuzwa amenyaa ing'inga indambi. Oh yee, ndaamanya gavavoraa, “Niiva ulatia Nyasaye, vuli kindu choosi kilava kilahi, 13navuzwa sinavove vulahi ku vachamu mba. Livamwoyo liavo liveeye kuli chiriri, kandi valakakuzi ni vakikiri avayaayi, kigira si vatizaa Nyasaye mba.” 14Keveeho ni kindu kindi keveeye vuzwa mu kivala. Ing'inga yindi mundu mulungi anyoora mageri gu mundu muchamu, kandi mundu muchamu anyoora madanyi gu mundu mulungi adukanaa anyoore. Yaga kandi gaveeye vuzwa.
15Kunangwa suviraa ndi, mundu gakuduukiraa wiyaanzizi, kigiri lieyaanziza lia koveeye nalio mu livamwoyo lietu, nu kulia kandi kunwa nukusangara. Kunyala kokora ndio lwa kuyinziraa vudinyu ku ing'inga yi livamwoyo lia Nyasaye amali kukuha mu kivala yiki.
16Lwa ndaageriza kuva mugeri kandi kumanyiriza kizizagiliraa mu kivala, ndaamanya ndi nyara kuva vugira zindoolo vudiku nu muvasu. 17Kandi si ndaali nyara kumanyiriza kindu cha Nyasaye akolaa mu kivala mba. Kali niiva ndaageriza vudinyu, mundu siyaali unyala kumanya mba. Kali niiva vandu vageri vavoola vamanya, nuvuzwa sivamanyi mba.
©Bible Society of Kenya, 2019