KOHELEZU 7
7
Kindu Keveeye Kilahi ku Mundu mu Limenya
1Lieta lilahi liveeye lilahi kuvita maguta guvuguli, kandi lidiku lie likuza liveeye lilahi kuvita lidiku liu kwivulwa.
2Nivulahi kuzia munyumba ya vasioma kuvita kuzia munyumba yu kulia nu kusangara, kigira likuza nicho keheri cha vandu vosi. Avandu vaveeye mwoyo gavadukiraa kumanya yaga.
3Liverera liveeye lilahi kuvita liyaanza kigira lilomba mumoni mumwo muva novovereri, navuzwa likolomba uve ni limanyiriza.
4Zing'anagani ziu mundu mugeri ziveeye kunyumba ya vandu vasioma, navuzwa zing'anagani ziu mundu musiru ziveeye kunyumba eveeye ni lisangala.
5Nivulahi mundu kuhulira lieganihiza liu mundu mgeri kuvita kuhulira lwimbu lwa vandu vasiru.
6Lwu mundu musiru asekaa gavee kuli amafwa gatulikaa mu inyingu eveeye kumuliru. Yaga gaveeye vuzwa.
7Lidambiza lilomba mundu mugeri kuva musiru kandi viambeti viononyia zing'anagani.
8Limalirika lie kindu liveeye lilahi kuvita litanga liacho, kandi liekuzira liveeye lilahi kuvita lielola.
9Utava nu vutima vwa vwangu mba, kigira mundu musiru vutima.
10Utateva, “Oh kigira ki vindu vialange vilahi ligali mu madiku ga kale?” Liteeva kuli yili liveeye liuvusiru.
11Ovogeri voveeye vulahi kuli konyoora miandu; viletaa vukala ku yavo avamenyi mu kivala. 12Ovogeri vulakukinga kuli mabese, navuzwa vulahi vwi limanya vogeri vulindaa livamwoyo lia oyo oveeye navwo.
13Uganagane ku vindu via Nyasaye amali kokora. Nivwaha unyala kulungikiza kindu cha Nyasaye amali kovedekiza? 14Lwi vindu viveeye vilahi ku ivi usangale, navuzwa lwu vudinyu vuzaa ku ivi wizulizi ndi Nyasaye aletaa vusangali kandi vudinyu. Mundu sianyala kumanya kindu kizizaa kwekoleka mu madiku gaaza mba.
15Limenya liange liveeye lia vuzwa, navuzwa mali kolola vindu viosi. Koveeye ho nu mundu mulungi ukuza mu vulungi vwivwe kandi koveeye ho nu mundu muchamu omenya madiku manyingi nokokola vindu vidamanu. 16Utava mulungi mbitilira mba, kandi otekola mugeri mbitilira mba. Kigira ki widivizi? 17Utava muchamu mbitilira anoho utava musiru mbitilira mba. Kigira ki ukuzi madiku googo nigakikiri kuduuka? 18Welehe ku vuchamu kandi ku vusiru. Niiva ulatia Nyasaye, ulanyora vuguuti kazozo.
19Ovogeri vuhaana zinguru ku mundu mugeri kuvita vamiihi likomi avaveeye mu lidaala linene.
20Siaveeye ho nu mundu mulungi mu kivala okolaa vulungi ing'inga yoosi, kandi uvula kokora vudamanu mba.
21Utahuliriza vindu viosi via vandu vavoola mba gase ulahulira mutumikiri woovo namoloma vudamanu. 22Ivi umanyi vulahi ndi wamoloma vudamanu ku vandu vandi haali kanyingi.
23Ndaatumikira vogeri vwange kumanya yaga goosi. Ndaatovora kuva mugeri, navuzwa vwali ihale kutura kuinzi. 24Mundu anyala ndi kumanya kivuni chi livamwoyo. Yaga gaveeye madinyu ku kunyi kandi madinyu kumanyiriza. 25Navuzwa ndaviika zing'anagani ziange kwenyeleriza no kohenzeriza. Ndaatovora kwenyeleriza ovogeri kandi mativuli ku mateeva gange, kandi kwiga kuli vuchamu nu vusiru voveeye.
26Ndanyoora mukali kuva mudamanu ligali kuvita likuza; vuyanzi vwaveeye navwo kuivi vulakugumila kuli mutego anaho kuli muluvu; kandi makono geege galakugumila kuli munyororo. Mundu uyanziza Nyasaye alahononoka, navuzwa alagumila mwoni.
27Yee, mwilwazi yavoola, ndanyoora yaga galaha mu vika lwa ndaali nenyenyelizaa mativuli. 28Mali kwenyeleriza mativuli gandi, navuzwa sindaganyoola mba. Ndanyoora mundu mulungi mulala kutura mu vandu 1,000 wa ndaali nyara kuhaana luyali kuye, navuzwa mu vakali vosi sindanyoola mukali mulungi kali mulala mba. 29Yaga goosi nigo gamali kwiga. Nyasaye yakolomba vandu valungi, navuzwa kwagirung'ana kuva novogeri kuvita kuli Nyasaye yakolomba.
©Bible Society of Kenya, 2019