LIZULIZA 32

Lwimbu lwa Musa

1“Ligulu ni Lirova, huliri amakuva gange muhulirizi vulahi agambooraa.

2Amigizu gange galakuba kuli zingelegeliza ziembula

kandi limoloma liange litonyatonye ku lirova kuli lime,

Makuva gange galaaza kuli lunyilira ku vitagwa vidoto,

kuli ulunyilira ku uvunyasi vodotodoto.

3Ndizominya lieta lia Yahova

kandi avandu veve valivoola ago ovonene vwivwe.

4“Yahova aveeye mukingi munene winyu,

muduukiru kandi mulungi mu zinzira zizie ziosi.

Nyasaye winyu aveeye musuuvirifu kandi wagiligali;

akolaa agaveeye malungi kandi amalahi ku vandu vosi.

5Navuzwa munyi simuveeye avasuuvirifu mba

kandi simuduukani kulangwa avandu veve mba,

ihiiri yuvwoni kandi yuvugaadi.

6Ni ndi munyala kokolera Yahova

munyi avandu vasiru kandi vataveeye novogeri!

Aveeye Baba winyu, mulombi winyu

yalomba munyi muve ihiiri.

7“Muganagane ku agaavita, agizing'inga zia kale ligali,

muganagane mihiga ja makura manyingi

muteeve avababa vinyu vamuvolere ageekoleka.

muteeve avasaakulu vinyu vamuvolere gi zing'inga zia kale.

8Oveeye Igulu Ligali kuvita yahaana zihiiri milimi jaavo.

Yavukanyia avandu vosi,

yavavikira zinzako ziavo kolondekana nilivaliza lia avandu va Isiraeli.

9Kidieli cha Yahova keveeye avandu veve

visukululwi via Yakobo viveeye miandu jije.

10“Yavanyoola nivagendagendaa mu changalangwe,

mwigendanyama mwe kesoma kenene ni mbuuza

yavakinga kandi yavalinda,

kuli anyala kukinga endolero yemoni yeeye.

11Kuli kihungu chigizaa avana vacho kuburuka,

kivagumilira vulahi kuzimbaha ziacho nizivambuki,

nindio Yahova yalinda vandu va Isiraeli vavuli kugwa.

12Yahova yeng'ine yimilira avandu veve

vugira ovokonyi vwu munyasaye mugeni.

13“Yavaleka vamiihi vivala vievigulu,

kandi valia iviamo viu mu milimi.

Vanyoola uvwuki vwu mbulimu kutura hagati hi zinyanda;

kandi misaala ja mizeituni jakola vulahi mu malova gamagina.

14Yavaha isiagi, maguta namaveere kutura ku mitugu jaavo;

zing'ombe ni zimburi ziavo ziahaana maveere manyingi.

Vaali na magondi mamigu zimburi,

nizing'ombe zindahi ligali kandi,

viayo vie mitugu ja Bashani.

Ingano indahi ligali kandi vanwa iwaini imbia.

15“Avandu va Yahova vaagwa avatugi, navuzwa avibaali.

Vakomera kandi vaali ni viukulia vinyingi.

Valeka Nyasaye wavo uwavalomba,

kandi nivasuula muhonyi wavo wi zinguru.

16Lisigamira vanyasaye vandi liakendekiza Yahova,

vudamanu vwavo vwakola Nyasaye kuva nu vutima.

17Vahaana visiuviliru ku vanyasaye vitali vigiligali;

ku avanyasaye vageni va avaguuga vaavo vavura kumanya,

avanyasaye va Isiraeli vavura kolonda malago gaavo.

18Vivilira Nyasaye wavo, muhonyi wi zinguru wavo.

Uwavaha livamwoyo.

19“Lwa Yahova yalora yaga, yavihilirwa

kandi yasura vakana na vayaayi veve.

20Yavoola, ‘Sindavakonya kandi mba’

kandi ndalora ichaaza chekoleke kuvo kigira vaveeye likula lie kirage,

kandi sivaveeye vasuuvirifu mba.

21Harara nifananyi viavo,

vamali kongola mbe nu vutima,

vamali kungola kokendekela vanyasaye vaavo

vanyasaye vataveeye vagiligali kunangwa,

ndatumikira ihiiri kuvakola vave nu vutima,

Ndavakora vandekele ihiiri yavandu vasiru.

22Vutima vwange vuladuuka kuvo kuli muliru

kandi vulasaamba vindu viosi ku lirova.

Vuladuuka isi wikivala vakuzu nu kuhakiza misingi ji vigulu.

23“ ‘Ndaleta amaduywa gataveeye nekeheri kuvo.

24Valakuza kigira inzara kandi luhuuza.

Valakuza kigira zinguzu ziu kutihiza.

Ndatuma zinyama zinduru ziu mumulitu kuvingilira

kandi zinzoka ziu vusungu vululu kuvaluma.

25Liihi lilaleeta likuza mu zinzira;

litihiza linene lilavingilira mu zinyumba.

Avayaayi na vakana valakuza;

avana vadoto anaho avasaakulu sivalalekwa mwoyo mba.

26Ndakavadivizi ligali,

kunangwa avuli kuva ho nu uvizuliza.

27Navuzwa sindakaleke avasigu vaavo vigingiri,

ndi vamali kuguuta avandu vange,

lwa yaali ninzi Yahova mwene umali kuvasionolanyia.’

28“Isiraeli vaveeye ihiiri itaveeye niziganagani

kandi sivaveeye novogeri kali hakuzu mba.

29Valava novogeri, ngano vakamanyirizi yaga,

vakamanyirizi keheri chavo kilava ndi!

30Mundu mulala anyala ndi kuguuta avandu elefu ndala?

Anoho avandu vaviri vanyara ndi kuguuta avandu zielefu likomi?

Yahova Nyasaye wavo umali kuvaleka;

Nyasaye wi zinguru wavo umali kuvaleka.

31Avasigu vaavo vamanya ndi,

avanyasaye vaavo aveene vaveeye avadedekere

sivaveeye ni zinguru kuli Nyasaye wa Isiraeli mba.

32Kigira mizabibu jaavo jiveeye visivu via Sodoma;

kandi kutura mu milimi ja Gomora.

Mazabibu gajo gaveeye mazabibu guvusungu

visaganyi viacho viveeye vilulu.

33Iwaini yaavo eveeye kuli vusungu vwenzoka,

voveeye vusungu vululu vwitaa kuli vwikihirigoma.

34“Yahova yizuliza cha vasigu vaavo vamali kokora

alindiliraa ing'inga indahi yukuvaha mageri,

35Ing'inga yiza lwa valiguutwa,

ing'inga yi lidivizwa liavo eveeye ahimbi.

Lidiku lie lidivizwa liavo leveeye ahimbi.

36Yahova alakakaragiri avandu veve.

Alavererera avatumikiri veve lwa lilola zinguru ziavo nizigehaa,

kandi sihavaho nu mundu ulitigala mba,

muhambe anoho muvoholore.

37Maku Yahova alakateeve avandu veve,

‘Vaveeye haliha avanyasaye vizingulu yavo va mwasuuvira?’

38Mwavalihiza zitinya zie visiuviliru vienyu,

kandi nimuvaha iwaini vanwi?

Leki vaze, vamukonye kalunu!

Leki vanyaguli zimbiru kumukonya.

39“ ‘Inzi, kandi Inzi wengine mbeeye Nyasaye;

sihaveeyeho numunyasaye wundi oveeye wiligali mba.

Nzitaa, kandi mbana livamwoyo,

Nzataa ologoma kandi mbonyia,

na sihaveeyeho numundu unyala kuhing'ana ku icha ngolaa mba.

40Kuli ligali inzi mbeeye Nyasaye

oveeye mwoyo mihiga ni mihiga

ng'ingaa mukono gwange yigulu kandi nzisuha,

41ndi ndahiagala kivavi change kehemahemaa,

nokolola ndi uvulungi vokoleywe.

Ndavanza kisaalia ku avasigu vange.

Kandi mbane amageri ku yavo avandunyira.

42Imivano jange juvuta jilatonyatonya amasahi gaavo,

kandi kivavi change kilaviita vosi avahing'anaa niinzi

Sindaleka mundu kali mulala kuva mwoyo ulwaana niinzi;

kali vandu avizing'oma na vahambe valakuza!’

43“Zihiiri, kuduuka mwizominye avandu va Yahova

ahaanaa mageri ku yavo vosi avaviita.

Avanzaa kisaalia ku avasigu veve

kandi asamiiha uvwoni vwa avandu veve.”

44Musa na Joshua mwana wa Nuni vimba lwimbu yilu, kunangwa avandu va Isiraeli vaduuki kuluhulira.

Amigizu ga Musa gukumaliriza

45Lwa Musa yaali niyakamara kuhaana amigizu ga Nyasaye yamuha ku avandu va Isiraeli, 46yavoola, “Muve na giligali kuhulira amalago yaga goosi aga inzi mali kumuha kalunu. Mwirane kwigiza avana kunangwa vaduuki kolonde amalago yaga goosi aga inzi mali kumuha kalunu mwigizaa avana vinyu malago yaga kunangwa vaduuki kolonda amigizu goosi ga Nyasaye nu vusuuvirifu vwosi. 47Amigizu yaga goosi sigaveeye agavuzwa mba; navuzwa gaveeye livamwoyo lienyu liene. Mugalonde na mulamenya madiku manyingi mu kivala engereka wumugera gwa Jorodani icha muveeye ahimbi kukivugula.”

48Lidiku liene yilio Yahova yavolera Musa, 49“Zia ku vigulu via Abarimu mu kivala cha Moabu, kolovega lundi lwi lidaala linene lia Jeriko; niina ku Kiguru cha Nebo kandi ohenze ku kivala cha Kanaani icha mbeeye ahimbi kuhaana ku avandu va Isiraeli. 50Ulakuzira ku kiguru yicho kuli amwavo woovo Haruni yakuzira ku kiguru cha Hori muviri gwigwe gwayavilwa kuli avaguuga veve. 51Kigira vombi simwali avasuuvirifu ku inzi imbiri wa avandu va Isiraeli. Lwa mwaali ha Kidaho cha mazi ga Meriba ha Kadeshi, mu changalangwe cha Zini, munyi simwahaana ku inzi luyali imbiri wa avandu mba. 52Ulalola kivala zana kutura ihale vuswa, navuzwa siulazia kwingira mu kivala yicho, icha mbezaa avandu va Isiraeli mba.”

Currently Selected:

LIZULIZA 32: LOGOOLI

Highlight

Copy

Compare