KOHELEZU 9
9
Likuza ku Vandu Vosi
1Ndaaganaganyia ligali ku ing'inga indambi ku vindu yivi viosi, kandi ndaalora ndi Nyasaye yimiliraa vikolwa via vandu vageri kandi vandu valungi, kali kuduuka mu liyaanza liavo kandi mu lidunya liavo. Sihaveeyeho nu mundu umanyi kiveeye imbiri weve mba. 2Sihaveeyeho ni liavukana mba. Kivi kilala chere keveeye ku mundu mulungi kandi keveeye ku mundu muchamu, ku mundu mulahi kandi ku mundu mudamanu. Ku yavo avamanya idini, kandi ku yavo vatamanyi idini, ku yavo vahaana visiuviliru kandi ku yavo vatahaana. Mundu mulahi siaveeye mulahi kuvita mwoni mba; uyu wisuhaa siaviti uyu utisuha mba. 3Vosi valanyora kivi kilala chere, yiki ni kindu kidamanu kuli vindu viekoleka mu kivala yiki. Lwa vandu vakemenyi mu kivala yiki, zing'anagani ziavo ziayizula vudamanu nu vulalu, nonoho vakuza. 4Navuzwa uyu oveeye mwoyo mu kivala chu vulamu aveeye ni lisuuvirizwa; imbwa eveeye mwoyo eveeye indahi kuvita isimba ikuzi. 5Yee, avandu vaveeye mwoyo vamanyi ndi vazizaa kukuza, navuzwa vakuzu si vamanyi kindu mba. Sivaveeye na madanyi gandi mba; vayivilirwa ligali. 6Vuyanzi vwavo, liduunya liavo kandi liegomba liavo, viosi vikuza harara navo. Sinavive ni lisanga ni vindu viekoleka mu kivala yiki mba.
7Uzizagiliri kulia chukulia chicho kandi usangale; Unwi iwaini yooyo kandi ove nu vusangali. Goosi gaveeye malahi ku Nyasaye. 8Ove nu vuyanzi kazozo kandi usangale. 9Ove nu vusangali nu mukali wa uyanzaa lwa umenyi livamwoyo lia vuzwa mu kivala cha Nyasaye akoheeye; usangaliri vuli lidiku kali live litaduukanaa kigira yiki nicho kidieli mu livamwoyo liilio kandi miyinzi ja makono googo mu kivala yiki. 10Uyinziri vudinyu miyinzi josi jokolaa kigira si kilakave ho ne kekolwa, zing'anagani, limanya kandi vogeri mu kivala cha vakuzu mba. Wene yeyo ni yio wa uzizaa.
11Ndaamanyiriza kindu kindi ndi, mu kivala yiki, avandu vanyagura vwangu, sivaveeye vosi avagutaa mu zimbiru mba, kandi avandu vaveeye valuviriri sivagutaa mu vulwani ing'inga yoosi mba. Avandu vageri sivanyoolaa chukulia mba kandi avandu vilimanya sivanyoola vutugi kazozo mba. Avandu vinyaliza sivanenehizwa vuli ing'inga kuva igulu wa vandi mba. Inga indamanu yiza ku vuli mundu. 12Siulamanya lwi ing'inga yooyo yiza mba. Kuli linyonyi ligimilwa mu mutego, kuli isuzi igimilwa mu muluvo, kwamala kugumirwa mu mutego ing'inga indamanu ya kutaganaganaa.
Zing'anagani ku Vogeri nu Vusiru
13Mali kolola kandi kimanyiru kindi kilahi kuli vogeri vololekaa kuva mu kivala yiki. 14Liali ho ni lidaala likekeeke liavula kuva na vandu vanyingi. Mwami wi zinguru yalingilira; yalikumbeliza kandi yetegeka kuduya madigi ga lio. 15Mundu mudaka yamenya mu lidaala yilio. Mundu oyo yaali mugeri ligali, waali unyala kuhonyia lidaala yili, navuzwa siyaaliho nu mundu wamuganagana mba. 16Ndaamenya ni ndavoora ndi, ovogeri voveeye vulahi kuvita zinguru, kali niiva ovogeri vwu mundu mudaka vuchayangwa, kandi makuva geege sigahulirizwaa mba. 17Ni vulahi kuhuliriza miigizu ga galaha gu mundu mugeri kuvita kuhuliriza lihanzuka liu mwamihi wenyaa ovokonyi hagati ha vasiru. 18Ovogeri voveeye vulahi kuvita viugi viu vulwani, navuzwa mwoni mulala yononyia vindu vilahi vinyingi.
©Bible Society of Kenya, 2019