Tsing'ano 3
3
1Mwana wange, u tivirira megidzo gange;
Navutswa mwoyo gugwo gu gumire amalago gange:
2Kigira butambi bwamadiku na mihiga gyelivamwoyo,
Na mirembe ga la ku medera.
3U ta bugirira tsimbabasi na ageligali kukuleka:
U vi bohe mwigoti mumwo:
U vi ng'ode ku kibao kyomwoyo gugwo:
4Na ndiyo u la nyola tsimbabasi na limanya lilahi
Imbiri wetsimoni tsya Nyasaye netsyavandu.
5U suuvire Yahova nomwoyo gugwo gwosi,
U ta yeka ku ubugeeri bubwo mwene:
6Mu tsinzira tsitsyo tsyosi u mu bugirire,
Naye a la kwimirira ku tsinzira tsitsyo.
7U ta va wobugeeri mu tsimoni tsitsyo;
U tie Yahova, wavukane nobudamano:
8Inkuva yiyi i la va ubulamu ku lulera lulwo,
Nokuvika ubuhaali mu vigumba vivyo.
9U he Yahova lidzominywa nevi ndu vivyo,
Nobuhya bwelimedeka lilyo lyosi:
10Na ndiyo videra vivyo vi lizula ubunyingi
Na vyokumina mazabibu vi la senuka iwaini impya.
11Mwana wange, u ta lega ligondoka lya Yahova;
Kandi u ta lola ubuliduhu ku amageli gege:
12Kigira wa Yahova a yanza, a mu hedzanga amageli,
Kali kuli dada a hedzanga mwana wa a yanza.
13A veye nobugasu mundu u nyolanga ubugeeri,
Kandi mundu u nyolanga limanya.
14Kigira madanyi gabwo ga veye malahi kuvita madanyi gefetha,
Na vyambeti vi nyoleka yimu vi veye vilahi kuvita ithahabu indahi.
15Bu veye bulahi kuvita magina makanyu gobuguli budinyu:
Kandi ku vindu vyosi vya u kayirangwa si ha veye na kilala ki leng'ana nabwo.
16Ubutambi bwamadiku bu veye mmukono gwigwe mulungi;
Na mu mukono gwigwe mmosi a veye nobutugi na lidzominywa.
17Tsinzira tsitsye tsi veye tsyokuyanzidza,
Na tsinzira tsitsye tsyosi tsi veye tsyemirembe.
18A veye musala gwelivamwoyo ku vosi ava mu gumira:
Kandi sa mulala u hambana naye a veye nobugasu.
19Yahova ya lomba mise gwelirova nobugeeri;
Na ya singiridza ligulu nelimanya.
20Ku limanya lilye ululiva lwavukanywa,
Na malesi ga tonyatonya lime.
21Mwana wange, u ta leka yaga ga twule imbiri wetsimoni tsitsyo;
U gumire ubugeeri budukiru na limanya:
22Nivyo vi la va livamwoyo lyomwoyo gugwo,
Nobulahi mwigoti mumwo.
23Kunangwa u la genda ku inzira yoyo bugira ubutii,
Na kirenge kikyo ki la vula kwikigitala.
24Lwa u gona, si U la tia mba:
Yee, u la gona, na tsindolo tsi la va tsinolu.
25U ta tia ubutihidzi bwa nonoho,
Kinga ubwoneku bwavadamano lwa bu duka:
26Kigira Yahova a la va ubuluviriri bubwo,
Na a la linda kirenge kikyo ki vule kugumirwa.
27U timana ubulahi yavo ava ga dukiranga kuhebwa,
Lwa mukono gugwo gu veye netsingulu kukola.
28U ta volera mutende wowo, U tsie, ma udze kandi,
Na nda ku ha mugamba;
Navutswa kya yenyanga u veye nakyo himbi.
29U ta ganagana ubudamano ku mutende wowo,
Lwa a menyanga nemirembe halala nive.
30U ta hing'ana nomundu bugira kivune,
Naye na a vula kukukolera ubu damano.
31U ta kendekera mundu wekirage
Kandi u ta tovola indala ku tsinzira tsitsye.
32Kigira mukyamu a veye livirihidza ku Yahova;
Navutswa aga viswa gege ga veye halala na avalungi.
33Lilaama lya Yahova li veye ku inyumba yavadamano;
Navutswa a gasidza limenya lyavalungi.
34Ligali a la lega avalegi;
Navutswa a hedzanga avegehidzi ubulahi.
35Avobugeeri va la lia ubukumi kuva miyandu;
Navutswa tsisoni tsi la va linenehidzwa lyavasiru.
©Bible Society of Kenya, 1967