Zekaria 4
4
1Na ingelosi wa volerana ninze yadza ku inze hali kaviri, nokumbukidza, kuli mundu u vukidzangwa mu tsindolo tsitsye. 2Naye ya nteva, U lola ki? Na nda vola, Ndoli, henza, kinara kyetaya, kyosi kyethahabu, halala na ludavo ku isonga yakyo, na tsitaya tsitano na tsiviri kukyo; na tsitaya tsya li ne vidundu vitano na viviri vyokule ta maguta, vya li kukyo; 3na misala gyiviri gyemizeituni gya li ho ahimbi kukyo, mulala ku luvega lwomukono mulungi gwakyo, na gundi ku luvega lwomukono mmosi gwakyo 4Nda tivula nokuteva ingelosi wa volerana ninze, ni mbola, Munene wange, vindu yivi vi veye ki? 5Hene yaho ingelosi wa volirana ninze ya ntivulira nokumbolera, Ive si u manya vindu yivi vi veye ki? Inze nda vola, Auwa, munene wange. 6Ma ya ntivulira, nokumbolera, na a vola, Yili ni likuva lya Yahova ku Zerubabeli, kuvola, Si ga veye kigira ubunyali, kinga kigira tsingulu, navutswa ga veye kigira Roho wange, Yahova wa mahe a vola. 7Ive ni bwaha, O kigulu kinene? Imbiri wa Zerubabeli u la gwa kivala kyekereremu; naye a la leta ligina lyokugulira halala no kukupa isango, kuvola, Tsimbabasi, tsimbabasi, tsi ve kulyo. 8Kandi likuva lya Yahova lya duka ku inze, kuvola, 9Makono ga Zerubabeli ga mali kutema muse gyenyumba yiyi, makono gege gene yago ga la gi mala; na ive u la manya ni Yahova wa mahe wa ntuma inze ku mwinye. 10Kigira ni bwaha u legi lidiku lyevindu vikekeke? Kigira va la sangala, na va la lola Zerubabeli na a veye neplum mmukono gwigwe; yivi vitano na viviri vi veye tsimoni tsya Yahova, tsi lola yiyi na yiyi mu lirova lyosi.
11Hene yaho nda tivula, nokumuvolera, Misala gyiviri gyemizeituni gyi veye ku luvega lwomukono mulungi gwekinara kyetsitaya, nokumukono mmosi, gyi veye ki? 12Na nda tivula hali kaviri, nokumuteva, tsisya tsiviri yitsi tsyemizeituni tsi veye himbi ha vidundu viviri vyetha habu, vi hilanga maguta gethahabu, tsi veye ki? 13Naye ya ntivulira na a vola, Si u manya ni vindu ki yivi? Na inze nda vola, Auwa, munene wange, si mmanya mba. 14Ma ya mbolera, Yava va veye vaviri avavakwa a maguta, avasingira ahimbi na Yahova welirova lyosi.
Currently Selected:
Zekaria 4: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
