LIZULIZA 34

Likuza lia Musa

1Musa yanigira kutura mu vireremo via Moabu kuzia ku Kiguru cha Nebo, kuduuka kondongozi kwi kiguru cha Pisiga, ivugwi wa Jeriko, nu uwene yeyo, Yahova yamumanyia kivala choosi: kivala cha Gileadi kuduuka Ivugwi wi lidaala lia Dani, 2kivala choosi cha Nafutali; vivala via Efuraimu na Manase; kivala choosi cha Yuda kuduuka imadioli kunyanza ya Meditareniani; 3kivala keveeye isavaalu wa Yuda; kandi kereremo kitulaa Zoari kuduuka Jeriko, lidaala linene lie misaala ja makindu. 4Maku Yahova yavolera Musa, “Yiki ni kivala cha ndaasuuviriza Aburahamu, Isaka na Yakobo ndi ndahaana ku visukululwi viavo. Umali kokelola, navuzwa sindaleka uzie yo mba.”

5Kunangwa Musa, mutumikiri wa Yahova, yakuzira yo mu kivala cha Moabu, kuli Yahova yaali navooye, galava. 6Yahova yaamuyavira mu livona liu Moabu kolovega lundi lwi lidaala lia Bezi-peoru, navuzwa sihaliho numundu wa umanya kilindwa chiche kali kuduuka kalunu mba. 7Musa yaali mihiga mia moja na sirini lwa yakuza. Yaali mundu wizinguru kandi zimoni zizie Ziali nizikelola vulahi. 8Avandu va Isiraeli vamusiomera ku madiku salasini mu vireremo via Moabu.

9Joshua, muyaayi wa Nuni yaali niyizuuyi ovogeri kigira Musa yaali namutovoye avuguli vogono vwivwe. Avandu va Isiraeli vahulira Joshua kandi nivalinda malago ga Yahova yaali navaheeye kuvitira ku Musa.

10Siaveeye ho nu muporofeti wundi mu Isiraeli kuli Musa mba; Yahova yamoloma naye moni namoni. 11Muporofeti wundi akikiri kokolaku vilolekizu ni viokogenyia kuli yivio via Yahova yatuma Musa akole ku Mwami wa Egebeti mba, vatumikiri veve kandi mu kivala choosi mba. 12Muporofeti wundi akikiri kuvakuho wakola vindu vinene ni iviukutihiza kuli via Musa yakola imbiri wa avandu va Isiraeli vosi mba.

Currently Selected:

LIZULIZA 34: LOGOOLI

Highlight

Copy

Compare