Ruth 2
2
1Na Naomi ya li nomundu ku vamwavo vomusatsa wewe mundu wetsingulu nobutugi, mu viko va Elimeleki; lieta lilye lya langwa Boaz. 2Na Ruth wa Moabu ya volera Naomi, U ndeke ntsie mmulimi, ndole ving'aleywi mu luvuva, nonde inyima wa uyu wa nyola tsimbabasi imbiri wewe. Na Naomi ya mu volera, U tsie, mwana wange. 3Naye ya tsia, na a duka na a dola ving'aleywi mmulimi inyima wa vagesi: na ga duka kuye kuduka mu kidieli kyomulimi gwa Boaz, wa li ku avenyumba ya Elimeleki. 4Na henza, Boaz yadza na a twula Bethlehemu, na a volera avagesi, Yahova a ve halala na mwinye. Navo va tivula, Yahova a gasidze ive. 5Ma Boaz ya volera mulindi wa avagesi, na a mu teva, Mukana wa bwaha uyu? 6Na mulindi wa vagesi ya tivula, na a vola, A veye mukana wa Avamoabu, wirana halala na Naomi kutwula mu kivala kya Moabu. 7Naye ya vola, U mbe munwa ndole, nku saala, nokuvungidza inyima wa vagesi hagati heviganda. Kunangwa yadza, na a honga ho kutwula mugamba kuduka kalunu, ni i ta li yikala mu inyumba hakekeke.
8Kunangwa Boaz ya volera Ruth, U hulire, mwana wange? U ta tsia kudola mmulimi gundi, kandi u ta twula hano, navutswa u menye hano ligali halala navakana vange. 9Tsimoni tsitsyo tsi henze ku mulimi yigu gwa va gesanga, na u la londa inyima wavo; na inze si nda gaya avasoleli va vule kukudira? Na lwa u veye nobuluhu, u tsie heviju vi veye, nokunwa ga vasoleli va dahi. 10Naye ya gwa mammama, na yinama ku lirova, nokuvolera Boaz, kigira ki inze nyoye tsimbabasi imbiri wowo, kuduka u nzidzuliye, na inze mbeyemugeni? 11Na Boaz ya tivula, na a mu volera, Yaga gosi ga wa kolera navizala wowo kutwula likudza lyomusatsa wowo, ga vuleki ku inze; kandi kuli wa leka dada wowo na mama wowo, nekivala kya wivulwa mu, na u duki ku avandu ava u kikiri kumanya. 12Ku miyinzi gyigyo Yahova a ku he madanyi madukanu, Nyasaye wa Israeli wa wadzira mu tsimbaha tsitsye u duke kunyola lisuuvira. 13Ma ya vola, U ndeke nyole tsimbabasi imbiri wowo, mwami wange; kigira u leminyanga mwoyo gwange, kandi kigira u volera inze mukana mutugwa wowo makuva malahi, kali ni nta veye kuli mulala ku avakana vatugwa vovo.
14Kandi ku inyinga yelilia, Boaz ya volera Ruth, Hamba, u lagire ubukima, na u dongere ketonge kikyo mu isiki yiyi. Ma Ruth yikala himbi ku vagesi, navo va mu sundira ubuswage busambe, na ya lia, nokwiguta, na a leka vindi. 15Kandi lwa ya vuka kudola, Boaz ya laga avasoleli veve, na a vola, Mu mu leke a dole kali hagati heviganda viboheywi, mu ta mu lemba mba. 16Kandi mu twulidze vikekeke mu vya bofwa, mu mu lekere a duke kuvidola, mu ta mu gaya mba.
17Kunangwa ya dola mu mulimi kuduka mgolova; na ya huula vya ya dola, na vya duka kihinda kilala kyashairi. 18Naye yidwika, na a tsia mu lidala: na navizala wewe ya lola vya ya dola: kandi ya mu twulidzira vya tigala lwa yiguta, na ya mu ha. 19Na navizala wewe ya mu teva, U doye haliha lero? Na wa kola haliha? A gasidzwe uyu u kwidzuliye. Naye ya vulira navizala wewe lieta lyomundu wa ya kola miyinzi halala naye, na a vola, Mundu wa nkoli naye miyinzi lieta lilye li veye Boaz. 20Na Naomi ya volera navizala wewe, Yahova a mu gasidze u vulanga kuleka kukolera ava veye mwoyo tsimbabasi, na kandi kuvo ava kudza. Na Naomi ya mu volera, Mundu uyu a veye ku aviko vetu, a veye mulala ku avenyumba yetu himbi. 21Na Ruth Mumoabu ya vola Nyee, ya mbolera, U hambane ligali navasoleli vange, kuduka lwa va mala ligesa lyange lyosi. 22Na Naomi ya volera Ruth navizala wewe, Nobulahi mwana wange, ive kutsia halala navakana veve, na va ta vugana nive mu mulimi gundi mba. 23Kunangwa ya hambana navakana va Boaz, kudola kuduka ku kiheri kyeligesa lyashairi neligesa lyengano; na a menya halala na navizala wewe.
©Bible Society of Kenya, 1967