Tsing'ano 4
4
1Avana vange, mu hulire lyegidza lvadada,
Na mu tegidze amatu kunyola limanya:
2Kigira mmu hedzanga megidzo malahi;
Mu ta leka megidzo gange.
3Kigira inze nda li mwana ku dada wange
Nda li mwana mudoto na muyanze yeng'ine imbiri wetsimoni tsya mama wange.
4Naye ya nzegidza, na a mbolera:
Mwoyo gugwo gu bugirire makuva gange;
U gumire malago gange, na u ve mwoyo;
5Wenyolere ubugeeri, wenyolere limanya;
U tivirira, kandi u ta girunkana kutwula ku makuva gomunwa gwange;
6U ta bu leka, nabwo bu la ku linda bulahi;
U bu yanze, nabwo bu la ku linda.
7Ubugeeri bu veye kindu kinene kuvita vyosi; kunangwa wenyolere ubugeeri;
Yee, halala na linyola lilyo lyosi, wenyolere limanya.
8U bu kuminye, nabwo bu la ku nenehidza;
Bu la ku letera lidzominywa, lwa u hambana nabwo.
9Bu la vika ku mutwe gugwo igudwa yobulahi;
Bu la ku ha itaji yobukumi.
10U hulire, O mwana wange, na u vugule livola lyange
Na mihiga gyobuhindiri bubwo gyi la va minyingi.
11Nkwegidzi inzira yobugeeri;
Nkwimiriye ku tsinzira tsinungi.
12Lwa u tsitsanga imbiri, ligenda lilyo li la lungekidzwa;
Nu u va nu u nyagula, si u likigi tala mba.
13U gumire lyegidzwa ligali; u ta li leka li tsie:
U li gumire; kigira li veye livamwoyo lilyo.
14U tingira mu inzira yavadamano,
Kandi u ta genda ku inzira yavandu avadamano.
15Weyahule kuyo, u ta vita himbi kuyo;
U girunkane kutwula kuyo, u tsie ahandi.
16Kigira si va gona tsindolo, ni ga ta li va koli ubudamano;
Na tsindolo tsyavo tsi twulidzwa kuvo, ni ga ta li vikigitalidza umundu.
17Kigira va litsanga vyokulia vyobudamano,
Na va nwedzanga iwaini yekirage.
18Navutswa inzira yavalungi i fwanana nobulavu bu ng'ereng'ananga,
Bu ng'ereng'ananga kuvita nokuvita, kuduka ku lidiku lidukiru.
19Inzira yomudamano i fwanananga nekisundi:
Si va manya kya vikigitalidza.
20Mwana wange, u hulire makuva gange;
U tegidze ugutu gugwo kuhulira livola lyange.
21U ta leke ga twule imbiri wetsimoni tsitsyo;
U ga linde hagati homwoyo gugwo.
22Kigira yago ga veye livamwoyo lya yavo ava ga nyolanga,
Na ubulamu mu mubiri gwavo gwosi.
23U linde mwoyo gugwo netsingulu tsyosi
Kigira vyosi vyelivamwoyo vi twula kugwo.
24Munwa gwobukyamu, u gu vike ihale ku ive,
Na minwa gyobukyamu u gyi vike ihale ku ive.
25Tsimoni tsitsyo tsi henze imbiri bulungi,
Na vigohe vivyo vi henze imbiri wowo bulungi.
26U lungekidze inzira yevirenge vivyo,
Na tsinzira tsitsyo tsyosi tsi dinyeridzwe.
27U ta girunkana kutsia haluvega ku mukono mulungi kinga ku mukono mmosi:
U twulidze kirenge kikyo ha budamano.
©Bible Society of Kenya, 1967