LIZULIZA 33
33
Musa Yagasiza zihiiri zia avandu va Isiraeli
1Yivu nivwo uvugasu vwa Musa, mundu wa Nyasaye, yagaasizira avandu va Isiraeli nakikiri kukuza.
2Yavoola:
“Yahova yaza kutura mu kiguru cha Sinai;
yatonga kuli liuva kutura Edomu,
kandi yang'ereng'ana ku avandu veve
kutura ku kiguru cha Parani.
Zingelosi zielefu kumi ziali harara naye,
na umuliru gwaadukaa gwaali ha mukono gwigwe mulungi.
3Yahova ayaanza avandu veve
kandi akingaa yavo avaveeye aveeve.
Kunangwa kusigama ha virenge vivie,
nukuhulira malago geege.
4“Kunyi kolondaa Lilaga lia Musa yakuha.
Liveeye mwandu gwu vuguli vonene ku ihiiri yitu.
5Yahova yagwa Mwami munene wa avandu veve Isiraeli
lwi zihiiri ziavo na aviimiliri vaavo vavuganywa harara.”
6Yahova, leka Rubeni ahindiri
kandi umulindi kutura ku Likuza
kali vandu veve avaveeye vakekeeke.
7Yavoola ku ihiiri ya Yuda:
“Yahova huliriza lianira liavo kigira vokonyi;
uvahambanyie harara ku avandu vi zihiiri zindi
Uvalwaanire O, Yahova,
Kandi uvakonye ku avasigu vaavo.”
8Yavoola ku ihiiri ya Levi:
“Ivi, O, Yahova, vuula uvulariri vuvwo mu litumikira Urimu na Zumimu#33:8 Urimu na Zumimu: Henza kutura 28:30. yooyo.
Kuvitira mu vatumikiri vovo vasuuvirifu, Avalavi.
Wavageriza ha Maasa
kandi wavalolekiza wavanyoola kuva aviligali
ha mazi ga Meriba.
9Vamanyia uvusuuvirifu vonene ku ivi
kuvita ku aviivuli vaavo, avamwavo,
anaho avana vaavo vahulira malago googo
Kandi vaali avasuuvirifu ku Lilagana liilio.
10“Valigiza avandu vovo kuhulira Lilaga liilio;
valahaana visiuviliru ku vwali vuvwo.
11Yahova, konya ihiiri yaavo vave avizingulu;
uyaanzizwi ni cha vakora.
Duvulanyia avasigu vaavo vosi;
leka vavuli kusingira kandi mba.”
12Musa yavoola ku ihiiri ya Benjamini;
“Yiyi ni ihiiri ya Yahova ayaanza kandi akingaa;
Avalindaa mbasu gwosi,
Kandi amenyaa hagati haavo.”
13Yavoola ku ihiiri ya Josefu:
“Yahova agaasizi kivala chavo niimbura
Kandi na mazi gaturaa isi wi lirova.
14Kivala chavo kigaasizwi na makuyu,
makuyu malahi ligali zing'inga ziosi.
15Vigulu viavo via kale vizuri
amakuyu malahi gatovoleywe.
16Kivala chavo chizuli vindu viosi viveeye vilahi.
Ikigaasiziywi nu vugasu vulahi vwa Yahova Nyasaye
uwamoloma kutura mu kisaka chaadukaa muliru.
Uvugasu yivu vuduuki ku ihiiri ya Josefu.
Kigira yaali mwimiliri hagati ha avamwavo veve.
17Josefu aveeye nizinguru kuli zie igiriki.
Zinziga zie igiriki yumuvulimu.
Zinziga zizie ziveeye zielefu zia Manase,
kandi zielefu likomi va Efuraimu.
Alatandula zihiiri nazio.
Kandi avalumbaa kuduuka ku keheri chi lirova.”
18Ku zihiiri zia Zabuloni Isakari yavoola:
“Leka Zabuloni ave ni limeedeka mu ikiranyia viavo kunyanza,
kandi vutugi vwa Isakari vomeedeke hango hinyu.
19Valagenihiza avageni ku kiguru chavo
kandi valahaana vihaanwa vilungi ukwene yikwo.
Vanyola vutugi vwavo kutura kunyanza
kandi kutura ku muyeke goveeye ku lujinga lwinyanza.”
20Yavoola ku ihiiri ya Gadi:
“Nyasaye yizominywi, wakola kivala chavo kuva kenene.
Gadi agonekaa kuli isimba
kutandura mukono anoho lwote.
21Vivugulira aveene mu kivala kilahi ligali kuvita.”
22Yavoola ku ihiiri ya Dani:
“Dani aveeye mwana wi simba;
atuumaa ichova kutura Bashani.”
23Yavoola ku ihiiri ya Nafutali:
“Nafutali agaasiziywi nu vutugi
ni liyaanzilira lilahi lia Yahova;
kivala chavo kiduukaa isavaalu kutura kunyanza ya Galilaya.”
24Yavoola ku ihiiri ya Asheri,
“Asheri agaasiziywi kuvita zihiiri zindi.
Leka ayanzwi na avamwavo veve,
kandi kivala chiche keve kitugi ni misaala ja mizeituni.
25Amadara geege gakingwi
ni virivwa vie kivia ni migasa
kandi aduuki komenya mu mirembe.”
26Avandu va Isiraeli, sihaveeye ho
na nyasaye kuli Nyasaye winyu mba,
uhiraa barasi mu malesi kuuza ku likonya lienyu.
27Nyasaye aveeza likingwa lienyu kazozo.
Amakono geege gimihiga ni mihiga gaveeye vokonyi vwenyu.
Yakunga avasigu vinyu lwa mwavingilira,
kandi namuvolera muvadivizi vosi.
28Kunangwa visukululwi via Yakobo viamenya mu mirembe
vilava nu vweremerizi mu kivala ichizula uvuswage ni iwaini,
lime kutura muvwerefu liletaa amazi ku lirova!
29Ugasiziywi, O, ivi Isiraeli!
Siaveeye ho numulala oveeye kuli ivi,
ihiiri yahonywa na Yahova?
Yahova aveeye kivavi chienyu kandi inguva yinyu
alamukinga kandi alamuha liguuta.
avasigu vinyu valaza kumuteeva zimbavasi.
Currently Selected:
LIZULIZA 33: LOGOOLI
Highlight
Copy
Compare
Share
Want to have your highlights saved across all your devices? Sign up or sign in
©Bible Society of Kenya, 2019
