Ruth 3
3
1Na Naomi navizala wewe ya mbolera, Mwana wange, si ga a ndukira kukwenyera ho kwelemeridza, u duke kunyola ho bulahi? 2Kandi kalunu Boaz si a veye ho mwiko wetu, wa wa li halala navakana veve? Henza, yilulsnga shairi budiku bwa lero ku lodze. 3Kunangwa wesinge, na wevake maguta, wivike tsingubo tsitsyo, u sulungute ku lodze: navutswa u telang'aminya mwene mundu uyu a ku manye, kuduka lwa va mala kulia nokunwa. 4Na ga la va, lwa a gona hasi, u la henza ha a goni, na u lingira mu, nokuvimbula virenge vivye, nokugona ho; naye a la ku volera kya u kola. 5Ya volera navizala wewe, Yaga gosi aga u mboleye nda kola.
6Naye ya sulunguta ku lodze, na a kola kuli gosi ga navizala wewe ya mu volera. 7Na lwa Boaz ya mala kulia nokunwa, nomwoyo gwigwe gwa sangala, ya tsia kugona hanyima hekitumi kyobuswage: nomukali uyu ya tsia galaha, na a vimbula virenge Yi vivye, na a gona ha zana. 8Kunangwa ubudiku hagati, mundu uyu ya tia, na a girunkana mwene; henza, mukali a gonanga ha virenge vivye. 9Naye ya mu teva, U veye ibwaha? Naye ya tivula, Inze mbeye Ruth mukana mutugwa wowo; vambula ingubo yoyo kufwuma mukana mutugwa wowo, kigira u veye wenyumba ya himbi. 10Naye ya vi vola, Yahova a gasidze ive mwana wange: u lolekidza ubulahi bwenyima kuvita bwa matsyambiri; kigira si u londa avasoleli mba, ni va li avadaka naho avatugi. 11Kalunu mwana wange, u ta tia mba: nda ku kolera gosi ga u vola: kigira avelidala lyosi lya avandu vange va manya ive u veye mukali welimenya lilahi. 12Na geligali mbeye wenyumba ya himbi, navutswa a ve ho mulala wa himbi kuvita inze. 13Linda budiku buno, na ga la va mugamba, na a va na a dukidza ku ive ga dukiranga wenyumba ya himbi, nobulahi; a la kola ga dukiranga wenyumba ya himbi: navutswa na a vula kukolera ive ga dukiranga wenyumba ya himbi, hene yaho inze nda ku kolera, kuli Yahova a veye mwoyo: u gone kuduka mugamba.
14Naye ya gona ha virenge vivye kuduka mugamba; naye ya vuka imbiri wobulavu bu kikiri kuva ho kuduka kulolana. Kigira ya vola, Va ta manya mukali uyu ya duka ku lodze. 15Naye ya mu volera, Leta ingubo yoyo inziyuhira, u gi gumire; naye ya gi gumira; na ya mu gerera vigero vitano na kilala vyeshairi, na a mu dwika. Na Boaz ya tsia mu lidala. 16Na lwa Ruth ya duka ku navizala wewe ya teva, U veye ibwaha, mwana wange? Naye ya mu volera gosi gomundu uyu ya mu kolera. 17Naye ya vola, Ya mbeye vigero yivi vitano na kilala vyeshairi, kigira ya vola, U ta tsia vutswa ku navizala wowo. 18Naye ya vola, Wikale vutswa, mwana wange, kuduka lwa u manya kuli inkuva yiyi i la loleka; kigira mundu uyu si a la sosa, kuduka lwa a dukidza inkuva yiyi yosi lero.
©Bible Society of Kenya, 1967