Zekaria 1
1
1Mu mweli gu kola gyitano na gyivaka, mu muhiga gu kola gyiviri gwe lyameha lya Dario, likuva lya Yahova lya duka ku Zekaria, mwana wa Berekia, mwana wa Ido, muprofeti, kuvola, 2Yahova ya dunyira ligali vadada venyu. 3Kunangwa u va volere, Yahova wa mahe a vola, Mu galuke ku inze, Yahova wa mahe a vola, na inze nda galuka ku mwinye, Yahova wa mahe a vola. 4Mu ta va kuli avadada venyu va li, avaprofeti vokutanga va va gambira, ni va vola, Yahova wa mahe a vola yaga, Mwirane kalunu mu leke tsinzira tsyenyu tsindamano na vikolwa vyenyu vidamano, mu vi leke: navutswa si va hulira, kandi si va mbulira, Yahova a vola. 5Yavo avadada venyu, va veye haliha kalunu? Na avaprofeti kandi va kikirange mwoyo mihiga nemihiga? 6Navutswa makuva gange na malago gange, ga nda laga avaprofeti avatumekiri vange, si ga nyola avadada venyu yavo? Navo va girunkannya nokuvola, Kuli Yahova wa rnahe ya saavira kukukolera, kuli tsinzira tsyetu, kuli vikolwa vyetu, ni ndiyo ya ku kolera.
7Ku lidiku li kola makumi gaviri na gane gomweli gwelikumi na mulala, ugu veye mweli gu langwa Shebati, mu muhiga gwa kaviri gwe lyameha lya Dario, likuva lya Yahova lya duka ku Zekaria mwana wa Berekia, mwana wa Ido, muprofeti, kuvola, 8Inze nda lola mbudiku, na, henza, mundu a ninanga ku iparasi inzakanyu, na a singira hagati hemisala gyemiyandasi gyi veye mwivona; kandi inyima wewe tsya li ho tsiparasi, tsinzakanyu, ne tsisernbe, ne tsindavu. 9Hene vaho nda vola, O mwami wange, yitsi tsi veye ki? Na ingelosi wa volerana ninze ya mbolera, Nda ku mannya ni vindu ki yivi. 10Ma mundu wa singira mu miyandasi ya tivula na a vola, Yavo nivo ava Yahova ya leta va tsie yiyi na yiyi mu lirova. 11Ma va tivulira ingelosi wa Yahova wa singira hagati hemiyandasi, ni va vola, Kwinye ku mali ku tsia viyi na yiyi mu lirova, na, henza, lirova lyosi likaye mu busosi, nelyelemeridza.
12Hene yaho ingelosi wa Yahova ya tivula na a vola, O Yahova wa mahe, kuduka inyinga ki ive u la sula kuvererera Yerusalemi na madala ga Yuda, aga u veye nobutima kugo mihiga yigyi makumi gatano na gaviri? 13Na Yahova ya tivulira ingelosi wa volerana ninze makuva malahi, makuva gokuleminya mwoyo. 14Ma ingelosi wa volerana ninze ya mbolera, Kupa lwanga, u vole, Yahova wa mahe a vola, Inze nkendekera Yerusalemi na Zioni nelikendeka linene. 15Ndunyira ligali tsihiri tsi veye nelyelemeridza; kigira nda li ni mba dunyira hakekeke, na vutswa yavo va meda lidambidza. 16Kigira yaga Yahova a vola: Mmali kwirana ku Yerusalemi netsi mbabasi; inyumba yange i lombakwa mulyo, Yahova wa mahe a vola, nomugoye gu la nyirwa ku Yerusa lemi. 17Hanzuka kandi hali kaviri, u vole, Yahova wa mahe a vola yaga: Madala gange ku ligasidzwa yili ga la meda yiyi na yiyi; Na kandi Yahova a la leminya Zioni, kandi a la tovola Yerusalemi.
18Ma nda ginga tsimoni tsyange, na nda lola, henza, tsinziga tsine. 19Na nda teva ingelosi wa volerana ninze, Yitsi tsi veye ki? Naye ya ntivulira, Yitsi netsinziga tsya sala nnya Yuda, Israeli, na Yerusalemi, yiyi na yiyi. 20Na Yahova ya mmannya avasidza vane. 21Hene yaho nda teva, Yava vadza kukola ki? Naye ya mbolera, na a vola, Yava netsinziga tsya salannya Yuda, kuduka si ha veye nomundu wa ginga mutwe gwigwe; navutswa yava vadze ku tsi tihidza nokutsana hasi tsinziga tsyavetsihiri, tsi ginga igulu tsinziga tsyavo ku kivala kya Yuda tsi duke ku ki salannya.
Currently Selected:
Zekaria 1: MBE
Highlight
Share
Compare
Copy
Want to have your highlights saved across all your devices? Sign up or sign in
©Bible Society of Kenya, 1967
