Tsing'ano 7
7
1Mwana wange, u gumire makuva gange,
Na u vike amalago gang halala na ive.
2U gumire amalago gange na u ve mwoyo;
U gumire lilaga lyange kuli u linda indolero yemoni yoyo.
3U ga bohe ku videte vivyo;
U ga ng'ode ku kibao kyomwoyo gugwo.
4U volere ubugeeri, Ive u veye mbotso wange;
Na u lange limanya mukali womwiko wowo:
5Ga duke kukulinda ku mukali mugeni,
Ku mukali mugeni u kolanga makuva gege madoto.
6Kigira ha lidirisha lyenyumba yange
Nda li ni mbenzeranga mu lidirisha lyange;
7Nda lola musoleli u ta li nobugeeri,
Nda mu lola hagati ha vasiru,
Musoleli u ta li nelimanya
8A vitanga ku inzira himbi ku bwavukaniru bwenzira ha a menya;
Na ya londa inzira kutsia mu inyumba uomukali uvu.
9Inyinga ya bwiranga, inyinga yomgolova gwelidiku,
Inyinga yobudiku hagati mu kisundi.
10Na henza, mukali ya vugana naye
Wevika tsingubo tsyamalaya, womwoyo gwobugadi.
11(A veye weliyoga na wobukyamu;
Virenge vivye si vi menya mu inyumba yeye mba:
12Hali kanyingi a veye mu tsinzira, na hali kanyingi mu mahasi,
Na a gonekanga mu bwavukaniru bwosi.)
13Ma mukali ya mu gumira na a mbusa
Naye ya li nommoni mu ta li netsisoni, na a mu volera:
14Inze mbeye nevihaanwa vyemirembe;
Lero ntungi vyelilagana lyange.
15Kunangwa ndadza kuvugana na ive,
Kwenya ligali mmoni mumwo, na mmali kukulola.
16Mmali kwala ubugono bwange nevyokugonera vilahi,
Na tsingubo tsyamagondo na katani indahi ya Egepeti.
17Mbiki ku bugono bwange vya funya mwayu
Manemane, na undi, na mudalasini.
18Hamba kwigute ubuyanzi kuduka mugamba;
Kwesangalidze avene neliyanzana.
19Kigira musatsa mwene inyumba si a veye ho mba;
U tsiye ulugendo lwe ihale:
20U tsiye nemuya yefetha;
A ladza yengo inyinga yomweli gu kyera.
21Na ya mu girunkannya namakuva manyingi malahi;
Kandi namakuva madoto geminwa gyigye ya mu niga kutsia
22Nonoho a mu londa Kuli ing'ombe i tsitsanga kumi gwa,
Kinga kuli welibofwa nevivya a tsitsanga ku lyegidzwa lyobusiru;
23Kuduka lwo mbano gu mu tumita mu likudumane lilye;
Kuli linyonyi li tsitsanga bwangu kwingira mu luginga,
Na si a manya ga veye kudividza livamwoyo lilye.
24Kunangwa mwinye avana vange, mu mbulire
Na mu linde amakuva gomunwa gwange.
25U ta bugirira mwoyo gugwo kuyeka ku tsinzira tsyomukali uyu;
U ta gotera ku tsinzira tsitsye.
26Kigira u tsomi hasi avanyingi ava kindukidzwa:
Yee, vosi aviitwa naye va veye lihe linene.
27Inyumba yeye i veye inzira ya Kihadisi,
I sulungutanga kutsia mu inyumba yelikudza.
©Bible Society of Kenya, 1967