Tsing'ano 31
31
1Yaga na makuva gomwami
Lemueli; ubutumwa bwa
mama wewe ya mwegidza.
2Ni kindu ki, mwana wange? Kandi ni kindu ki, mwana weinda yange?
Kandi ni kindu ki, mwana welila gana lyange?
3U ta ha avakali tsingulu tsitsyo,
Kinga tsinzira tsitsyo ku yavo avononnya avami.
4Si ga dukira avami, O Lemueli, si ga dukira avami kunwa iwaini;
Kandi si ga dukira avanene vekivala kuvola,
Kyokunwa kilulu ki veye haliha?
5Gase va la nwa nokwivirira lilaga,
Nokukyaminya likalagirwa lyomundu u veye mu kivi.
6Uyu a veye ahimbi kudiva, u mu he kyokunwa kilulu,
Na uyu u veye nomwoyo mululu u mu he iwaini:
7A nwe, na yivirire ubudaka bwibwe,
Na a vule kwidzulitsa kivi kikye kandi.
8U kunulire idimbidi munwa gugwo,
Mu makuva ga yavo vosi ava lekwa veng'ine.
9U kunule munwa gugwo u kalage bulungi,
U kalagire avadaka na avadambi, bulungi.
10Ibwaha u nyala kunyola mukali wobunyali bulahi?
Kigira liduka lilye li vitanga ubudukanu bwa magina makanyu.
11Mwoyo gwomusatsa wewe gu mu suuvira,
Naye si a la vula kuva nelimedeka.
12Mukali wewe a mu kolera bulahi, si a mu kolera ubudamano mba
Madiku gege gosi gelimenya lilye.
13Mukali uyu yenyanga ubwoya bwamagondi na ikatani
Na a kola miyinzi namakono gege nomwoyo gwobuyanzi.
14A veye kuli ubwato bwelikirannya;
A letanga vyokulia vivye kutwula ihale.
15Kandi a vukanga ni bu kikiri ubudiku,
Na a hedza avandu venyumba yeye vyokulia,
Na a hedza avakana vatugwa veve miyinzi gyavo.
16A ligula mulimi nokugugula;
Na a taga mulimi gwamazabibu ku makuyu ga makono gege.
17Yebohanga kikenge kikye nobunyali
Nokwevika tsingulu mu makono gege.
18A lolanga vyokukirannya vivye vi veye nevyambeti:
Itaya yeye si i simanga ubudiku.
19A hilanga makono gege kugumira kyokunavira tsimbusi,
Na vigalo vivye vi gumira kyokunavira tsingubo.
20A nyiranga mukono gwigwe ku avadaka;
Yee, a hilira makono gege kukonya avadambi.
21Si a veye nobutii ku avenyumba yeye kigira ubukindu bwelikonza;
Kigira avenyumba yeye vosi va vikwa tsingubo tsinzakanyu.
22Mwene welombeye vyokwihuma;
Tsingubo tsitsye tsi veye ikatani indahi na kiforosadi.
23Musatsa wewe a manyekana mu kiribwa,
Lwa yikala navakulundu vekivala.
24A lombanga tsingubo tsyekatani nokutsigulidza,
Naye a hedzanga avakiranyi mi sipi.
25Tsingulu na ubugoosi vi veye tsingubo tsitsye;
Naye a sangalira inyinga yidzanga.
26A kunulanga munwa gwigwe nobugeeri;
Na lilaga lyevikolwa vilahi li veye ku lulimi lwilwe.
27A henzanga ligali miima gya venyumba yeye,
Na si a litsanga ubukima bwobu gata.
28Avana veve va singira nokumutala u gasidzeywi;
Musatsa wewe kandi a mwidzominya, nokuvola,
29Avakana vanyingi va koli bulahi,
Navutswa ive u va vita vosi.
30Ubulahi bu gadanga, na ligondo li veye lyavutswa;
Navulswa mukali u tidzanga Yahova, a lidzominywa.
31U he uyu ku makuyu ga makono gege;
Na vikolwa vivye vi mwidzominye mu viribwa.
©Bible Society of Kenya, 1967