Tsing'ano 29
29
1Uyu weligondokirwa linyingi naa dinyeridza ligoti lilye
A lononnywa nonoho na si ba veye nobuhonnyi.
2Lwa avalungi va medeka, avandu va sangala;
Navutswa lwa mundu mudamano yameha, avandu va kenya.
3Ku vosi uyu u yanza ubugeeri a yanzidza dada wewe;
Navutswa uyu u hambananga navamalaya a gotidza ubutugi bwa dada wewe.
4Umwami a dinyiridza kivala nelikalaga lilye lilungi;
Navutswa uyu wenyanga vikukula a tung'aminya kivala.
5Mundu widzominyanga wakye na makuva madoto
A teganga mutego ku ligenda lilye.
6Mu lihyolo lyomudamano mu veye nomutego;
Navutswa mulungi yimbanga na a sangala,.
7Mulungi a ganagana makuva ga avadaka;
Mudamano si a veye nelimanya kugamanya.
8Avekihenyahenye va sambanga lidala;
Navutswa avandu avobugeeri va kiring'annya ubutima.
9Mundu wobugeeri na a veye nelihing'ana nomusiru,
Na a va na a vihirirwa naho na a va na a seka, si ha veye nobusosi.
10Avalumindi va dunyira mudukiru;
Na mu makuva go mulungi, venyanga livamwoyo lilye.
11Umusiru a volanga vyelivihiririrwa vivye vyosi;
Navutswa mundu wobugeeri a ligalira nokulihodzeridza.
12Mwamehi na a hulira makuva gobubehi,
Avatugwa veve vosi va veye avadamano.
13Mudaka na umudambidzi va vugana halala;
Yahova niye u lavidzanga tsimoni tsyavo vombi.
14Umwami u kalaganga makuva gavadaka nobusuuvirifu,
Intebe yeye yobwami i la singeridzwa mihiga nemihiga.
15Impimbo na lyegidza vi vikanga ubugeeri;
Navutswa mwana wa lekwa kulonda tsinzira tsitsye, a la legannya mama wewe.
16Avadamano lwa va medeka, mahyolo ga medeka;
Navutswa avalungi va la lola ligwa lyavo.
17U he mwana wowo amageli, naye a la ku sosidza;
Yee, a la sangalidza mwoyo gugwo.
18Ha malola ga ta veye, avandu va tsia mu kirage;
Navutswa uyu u gumiranga lilaga a veye nobusangali.
19Mutugwa si a la bugirira kwegidzwa namakuva;
Kigira kali na a hulira si a la ga londa.
20U lola mundu welikola bwangu bwangu ku makuva gege?
Ha veye nelisuuviru ku musiru kuvita uyu.
21Uyu u leranga mutugwa wewe bulahi kutwula bwana buke
Ku kiheri a la va naye kuva mwana wewe.
22Mundu u vihirirangwa a vukidza nga lihing'ana,
Na mundu wobutima wizuye amahyolo.
23Uluyai lwomundu lu la mwikidza hasi;
Navutswa uyu u veye nomwoyo gwokwegehidza, a lidzominywa.
24U veye nelisanga nomwivi a dunyira mwoyo gwigwe mwene;
A huliranga imisu, ma a vula kuvuula.
25Litia mundu li letanga mutego;
Navutswa ku vosi u suuvira Yahova a veye nemirembe.
26Avanyingi venyanga ubulahi ku uyu wamehanga;
Navutswa likalagirwa lyomundu li twula ku Yahova
27Mundu mukyamu a veye livihiriridza ku avalungi;
Na uyu u veye mulungi ku inzira a veye livihiriridza ku avadamano.
©Bible Society of Kenya, 1967