Ruth 1
1
1Ga duka inyinga ya avakalagi vameha, inzala ya duka mu kivala. Mundu mulala wa Bethlehemu yuda ya tsia kumenya mu kivala kya Moabu, uyu nomukali wewe navana veve vaviri avayai. 2Lieta lyomundu uyu lya langwa Elimeleki, nelieta lyomukali wewe lya langwa Naomi, nameta gavana veve ga langwa Mahaloni na Kilioniva li ava Efarata va Beth lehemu yuda. Navo va duka mu kivala kya Moabu, ni va menya yo. 3Na Elimeleki, musatsa wa Naomi, ya kudza; naye ya lekwa halala navayai veve vaviri. 4Navo va va vugulira avakali ku avakana va Avamoabu, lieta lya mulala lya langwa Orpa nelieta lya wundi lya langwa Ruth navo va menya yo fwana mihiga likumi. 5Na Mahaloni na Kilioni va kudza vombi; na mukali uyu, avana veve avayai vombi nomusatsa wewe va mu leka.
6Naye ya vuka na vanavizala veve, a duke kwirana kutwula mu kivala kya Moabu: kigira ya hulira mu kivala kya Moabu kuli Yahova ya henza avandu veve kuvaha vyokulia. 7Kunangwa ya twula ha zana, uyu na vanavizala veve vombi halala naye; ni va tsia ku inzira yavo kwirana mu kivala kya Yuda. 8Na Naomi ya volera avanavizala veve vombi, Tsia, mwirane sa mulala ku mwinye ku inyumba ya mama wewe; Yahova a mu kolere bulahi, kuli mwinye mwa kolera bulahi avakudza na inze. 9Yahova a mu he mu duke kwelemeridza, sa mulala mu inyumba yomusatsa wewe. Naye ya va busa, navo va ginga myoyo gyavo, ni va lira. 10Navo va mbolera, Auwa, navutswa ku lirana halala nive kutsia ku avandu vovo. 11Na Naomi ya vola, Mwirane, avakana vange: kigira ki mu tsia ninze? Mbeye navans avayai mmunda mwange, va duke kuva avasatsa venyu? 12Mwirane kandi, avakana vange, mu tsie ku inzira yenyu; kigira inze si nyala kuva nomusatsa kandi. Ni mba ni mbola, mbeye nelisuuvira, nyole musatsa ubudiku bwa lero, nokwivula kandi avana avayai; 13ngano mwa ka linda kuduka lwa va viruka? Ngano mwa ki gaya mu vule kuva nomusatsa? Auwa, avakana vange; kigira mbereranga kigira mwinye kigira mukono gwa Yahova gwa twula ku inze. 14Navo va ginga myoyo gyavo kandi, ni va lira: na Orpa ya busa navizala wewe; navutswa Ruth ya handa kuye.
15Na Naomi ya volera Ruth, Henza uyu muhalikwa wowo yirananga ku avandu veve, noku vanyasaye veve: na ive wirane u londe muhalikwa wowo. 16Na Ruth ya vola, U ta niga nku leke ive, nokwirana mbule kukulonda: kigira ha u tsitsanga, inze kandi nda tsia ho, ha u menya, inze nda menya ho; avandu vovo va la va avandu vange, na Nyasaye wowo a la va Nyasaye wange: 17ha u kudzira, inze nda kudzera ho, na nda tebwa ho: Yahova ya nkolere ndiyo nokumeda ku, ni ki va ni ki veye ho kindu kindi ki ta li likudza li lavukanya ive na inze. 18Naye lwa ya lola u saviye kutsia halala naye, ya leka kuvolerana naye.
19Kunangwa va tsia vombi halala kuduka Beth-lehemu. Ga duka, lwa va duka Beth-lehemu, lidala lyosi lya vukidzwa kigira yava, navakali silidala va vola, Uyu si a veye Naomi? 20Naye ya va volera, Mu ta nanga Naomi, mu nange Mara; kigira Wanyala. Vyosi u nkoleye bululu. 21Nda twula hano ni mbeye mu hinda, na Yahova u nziranye vutswa, kigira ki mu nanga Naomi, kigira Yahova u lolekidzi ku inze, na Wanyala Vyosi u ndambidzi? 22Na ndiyo Naomi yirana, na Ruth Mumoabu, navizala wewe halala naye, virana kutwula mu kivala kya Moabu: na va duka Bethlehemu mu litanga lyeligesa lyashairi.
©Bible Society of Kenya, 1967