Tsing'ano 6
6
1Mwana wange, nu u va nu u V kolera mutende wowo kihambiriru,
Nu u va nu u hambana mu mukono gwomugeni;
2U tegeywi na makuva gomunwa gugwo,
U vuguywi na makuva gomunwa gugwo
3Kunangwa, kalunu, mwana wange, u kole yaga, wehonnye mwene,
Kigira wingiye mu mukono gwowakyo:
U tsie, wegehidze mwene, na u goonye wakyo;
4U ta ha tsimoni tsitsyo tsindolo mba,
Kandi u ta ha vigohe vivyo litengedza;
5Wehonnye ive mwene kuli kisusu kyehonganga ku mukono gwo muhimi,
Na kuli linyonyi li twula mu mukono gwomutegi.
6U tsie ku viguguli, ive mugata;
U ganagane tsinzira tsyakyo, u ve nobugeeri:
7Vya vuli kuva nomunene,
Kinga musingeriri, kinga mwami,
8Navutswa vyevikira vyokulia inyinga yoluya,
Nokuvungidza vyokulia vyakyo inyinga yeligesa.
9U la gona kuduka inyinga ki, ive mugata?
U la vuka inyinga ki kutwula mu tsindolo tsitsyo?
10U ki gonanga hakekeke, nokutengedza hakekeke,
Nokulinga makono mu tsindolo hakekeke:
11Na ndiyo ubudaka bubwo bu la duka ku ive kuli mwivi,
Na lyegomba lilyo kuli mundu weviki vyobulwani.
12Umundu u ta konya kindu, mundu wobudamano,
Ni uyu u tsitsanga nomunwa gwobukyamu
13Uyu a simiranga vigohe vivye, nokuvola nevirenge vivye,
Nokusima nevidete vivye;
14Wobukyamu bu veye mu mwoyo gwigwe,
Uyu u ganagana ubudamano kazozo,
Uyu u taganga ubugutsa bwamahangali.
15Kigira yaga kivi kikye ki la duka kuye nonoho;
A la vunanywa nonoho, na si ha veye nenzira yokuhona.
16Vi veye ho vindu vitano na kilala vya Yahova a dunyiranga;
Yee, vitano na viviri vi veye vyokuvihiriridza kuye:
17Navyo vi veye, tsimoni tsyokwigingira, na lulimi lwobugadi;
Na makono ga tahidzanga masahi ga ta li nekindu;
18Mwoyo gu ganagananga tsigana gani tsindamano,
Virenge vi nyaguliranga ubuda mano,
19Muloli wobugadi u volanga ububehi,
Na uyu u taganga ubugutsa bwamahangali hagati havamwavo.
20Mwana wange, u gumire amalago ga dada wowo,
Na u ta leka lilaga lya mama wowo:
21U ga bohe ku mwoyo gugwo kazozo;
U ga hambidze migoti lilyo.
22Lwa u genda ga la kwimirira;
Na lwa u gona tsindolo ga la ku linda;
Na lwa u vuka ga la volerana na ive.
23Kigira lilaga li veye itaya; na lyegidza li veye ubulavu;
Na lyegidzwa lyeligondokirwa li veye inzira yelivamwoyo:
24Kukulinda ku mukali mudamano a vule kukunyola
Nokukuhonnya ku budoto bwolulimi lwomugeni.
25U ta kayirwa ubulahi bwibwe mu mwoyo gugwo;
Kandi u ta bugirira a ku tege nevigohe vyetsimoni tsitsye.
26Kigira ku mukali wamalaya mundu a dukidzwa ku lidonye lyobukima;
Na mukali muheyi a himanga livamwoyo lyobulahi bunene.
27Mundu a nyala kuvugula amanda mu kiritu kikye,
Na tsingubo tsitsye tsi vule kuhya?
28Kinga mundu a nyala kugenda ku amanda gomuliru,
Na tsinduvatiru tsitsye tsi vule kuhya?
29Ni ndiyo a veye uyu wingiranga ku mukali womutende;
Ku vosi u dira mukali uyu, si a la vula kukalagirwa.
30Avandu si va leganga mwivi, ni yiba
A duke kwigutidza mwene lwa a veye nenzala:
31Navutswa na a va na a nyoleka a la tunga hali katano na kaviri;
A la haana vyosi vyenyumba yeye.
32Uyu u heyanga nomukali si a veye nobugeeri:
U kolanga yaga yenya kudividza mwoyo gw gwe.
33A la nyola tsing'oma na lilegwa;
Na tsisoni tsitsye tsi la vula kweywa ligali.
34Kigira imbodoka i veye ubutima bwomundu;
Naye si a la va netsimbabasi ku lidiku lyokuvanza kisalya.
35Si a la bugirira kutungwa mitungu;
Kandi a la vula kulemera, kali nu u mu ha vihaanwa vinyingi.
©Bible Society of Kenya, 1967