Tsing'ano 8
8
1Yee, ubugeeri si bu kupanga lwanga,
Na limanya si li twulidzanga mwoyo gwalyo?
2Igulu wa hadiguluku himbi nenzira,
Ha bwaganiru bwetsinzira, niho ha a singiranga;
3Himbi neviribwa, ha bwingiriru bwelidala,
Ha bwingiriru bwemiliango a kupanga lwanga:
4Ku mwinye, O avasatsa, nanganga;
Na mwoyo gwange gu veye ku avana va vandu.
5O mwinye ava ta manya, mu manye ubugeeri;
Na mwinye avasiru, mu ve nomwoyo gwelimanya.
6Mu hulire, kigira nda vola makuva manene
Na likunula lyeminwa gyange li la va lyevindu vilungi.
7Kigira munwa gwange gu la vola ageligali;
Na ubudamano bu veye livihiriridzwa ku minwa gyange.
8Amakuva gosi gomunwa gwange ga veye ubulungi;
Si ha veye nekindu kyobukyamu kinga vyokuvoyonkana mugo.
9Gosi ga veye havulavu ku uyu u manyanga,
Na agobulungi ku yava ava nyolanga limanya.
10U vugule megidzo gange, na u ta vugula ifetha;
Na u vugule limanya kuvita ithahabu indahi.
11Kigira ubugeeri bu veye bulahi kuvita magina makanyu gobuguli budinyu;
Na vyosi vyenyangwa si vi nyala kuleng'anywa nabwo.
12Inze ubugeeri nkoli limanya kuva hokumenya hange,
Na nyola limanya vindu vyobugeeri.
13Litia Yahova li veye kudunyira ubudamano:
Luyai, na lyegingira, na inzira indamano,
Na umunwa gwobukyamu, ndunyiranga yivi.
14Livola malungi li veye lyange, na ubugeeri ubudukiru:
Inze mbeye limanya; mbeye nobunyali.
15Avami vamehanga kigira inze,
Na avanene va kalaganga agobu lungi.
16Avanene vamehanga kigira inze,
Na avakuminywa kali avakalagi vosi velirova.
17Nyanzanga yavo ava yanza inze;
Navo avenyanga budinyu va la nyola inze.
18Ubutugi na lidzominywa vi veye halala na inze;
Yee, ubutugi bwokuhindira na ubulungi.
19Amakuyu gange ga veye malahi kuvita ithahabu, yee, kuvita ithahabu indahi;
Na limedeka lyange li veye lilahi kuvita ifetha indahi.
20Inze ng'endanga nevirenge mu inzira yobulungi
Hagati hetsinzira tsyelikalaga lilungi;
21Nduke kulihidza yavo ava nyanzanga miyandu,
Nduke kukola ubutugi bwavo bwizule.
22Yahova ya li ninze mu litanga lyenzira yeye,
Imbiri wemiyinzi gyigye gya kale.
23Inze nda singeridzwa kale, mu litanga,
Lwa lirova li kikiri kuva ho.
24Ha li bugira ululiva, inze ndivulwa;
Lwa visenukiru vi kikiri kwizula amadzi.
25Lwa vigulu vi kikiri kusingeridzwa,
Na lwa tugulu tu kikiri, inze ndivulwa;
26Lwa a kikiri kulomba lirova, kinga milimi,
Kinga litanga lyolugukyi lwelirova.
27Lwa ya singiridza migulu, inze nda li ho:
Lwa ya vika ulwako mmoni mwo luliva.
28Lwa ya dinyiridza ubwerefu igulu,
Lwa visenukiru vyoluliva vya nyola tsingulu
29Lwa ya vika ulwako lwenyanza,
Amadzi ga vule kwononnya lilaga lilye
Lwa ya laga imise gyelirova:
30Hene yaho nda li halala naye kuli musidza;
Nda li ubuyanzi bwibwe madiku gosi
Nda sangala imbiri wewe kazozo.
31Nda sangalira lirova lilye lya avandu va menya mu;
Na ubuyanzi bwange bwa li halala na avana va avandu.
32Kunangwa kalunu, mwinye avana vange, mu hulire inze;
Kigira va gasidzeywi yavo ava lindanga tsinzira tsyange.
33Mu hulire lyegidzwa, na mu ve nobugeeri,
Mu ta li sula mba.
34A veye nobugasu mundu u huliranga inze,
U lindanga madiku gosi mu viliango vyange
U lindanga ha maliva geviliango vyange.
35Kigira ku vosi uyu u nyolanga inze a nyolanga livamwoyo,
Na a la nyola tsimbabasi tsya Yahova.
36Navutswa uyu u nkolera ubwoni, yononnya mwoyo gwigwe mwene:
Vosi ava ndunyiranga, yava va yanzanga likudza.
©Bible Society of Kenya, 1967