Tsing'ano 30
30
1Makuva ga Aguru mwana wa Jakeh; ubutumwa.
Mundu a volera Ithieli, a volera Ithieli na Ukali:
2Ligali mbeye kuli inyama kuvita mundu ku vosi
Na si mbeye nelimanya lyomu ndu;
3Na mbula kwega ubugeeri,
Kandi si mbeye nelimanya lya uyu Mutakatifu.
4Ibwaha wanegira migulu, nokusulunguta kandi?
Ibwaha wa vungidza imbuudza mu mukono gwigwe?
Ibwaha wa boha amadzi mu ingubo yeye?
Ibwaha wa singeridza viheri vyosi vyelirova?
Lieta lilye ni bwaha, na lieta lyomwana wewe ni bwaha, nu u va nu u manya?
5Makuva gosi ga Nyasaye ga geridzwa:
A veye ingavo ku yavo avevisanga muye.
6U ta meda ku makuva gege,
Gase a la ku gondokera, na u la loleka kuva mbehi.
7Ntevi ku ive vindu viviri;
U ta nyima yivi lwa nkikiri kukudza:
8U hile hale ku inze ubugadi na ububehi;
U ta mpa ubudaka kinga ubutugi;
U ndageridze nevyokulia vi ndu kira:
9Gase ndiguta, nokwambakana ive, nokuvola, Yahova ni bwaha?
Kinga nda va mudaka ligali, gase nda va mwivi,
Nokutumekira vutswa lieta lya Nyasaye wange.
10U ta huudzeridza mutugwa ku munene wewe
Gase a la ku nyega, na u la loleka kuva nelihyolo.
11Ha veye nelikula lya nyega dada wavo
Na va vula kugasidza mama wavo.
12Ha veye nelikula lyelolanga avene kuva vanifu
Navutswa si va singwa ubudamano bwavo.
13Ha veye nelikula, lyeginga lyetsimoni tsyavo li duka ndi
Na vigohe vyavo vya gingwa.
14Ha veye nelikula lyamino gavo ga veye kuli vivavi, na magego kuli mibano
Kulia avadaka va twule mu lirova, na avadambi va twule hagati ha avandu.
15Impininia i veye navakana vaviri, ava volanya, U ku he, u ku he.
Vi veye ho vindu vivaka vi vula nga kwiguta ligali
Yee, vi veye ho vindu vine vi vulanga kuvola, Ga duki.
16Kilindwa; na mugumba; Lirova li vula kwiguta amadzi;
Na muliru gu vula kuvola, Ga duki.
17Imoni i sekanga dada wewe,
Nokulega lihulira mama wewe,
Amajikolo gomwivona ga la gi somola,
Na viminyo vyendidzu vi la gi lia.
18Ha veye ho nevindu vivaka vyokugenya vyokuvita inze,
Yee, vine vya nta manya:
19Inzira yendidzu mbwerefu;
Inzira yenzoka ku lwanda;
Inzira yobwato mu inyanza;
Na inzira yomundu halala nomu kana.
20Ni ndiyo inzira yomukali muheyi i veye;
A litsanga, ma yeya munwa,
Na vola, Si nkoli kindu kidamano.
21Lirova li degera kigira vinduvivaka
Kandi kigira vine vya li ta nyala kwikudzira ku, navyo ni yivi;
22Mutumekiri lwa a duka kuva mwami;
Na musiru lwa yiguti vyokulia;
23Na umukali u dunyerangwa, lwa a sererwa;
Na mukana mutugwa u veye wemiyandu gyomukali munene wewe.
24Vi veye ho vindu vine vikekeke mu lirova,
Navutswa vi veye nobugeeri ligali;
25Viguguli vi veye avandu ava ta li netsingulu,
Navutswa vyelombera vyokulia vyavyo inyinga yekimeyu;
26Makinieli ga veye avandu vadede kere,
Navutswa gelombera tsinyumba tsyago mu tsinyanda;
27Tsisigi si tsi veye nomwami,
Navutswa tsyosi tsi gendanga viduma;
28Lisyagali li gumiranga na makono galyo,
Navutswa li menyanga mu tsinyumba tsyobwami tsyavami.
29Vi veye ho vibaka vyolugendo lulahi,
Yee, vine vyolugendo lulahi:
30King'ang'a ki veye netsingulu kuvita tsinyama tsyosi
Na si ki girunkana kulekera inyama yindi inzira;
31Na imbwa ya ng'era mundakandi ikole;
Na mwami wamahyolo ga ta veye kuye.
32Ive nu u va u koli agobusiru mu lyegingira mwene,
Kinga u ganagani vidamano,
U vike mukono gugwo ku munwa gugwo.
33Kigira mu lisadza amaveere ama guta ga loleka,
Na mu limina amolu amasahi ga twulanga;
Na ndiyo mu livukidza ubutima lihing'ana li loleka.
©Bible Society of Kenya, 1967